ނޫސްވެރިންގެ ޒިންމާ ފުރިހަމަ ގޮތުގައި އަދާކުރަމުން ދަނިކޮށް އެ މީހުންގެ މަސްއޫލިއްޔަތަށް ހުރަސް އަޅަމުން ދާތީ އެކަން ކުށްވެރިކުރާ ކަމަށް މޯލްޑިވްސް މީޑިއާ ކައުންސިލު (އެމްއެމްސީ)ގެ ރައީސް މުހައްމަދު އާސިފު (މޮންދު) ވިދާޅުވެއްޖެ އެވެ.
މޮންދު "ސަން"އަށް ވިދާޅުވީ ފަހަކަށް އައިސް ނޫސްވެރިންނަށް އެ މީހުންގެ މަސްއޫލިއްޔަތު އަދާ ކުރުމަށް އުނދަގޫތަކާ ކުރިމަތިވަމުންދާ ކަމުގެ ވާހަކަތައް އަޑުއިވެމުންދާ ކަމަށެވެ. މޮންދު ވަނީ ނޫސްވެރިންގެ މަސައްކަތްތައް ހުރަސް އަޅަމުން ދާތީ އެކަމާ ކަންބޮޑުވުންފާޅު ކުރައްވާފަ އެވެ.
"ނޫސްވެރިންނަށް އެ މީހުންގެ މަސްއޫލިއްޔަތު އަދާކުރުމަށް ހުރަސް އެޅޭކަން އަޅުގަނޑު ވަރަށް ބޮޑަށް ފާހަގަކުރަން. އެކަން ހަމަ ވަރަށް ކަންބޮޑުވާ ކަމެއްގެ ގޮތުގައި ފާހަގަކުރަން. އެކަން ކުށްވެރިކުރަން،" މޮންދު ވިދާޅުވި އެވެ.
އަބްދުﷲ ގާޒީގެ ބޯޑީގާޑު ކާރަށް އަރާއިރު، މެމްބަރު އައްސަދު ފުރަގަސްދީގެން: ގްރޫޕަކުން ނޫސްވެރިންނަށް ހުރަސް އެޅުމުން، ދޫވެހިން އިސް ގާޒީ ނުކުމެވަޑައިގެންނެވި މަންޒަރެއް ނުނެގުނު-- ސަން ފޮޓޯ
މޮންދު ވިދާޅުވީ ނޫސްވެރިން މަަސްއޫލިއްޔަތުތައް އެ މީހުން އަދާ ކުރަމުން ދަނީ ކަނޑައެޅިފައިވަ އިމުގެ ތެރެއިން ކަމަށެވެ. އެހެންކަމުން އެ އިން ފަހަނައަޅާ ނޫސްވެރިން ނުދާހާ ހިނދަކު އެ މީހުންގެ މަސައްކަތްތަކަށް ހުރަސް އަޅައިގެން ނުވާނެ ކަމަށް މޮންދު ވިދާޅުވި އެވެ.
"ނަމަވެސް އެ މީހުންގެ މަގާމުގައި އެމީހުން ތިބެގެން އެކަން ކުރަން ފުރުސަތު ލިބެންޖެހޭނެ ކަމަށް އަޅުގަނޑު ގަބޫލުކުރަނީ. އެކަމަށް ހުރަސް އަޅައިގެން ނުވާނެ. ރައްޔިތުންނަށް އެ ހަބަރުތައް ފޯރުކޮށްދިނުމުގައި ނޫސްވެރިން އަބަދުވެސް މަސައްކަތް ކުރަމުން އެ ދަނީ. އެހެންވީމަ އެކަމަށް ފުރުސަތު ލިބެންޖެހޭނެ. އެކަމަށް އެއްވެސް މީހަކު ހުރަސް އަޅައިގެން ނުވާނެ. އެއީ ނޫސްވެރިކަމުގެ މިނިވަންކަމަށް އެޅޭ ހުރަހެއް،" މޮންދުގެ ވާހަކަފުޅުގައި ވިދާޅުވި އެވެ.
މޮންދު ވިދާޅުވީ ނޫސްވެރިންނަށް ދިމާވާ ކަންތައްތައް އެމްއެމްސީން ވަރަށް ކައިރިން ބަލަމުން އަންނަ ކަމަށެވެ. އަދި އެކަންކަން ހައްލު ކުރުމަށް ކަމާ ގުޅޭ މުއައްސަސާތަކާ މަސައްކަތް ކުރަމުން އަންނަ ކަމަށެވެ. އަދި ވިދާޅުވީ ނޫސްވެރިކަމުގެ މިނިވަންކަމަށްޓަކައި ކުރަން ޖެހުނު ކަމެއް ކަމާ ބެހޭ ފަރާތްތަކާ މަޝްވަރާކޮށްގެން އެމްއެމްސީން ކުރާނެ ކަމަށެވެ.
ނޫސްވެރިންގެ މަސްއޫލިއްޔަތު އަދާކުރުމަށް ހުރަސް އަޅަމުންދާތީ އެކަން އެމްއެމްސީގެ ރައީސް ކުށްވެރި ކުރައްވާ ވާހަކަފުޅު ދައްކަވާފައިވާއިރު ރައީސް އަބްދުﷲ ޔާމީންގެ ގެކޮޅުން ކްރިމިނަލް ކޯޓުގެ އިސް ގާޒީ އަބްދުﷲ މުހައްމަދު (އަބްދުﷲ ގާޒީ) ރޭ ނުކުންނެވި މަންޒަރު ފޮޓޯ ނެގުމަށް ނޫސްވެރިންނާ ފޮޓޯގްރާފަރުން އުޅުމުގެ ތެރޭގައި އެކަމަށް ގްރޫޕަކުން އައިސް ވަނީ ހުރަސް އަޅާފަ އެވެ.
އެ ގްރޫޕުން ވަނީ އެތަނުގައި ތިބި ނޫސްވެރިންނަށް އިންޒާރުދީ ބިރު ދައްކާފަ އެވެ. ކެމެރާކޮށްފިނަމަ "ފުނޑާލާނެ" ކަމަށް ބުނެ، އެ ގްރޫޕުން ނޫސްވެރިންގެ ކެމެރާތަކުގެ ކުރިމައްޗަށް އަރައި އެ މީހުންގެ މަސައްކަތަަށް ހުރަސް އަޅާފައިވެ އެވެ.