ރަސްމީ ފުޓްބޯޅަ ދަނޑުގައި މިއަދު ހަވީރު ރާއްޖެއާއި ހޮންކޮން ކުޅޭ ވޯލްޑް ކަޕް ކޮލިފައިން މެޗުގެ ފޮޓޯތަށް އިންސްޓަގްރާމް ކުރާ ފަރާތްތަކުގެ ތެރެއިން އެންމެ ރަނގަޅު ފޮޓޯއެއް އިންސްޓަގްރާމް ކުރާ ފަރާތަކަށް އިނާމެއްގެ ގޮތުގައި ޗައިނާއާ ދެކޮޅަށް ރާއްޖެ ކުޅޭ ކޮލިފައިން މެޗު ބަލައިލުމަށް ޗައިނާއަށް ދިއުމުގެ ފުރުސަތު ދޭގޮތަށް އެފްއޭއެމުން ހަމަޖައްސައިފި އެވެ.
އެފްއޭއެންގެ މީޑިއާ އޮފިޝަލް ޝިމާޒު އަލީ މިއަދު ވިދާޅުވީ، ރާއްޖެއާއި ހޮންކޮންގު މިއަދު ކުޅޭ މެޗުގެ ފޮޓޯތަށް އިންސްޓަގްރާމަށް ޕޯސްޓްކުރާ ފަރާތްތަކުގެ ތެރޭން އެންމެ ރަނގަޅު ފޮޓޯއެއް ހޮވާނީ، އެފްއޭއެމުން އެކްރެޑިޓްކޮށްފައިވާ ފޮޓޯގްރާފަރުން ނުހިމެނޭ ގޮތަށް ކަަމަށެވެ.
ޗައިނާއާ ދެކޮޅަށް އެގައުމުގައި ރާއްޖެ ކުޅޭ ވޯލްޑް ކަޕް ކޮލިފައިން މެޗު ބަލާލުމަށް އެފްއޭއެމްގެ ހަރަދުގައި މީހަކު ގެންދިއުމަށް ހުޅުވާލާފައިވާ ފުރުސަތުގައި ބައިވެރިވުމަށް، MDVHKG# ހޭޝްޓެގް ބޭނުންކުރުމަށް ފަހު maldivesFA@ ޖަހާފައި އިންސްޓަގްރާމް ކުރުމުން އެ ފުރުސަތުގައި ބައިވެރި ވެވޭނެ ކަމަށް ޝިމާޒް ވިދާޅުވި އެވެ.
"އިނާމު ހޯދުމަށް ފޮޓޯތަށް އިންސްޓަގްރާމް ކުރައްވާނީ މެޗު ކުޅެމުންދާ ގަޑީގައި. ދަނޑުމަތީގެ މަންޒަރުތަކާއި ދަނޑުން ބޭރުން ސަޕޯޓަރުންގެ ފޮޓޯތައް ވެސް ޕޯސްޓްކުރެއްވޭނެ،" އެފްއޭއެމްގެ މީޑިއާ އޮފިޝަލް ވިދާޅުވިއެވެ.
ހޮންކޮންގާ ދެކޮޅަށް ރާއްޖެ ކުޅޭ ވޯލްޑް ކަޕް ކޮލިފައިން މެޗު ފެށުމަށް ހަމަޖެހިފައި ވަނީ، މިއަދު ހަވީރު 3:50ގައެވެ.