'ސައުތުއަރި މެރިން ޕްރޮޓެކްޓެޑް އޭރިޔާ' (ސަމްޕާ) ސަރަހައްދަށް ފެހުރިހި ބަލަންދާ އުޅަނދުތަކުން ޕްރޮފެލާ ގާޑު އަޅުވަން, މި މަހުގެ ނިޔަލަށް މުއްދަތު ދީފިއެވެ.
ސަމްޕާއަކީ ތިމާވެށި ރައްކާތެރިކޮށް ދެމެހެއްޓުމާބެހޭ ގާނޫނުގެ ދަށުން ހިމާޔަތްކޮށްފައިވާ ސަރަހައްދެކެވެ. އެއީ އަރި އަތޮޅު ދެކުނުބުރީގެ ރަންގަލީ ފަރުގެ ހުޅަނގު އުތުރު ކަނުން ފެށިގެން ދިގުރަށުގެ ފަރުގެ އުތުރު ކަނާ ދޭތެރޭގައިވާ ރަށްތަކުގެ ފަރުގެ ބޭރު ތޮށިން ފެށިގެން އެއް ކިލޯމީޓަރުގެ ސަރަހައްދެކެވެ.
އެ ސަރަހައްދަކީ، ގުދުރަތީ ވަސީލަތްތަކާއި ދިރުންތަކުގެ މުއްސަނދި ކަމުގެ ސަބަބުން ދުނިޔޭގެ ފެންވަރުގައި މުޅި އަހަރުތެރޭގައި ފެހުރިހި ފެންނަ ކަމަށް ފާހަގަ ކޮށްލެވޭ ސަރަހައްދެކެވެ.
ކޮންމެ މޫސުމެއްގައި ވެސް ސަމްޕާއަށް ފެހުރިހި އެއްވެ އުޅުމުގެ ސަބަބުން އެ މަންޒަރު ބެލުމަށް ދުނިޔޭގެ އެކި ހިސާބުތަކުން މީހުން ޒިޔާރަތްކުރެއެވެ. ނަމަވެސް، ޑައިވްކޮށްގެންނާއި ސްނޯކްލްކޮށްގެން ފެހުރިހި ބަލަން އުޅުމުގެ ތެރޭގައި އެ ސަރަހައްދަށް ޖަމާވާ ފެހުރިއްސަށް އުޅަނދުތަކުގެ ބުރަފަތިން ޖެހި ގެއްލުންވުމުގެ ކަންބޮޑުވުން އޮވެއެވެ.
އެހެންވެ، މިދިޔަ އަހަރުގެ ފެބްރުވަރީ މަހު އެންވަޔަރަމެންޓް މިނިސްޓްރީން ނެރުނު ޕްލޭންގައިވަނީ ފެހުރިހި ބަލަން ސަމްޕާ ސަރަހައްދަށްދާ ކޮންމެ އުޅަނދެއްގެ ބުރަފަތީގައި ގާޑު އެޅުވުން މަޖުބޫރުކޮށްފައެވެ.
މިއަދު އެންވަޔަރަމެންޓް މިނިސްޓްރީން އެކްސްގައި ކުރި ޕޯސްޓެއްގައި ވަނީ، ސަމްޕާ ސަރަހައްދަށް ވަންނަ އުޅަނދުތަކުގެ ބުރަފަތީގައި، މި މަސް ނިމުމުގެ ކުރިން ގާޑު ކުރަން ޖެހޭކަން އިއުލާންކޮށްފައެވެ.
އޭގެ ބޭނުމަކީ އުޅަނދުގެ ބުރަފަތި އެއްޗެއްގައި ޖެހޭ ހާލަތުގައި ބުރަފައްޗަށާއި ގިއާ ބޮކްސްއަށް ގެއްލުންވުން ކުޑަ ކުރުމާއި، ބުރަފަތިން މީހުންނާއި ފެހުރިހި ރައްކާތެރިކުރުންކަން މިނިސްޓްރީން ފާހަގަކޮށްފައިވެއެވެ.
އެންވަޔަރަމެންޓް މިނިސްޓްރީން އިއުލާންކޮށްފައިވާ ޕްލޭންގައި ވަނީ، ފެހުރިހި ބެލުމަށް މޫދަށް ފައިބާ ފަތުރުވެރިންނާއި ފަތުރުވެރިން އެ ސަރަހައްދަށް ގެންދާ ފަރާތްތައް ނުވަތަ 'ސަމްޕާ ގައިޑުން'ނާއި އުޅަނދުފަހަރުގެ ކެޕްޓަނުންނާއި ފަޅުވެރިން ވެސް އަމަލުކުރަންޖެހޭ އުސޫލުތައް ކަނޑައަޅާފައިވެއެވެ.
މީގެ އިތުރުން، އެ ޕްލޭންގައިވަނީ 'ސަމްޕާ' ސަރަހައްދުގައި އުޅަނދުތައް ހަރަކާތްތެރިވާއިރު، އޭގެ ބާރުމިން ބަހައްޓަންޖެހޭ މިންގަނޑު ވެސް ހިމަނައިފައެވެ. އޭގެ ތެރޭގައި، ސަމްޕާ މުޅި ސަރަހައްދުގައި އެންމެ ބާރަށް ދުއްވޭނީ ގަޑިއަކު 10 ނޮޓަށް (ގަޑިއަކު 18 ކިލޯމީޓަރަށް) ކަމަށް ބުނެފައިވެއެވެ. އަދި ފެހުރިހިފަދަ ދިރުންތައް ވަށައިގެން 250 މީޓަރު ނުވަތަ ކޮންޓެކްޓް ޒޯނުގައި އެންމެ ބާރަށް ދުއްވޭނީ ގަޑިއަކު ފަސް ނޮޓަށް (ގަަޑިއަކު ނުވަ ކިލޯމީޓަރަށް) ކަމަށް ކަނޑައަޅައިފައިވެއެވެ.