ޖާހް އިންވެސްޓްމަންޓް ޕްރައިވެޓް ލިމިޓެޑުން ހުޅުމާލޭގައި ތަރައްގީ ކުރަން ފެށި ދަ ގާޑްންސް ފްލެޓުތަކަށް ފައިސާ ދެއްކި މީހުންނަށް ފްލެޓު ހަވާލުނުކޮށް ގިނަ ދުވަސްވާ މައްސަލައިގައި ގެއްލުންވީ ރައްޔިތުންނަށް ބަދަލުދޭން އެދި ރައީސް އޮފީހަށް ސިޓީއެއް ލައިފިއެވެ.
ރާއްޖޭގެ ލޯ ފާމެއް ކަމަށްވާ ޝުނާނާ އެންޑް ކޯއިންވަނީ ރައީސް މުއިއްޒަށް ސިޓީއެއް ލިޔެ، އެ އޮފީހަށް މިއަދު ހުށަހަަޅައިފައެވެ. އެ ސިޓީގައިވަނީ ފައިސާ ދެއްކި ރައްޔިތުންނަށް ފްލެޓު ނުލިބި ލަސްވަމުންދަނީ އެޗްޑީސީގެ އިހުމާލުންކަމަށް ބުނެފައެވެ.
އެޗްޑީސީން ހައުސިން ޕްރޮޖެކްޓުތައް ހަވާލުކޮށްފައިވާ ކުންފުނިތަކާ ވެފައިވާ އެއްބަސްވުންތަކުގައި ބުނާ ވަގުތަށް ފްލެޓުތައް ނުނިންމައިފިނަމަ، އެއްބަސްވުން ބާތިލްކޮށް އެހެން ކުންފުންޏަކާ މަޝްރޫއު ހަވާލު ކުރެވޭނެ ކަމަށް އެއްބަސްވުންތަކުގައި ބުނާކަމަށް ޝުނާނާގެ ލޯފާމުން ބުންޏެވެ.
ނަމަވެސް އެއާ ޚިލާފަށް އެއްބަސްވުން ބާތިލް ކުރުމެއް ނެތި ތަކުރާރުކޮށް ބައެއް އެއްބަސްވުންތަކުގެ މުއްދަތު އިތުރުކުރަމުން ގޮސް ހަތް އަހަރުވާން ގާތްވާއިރު ވެސް ހަމަ އެ ގޮތަށް ކަންކުރަމުންދާ ކަމަށް އެ ސިޓީގައި ވަނީ ބުނެފައެވެ.
މީގެ ސަބަބުން ފްލެޓުތަކަށް ފައިސާ ދެއްކި ރައްޔިތުންނަށް އެ ތަންތަނުން ބޯހިޔާވަހިކަން ނުލިބި، އެތައް އަހަރެއްވަންދެން ފްލެޓު ގަންނަން ނެގި ލޯނާއި، ދިރިއުޅޭ ތަނުގެ ކުލި ދައްކަންޖެހި، ބޮޑެތި މާލީ ގެއްލުންތަކެއް ލިބެމުންދާކަން ވަނީ ފާހަގަކޮށްފައެވެ.
މި ކަމުގައި އެޗްޑީސީން އެކަށީގެންވާ ފިޔަވަޅު ނާޅާ ކަމަށާއި، އެ ކުންފުންޏަށް މަތިކޮށްފައިވާ ޒިންމާއާ ޚިލާފުވެފައިވާ ކަމަށް އެ ސިޓީގައި ވަނީ ބުނެފައެވެ.
އެ ގޮތުން ފްލެޓު އަޅަން ދީފައިވާ ބިންތައް ކުންފުނިތަކުން އަމިއްލަ ބޭނުމަށް ބޭނުންކުރަމުން ދިއުމުގެ އިތުރުން، އެޗްޑީސީއާ ދެމެދު ވެފައިވާ އެއްބަސްވުންތަކާ ޚިލާފަށް، ރައްޔިތުންގެ ފައިސާއަށް ޚިޔާނާތްތެރިވެ، އެ ފައިސާއިން ނުހައްގު ގޮތުގައި މުއްސަނދިވެ، ނާޖާއިޒު ފައިދާ ނެގުމަށް މަގުފަހިކޮށްދީފައިވަނީ އެޗްޑީސީން އަމަލުކުރަމުން ދިޔަ ގޮތުގެ ސަބަބުން ކަމަށް ވަނީ ތުހުމަތުކޮށްފައެވެ.
މި ކަމުގެ ސަބަބުން ފްލެޓުތަކަށް ފައިސާ ދެއްކި ރައްޔިތުންގެ އިތުރުން، ދައުލަތަށް ވެސް ގެއްލުންވަމުންދާކަން އެ ސިޓީގައި ފާހަގަކޮށްފައި އޮތެވެ.
ފްލެޓު އަޅަން ހަވާލުކޮށްފައިވާ ޖާހް އިންވެސްޓްމެންޓާމެދު އެޗްޑީސީން އަމަލުކޮށްފައިވަނީ އެ ފަދައިން ކަމަށް އެ ސިޓީގައިވެއެވެ.
އެ ކުންފުނިން ރައްޔިތުންގެ އަތުން ބޮޑެތި އަދަދުތަކުން ފައިސާ ނަގައި، އެހެނިހެން ކަންކަމަށް އެ ފައިސާ ބޭނުން ކޮށްފައިވުމުގެ ސަބަބުން ކުންފުނީގެ ބިދޭސީ މުވައްޒަފުންނަށް މުސާރަ ނުދެވި، މަސައްކަތް ހުއްޓާލައި، މުޒާހަރާކޮށްފައިވާއިރު ވެސް އެޗްޑީސީން ފިޔަވަޅެއް އަޅާފައިނުވާކަން ސިޓީގައި ފާހަގަކޮށްފައި އޮތެވެ.
އަދި ޖާހް އިންވެސްޓްމެންޓާ މެދު އެޗްޑީސީން އެ ގޮތަށް އަމަލުކުރުމުގެ ސަބަބުން ވަމުންދާ ގެއްލުންތައް ކަމާބެހޭ މުއައްސަސާތަކަށް ހުށަހަޅާފައިވީތާ ދެ އަހަރު ދުވަސް ވެފައިވީއިރު ވެސް ހައްލެއް ލިބިފައި ނުވާ ކަމަށް ވަނީ ފާހަގަކޮށްފައެވެ. މި މައްސަލަ ރައީސްގެ ސަމާލުކަމަށް ގެނައީ އެހެންވެގެން ކަމަށް އެ ސިޓީގައި އޮތެވެ.
އެ ގޮތުން ފްލެޓު ގަތުމަށް ފައިސާ ދައްކާފައިވާ ފަރާތްތަކުގެ ހައްގުތައް ހިމާޔަތްކޮށްދިނުމުގެ ގޮތުން، ފްލެޓުތައް ނިންމޭނެ ގޮތަކާއި ގެއްލުމުގެ ބަދަލު ލިބޭނެ ގޮތް ހޯއްދަވައިދެއްވުމަށް އެދި ރައީސަށް ވަނީ ދަންނަވައިފައެވެ.