ސްރީލަންކާގެ ފަތުރުވެރިކަމުގެ ސިނާއަތަށް ތާރީޚީ ކުރިއެރުމެއް ލިބި، މިދިޔަ މެއި މަހު އެ ގައުމަށް 145،745 ފަތުރުވެރިން ޒިޔާރަތްކޮށްފިއެވެ.
ސްރީލަންކާ ޓޫރިޒަމް ޑިވެލޮޕްމަންޓް އޮތޯރިޓީ (އެސްއެލްޓީޑީއޭ) އިން އާންމުކޮށްފައިވާ އެންމެ ފަހުގެ ތަފާސްހިސާބުތަކުން ދައްކާ ގޮތުގައި، މިއީ މިހާތަނަށް މެއި މަހެއްގައި އެ ގައުމަށް އެންމެ ގިނަ އަދަދަކަށް ފަތުރުވެރިން ޒިޔާރަތްކުރި ފަހަރެވެ.
މީގެ ކުރިން މެއި މަހެއްގައި އެންމެ ގިނަ ފަތުރުވެރިން ޒިޔާރަތްކޮށްފައިވަނީ 2025 ވަނަ އަހަރުއެވެ. އެ އަހަރުގެ މެއި މަހު 132،919 ފަތުރުވެރިން ޒިޔާރަތްކޮށްފައިވާއިރު، މި އަހަރުގެ މެއި މަހުގެ އަދަދަކީ އޭގެ ކުރީ އަހަރާ އަޅާބަލާއިރު 9.6 އިންސައްތައިގެ ކުރިއެރުމެކެވެ. މިއީ އޭޕްރީލް މަހު ފަތުރުވެރިން އައި އަދަދު ދަށްވުމަށްފަހު ލިބުނު ބޮޑު ކުރިއެރުމެއްކަން ކަމާބެހޭ ފަރާތްތަކުން ފާހަގަކުރެއެވެ.
މި އަހަރުގެ މެއި މަހު ސްރީލަންކާއަށް އެންމެ ގިނަ ފަތުރުވެރިން ޒިޔާރަތްކޮށްފައިވަނީ އިންޑިއާއިންނެވެ. އެގޮތުން އިންޑިއާއިން 60،342 ފަތުރުވެރިން ޒިޔާރަތްކޮށްފައިވާއިރު، މިއީ ޖުމްލަ ފަތުރުވެރިންގެ 42 އިންސައްތައެވެ. ދެވަނައަށް އެންމެ ގިނަ ފަތުރުވެރިން އައިސްފައިވަނީ އިނގިރޭސިވިލާތުންނެވެ. އެ ގައުމުން 9،248 ފަތުރުވެރިން ޒިޔާރަތްކުރިއެވެ. މީގެ އިތުރުން ޗައިނާއިން 9،156 ފަތުރުވެރިން، ޖަރުމަނުވިލާތުން 6،734 ފަތުރުވެރިން އަދި އޮސްޓްރޭލިއާއިން 6،414 ފަތުރުވެރިން ވަނީ ސްރީލަންކާއަށް ޒިޔާރަތްކޮށްފައެވެ.
މެދުއިރުމަތީގެ ހަމަނުޖެހުންތަކާ ގުޅިގެން ދަތުރުފަތުރުގެ އަގުތައް އުފުލިފައިވީ ނަމަވެސް، އޭޝިއާ އަދި ޔޫރަޕްގެ މާކެޓުތަކުން ސްރީލަންކާއަށް އޮންނަ ތަރުހީބު ދަނީ އިތުރުވަމުންނެވެ.
މި ކާމިޔާބީއާ ގުޅިގެން ސްރީލަންކާގެ ފޮރިން މިނިސްޓަރު ވިޖިތަ ހެރަތު ވިދާޅުވި ގޮތުގައި، މިއީ އެ ގައުމުގެ ފަތުރުވެރިކަމުގެ ސިނާއަތަށް އައި ވަރަށް ބޮޑު ބަދަލެކެވެ. ސޯޝަލް މީޑިއާގައި އާންމުކުރެއްވި ބަޔާނެއްގައި އޭނާ ފާހަގަކުރެއްވި ގޮތުގައި، ކޮވިޑްގެ ބަލިމަޑުކަމުގެ ތެރޭގައި 2021 ވަނަ އަހަރުގެ މެއި މަހު އެ ގައުމަށް ޒިޔާރަތްކުރީ އެންމެ 1،497 ފަތުރުވެރިންނެވެ. ނަމަވެސް މިއަދު އެ އަދަދު 150،000 އާ ގާތްކޮށްފައިވުމަކީ ގައުމުގައި ގާއިމުވެފައިވާ ހަމަޖެހުމާއި، ސަލާމަތާއި ރައްކާތެރިކަމުގެ އިތުރުން ހަރުދަނާ ސިޔާސަތުތަކުގެ ނަތީޖާ ކަމަށް މިނިސްޓަރު ވިދާޅުވިއެވެ. އަދި ސްރީލަންކާ ޚިޔާރުކުރި ހުރިހާ ފަތުރުވެރިންނަށް އޭނާ ވަނީ ޝުކުރު އަދާކުރައްވާފައެވެ.
ފަތުރުވެރިކަމުގެ ސިނާއަތަކީ ސްރީލަންކާއަށް ބޭރު ފައިސާ ހޯދައިދިނުމުގައި އެންމެ މުހިންމު އެއް ދާއިރާއެވެ. ރެކޯޑު އަދަދަކަށް ފަތުރުވެރިން ޒިޔާރަތްކުރި ނަމަވެސް، މި އަހަރުގެ ފުރަތަމަ ހަތަރު މަސްދުވަހު ފަތުރުވެރިކަމުން ލިބުނު އާމްދަނީ ވަނީ އޭގެ ކުރީ އަހަރާ އަޅާބަލާއިރު 19.4 އިންސައްތަ ދަށްވެފައެވެ. ސްރީލަންކާ ސަރުކާރުން ވަނީ 2026 ވަނަ އަހަރުގެ ނިޔަލަށް ތިން މިލިއަން ފަތުރުވެރިން ގެނައުމުގެ އަމާޒެއް ކަނޑައަޅާފައެވެ. އެސްއެލްޓީޑީއޭގެ ތަފާސްހިސާބުތައް ދައްކާ ގޮތުން، މި އަހަރުގެ ޖެނުއަރީ މަހުން ފެށިގެން މެއި މަހުގެ ނިޔަލަށް ޖުމްލަ 1،022،022 ފަތުރުވެރިން ވަނީ އެ ގައުމަށް ޒިޔާރަތްކޮށްފައެވެ.
ސްރީލަންކާއާ ހިލާފަށް ރާއްޖެއަކީ ވަރަށް މަތީ ފެންވަރުގެ ފަތުރުވެރިކަމެއް އޮންނަ ގައުމަކަށް ވާނީ ހަނގުރާމައިގެ ސަބަބުން ފަތުރުވެރިން ރާއްޖެ އަންނަ އަދަދު ވަނީ ވަރަށް ބޮޑަށް ދަށް ވެފައެވެ. ނަމަވެސް މި ފަހުން ބައެއް ހަފުތާތަކުގައި އަދަދުތައް ދަނީ އިތުރުވަމުންނެވެ. ރާއްޖެއަށް ފަތުރުވެރިން ގެނެވޭ މިންވަރު ދަށްވާ މައިގަނޑު ސަބަބަކީ މެދުއިރުމަތީގެ އެއާޕޯޓްތައް ބަންދު ވުމެވެ.