ފުލުހުންނާއި ސިފައިން ކޯޓު އަމުރެއްގެ ދަށުން މއ. ގޯލްޑަންބީން ބަލައި ފާސްކުރި އިރު އެގެއިން ފިސްތޯލަ ފެނުނު މައްސަލާގައި ހައްޔަރުކުރި މީހާގެ ބަންދަށް އަނެއްކާވެސް 15 ދުވަސް އިތުރުކޮށްފި އެވެ.
ފުލުހުންގެ މީޑިއާ އޮފިޝަލް ވިދާޅުވީ އެ މައްސަލާގައި ހައްޔަރުކުރި މީހާގެ ބަންދަށް ކްރިމިނަލް ކޯޓުން 15 ދުވަސް އިތުރުކުރީ އިއްޔެ ކަމަށެވެ. ނަމަވެސް އެ މައްސަލާގައި ހައްޔަރުކުރި އެމީހާގެ އަންހެނުން ކޯޓުން ދޫކޮށްލާފައިވާ ކަމަށް ވެސް އޮފިޝަލް ވިދާޅުވި އެވެ.
"އިތުރަށް ބަންދުގައި ބަހައްޓަން ނުފެންނާތީ ކޯޓުން އޭނާ ދޫކޮށްލީ،" އޮފިޝަލް ވިދާޅުވި އެވެ.
ފުލުހުންނާއި ހަތިޔާރު އެޅި ސިފައިންގެ ޓީމަކުން މއ. ގޯލްޑަންބީން ބަލައި ފާސްކުރީ މިދިޔަ އޮކްޓޯބަރު މަހުގެ 30 ވަނަ ދުވަހުގެ ރޭގެ ވަގުތެއްގަ އެވެ.
ސަން އަށް އެނގިފައިވާގޮތުގައި އެގެއިން ހައްޔަރުކުރީ ހ. ހިލްޓަން އިންތީފް ރައޫފެވެ.
އޭނާގެ މައްޗަށް ދައުވާކޮށްދިނުމަށް އެދި ފުލުހުން މިހާރު ވަނީ ޕްރޮސިކިއުޓާ ޖެނެރަލްގެ އޮފީހަށް ފޮނުވައިފައެވެ.