ޖާހް އިންވެސްޓްމަންޓް ޕްރައިވެޓް ލިމިޓެޑުން ހުޅުމާލޭގައި ތަރައްގީ ކުރަން ފެށި 'ދަ ގާޑްންސް' ފްލެޓުތަކުގެ މަސައްކަތް އަދިވެސް ނިންމާފައި ނުވުމުގެ ސަބަބުން ފްލެޓުތައް އަތުލާނެ ކަމުގެ އިންޒާރާއެކު ހައުސިން ޑިވަލޮޕްމަންޓް ކޯޕަރޭޝަން (އެޗްޑީސީ)ން އެ ކުންފުންޏަށް ފަހު ނޯޓިސް ދީފިއެވެ.
ޖާހު ކުންފުނިން ހުޅުމާލޭގައި 'ދަ ގާޑްންސް' ފްލެޓުތައް ތަރައްގީކުރަން ފެށީ 2017 ވަނަ އަހަރުއެވެ. ނަމަވެސް އަދި އަދަށްވެސް، އެ މަސައްކަތް ނިންމާފައެއް ނުވެއެވެ. އަދި އެ ފްލެޓުތަކަށް ފައިސާ ދެއްކި މީހުންނަށް ފްލެޓު ހަވާލުނުކޮށް ގިނަ ދުވަސްވުމާއެކު އެ މީހުންނަށް ވަނީ ބޮޑެތި ގެއްލުންތަކެއް ވެސް ވެފައެވެ.
އެޗްޑީސީން ނެރުނު ބަޔާނުގައި ބުނީ 'ދަ ގާޑަންސް' ޕްރޮޖެކްޓް ނިންމުމަށްޓަކައި އެކި ފަހަރު މަތިން ޖާހު ކުންފުންނަށް މުއްދަތު އިތުރުކޮށްދީފައިވާނެ ކަމަށެވެ.
ނަމަވެސް އަދާ ހަމައަށް ވެސް އެ ކުންފުނީގެ ފަރާތުން އެ ޕްރޮޖެކްޓް ނިންމާފައި ނުވުމުގެ ސަބަބުން، އެޗްޑީސީއާއި ޖާހު ކުންފުންޏާ ދެމެދު ސޮއިކުރެވިފައިވާ އެއްބަސްވުން ބާތިލުކުރުމުގެ އެންމެ ފަހު މަރުހަލާގެ ދަށުން ދެވޭ ގާނޫނީ ނޯޓިސް ދިނުމަށް، އެޗްޑީސީގެ ބޯޑުން ނިންމާފައިވާނެ ކަމަށެވެ. އަދި އެ ނޯޓިސް ވަނީ މިއަދު ޖާހު ކުންފުންޏަށް ފޮނުވާފައި ކަމަށް ވެސް އެޗްޑީސީން ބުންޏެވެ.
ޖާހު ކުންފުނިން ހުޅުމާލޭގައި އަޅާ 'ދަ ގާޑްންސް' ފްލެޓުތަކުގެ ޑިޒައިން: އަތުލާނެކަމުގެ އިންޒާރާއެކު ފުލެޓުތައް ނިންމަން ޖާހު ކުންފުންޏަށް ފަހު ފުރުސަތު އެޗްޑީސީން ވަނީ ދީފައި -- ފޮޓޯ/ ޖާހު
އެ ނޯޓިސްގައި ބަޔާންކުރާ މުއްދަތު ކަމަށްވާ 45 ދުވަހުގެ ތެރޭގައި ޖާހު ކުންފުނީގެ ފަރާތުން އެ ޕްރޮޖެކްޓްގެ ނުނިމި ހުރި މަސައްކަތްތައް ނުނިންމާ ހާލަތުގައި، އެ އެއްބަސްވުން ބާތިލުކޮށް އެ ޕްރޮޖެކްޓް ޖާހު ކުންފުނީގެ އަތުން ނެގުމަށް ވެސް އެޗްޑީސީގެ ނިންމާފައިވާނެ ކަމަށް ބުންޏެވެ.
އަދި އެ ފިޔަވަޅު އަޅާފައި ވަނީ ޖާހު ކުންފުނިން އެޕާޓްމަންޓް ގަތުމަށް ފައިސާ ދައްކާފައިވާ ފަރާތްތަކަށް، ވީ އެންމެ އަވަސް މުއްދަތެއްގައި، އެޕާޓްމަންޓްތައް ހަވާލުކުރެވޭނެ މަގު ފަހި ކުރުމުގެ ބޭނުމުގައިކަމަށް ވެސް އެޗްޑީސީން ބުންޏެވެ.
ޖާހު ކުންފުނިން ފްލެޓުތައް ނުނިންމައި ގިނަ ދުވަސްވެފައިވާ މައްސަލަ ބޮޑުވެފައިވާއިރު، ފްލެޓުތަކަށް ފައިސާ ދެއްކި މީހުންނަށް ފްލެޓު ހަވާލުނުކޮށް ގިނަ ދުވަސްވާ މައްސަލައިގައި ގެއްލުންވީ ރައްޔިތުންނަށް ބަދަލުދޭން އެދި ޖެނުއަރީ 19ގައި ވަނީ ރައީސް އޮފީހަށް ސިޓީއެއް ވެސް ލައިފައެވެ.
ކޮންސްޓްރަކްޝަން ދާއިރާގައި ނަން ހިނގާ ޖައުސާ ކުންފުންޏާ އެއް ކުޑައިގެ ދަށުގައި އޮންނަ ޖާހު އިންވެސްޓްމެންޓްސަށް އެ ބިން ހަވާލުކޮށްފައިވަނީ 2017ވަނަ އަހަރުގެ ތެރޭގައި، ދެއަހަރު ތެރޭ ނިންމާ ގޮތަށެވެ. ނަމަވެސް، މިހާތަނަށް ވެސް އެތަން ނިމިފައި ނުވެއެވެ.
އޭގެ ފަހުން އެ މަސައްކަތް ނުނިމި ދިގުލައިގެން ދިއުމުގެ ސަބަބުން، ފުލެޓު ގަތް މީހުން ވަނީ އެކި ފަހަރު މަތިން މުޒާހަރާ ވެސް ކޮށްފައެވެ. އަދި އެ މަސައްކަތުގައި އުޅޭ ލޭބަރުން ވެސް އެކި މައްސަލަތަކުގައި ދޭތެރެއަކުން އިހުތިޖާޖު ކުރެއެވެ.