ހުޅުމާލޭގައި ރޭ ހިނގި އަލިފާނުގެ ހާދިސާއެއްގައި ކުޑަކުއްޖަކު ފިހިއްޖެއެވެ.
ހުޅުމާލޭ ހޮސްޕިޓަލްގެ މީޑިއާ އޮފިޝަލް 'ސަން'އަށް ވިދާޅުވީ، ހުޅުމާލޭގައި ހިނގި އަލިފާނުގެ ހާދިސާއެއްގައި 13 އަހަރުގެ ފިރިހެން ކުއްޖަކު ފިހިގެން ރޭގައި ގެނައި ކަމަށެވެ.
މި ހާދިސާގައި ކުއްޖާގެ ހަށިގަނޑަށް ސީރިއަސް ގެއްލުންތަކެއް ލިބިފައި ނެތް ކަމަށާއި ކޮންމެވެސް ވަރަކަށް ހަށިގަނޑުގެ ތަންތަން ފިހިފައި ހުރި ކަމަށް އޮފިޝަލް ވިދާޅުވިއެވެ.
"ސީރިއަސް އެއްވެސް ކަހަލަ އަނެއްހެން މޭޖާ ބާނިންއެއް ނެތޭ. ފިހިގެން ގެނައި ކޭސްއެއް. އަޅުގަނޑަކަށް [ހަށިގަނޑުން ފިހުނު] ޕަސެންޓޭޖެއް ދަންވަކާށް ނޭނގޭ،" އޮފިޝަލް ވިދާޅުވިއެވެ.
ފިހިގެން ގެންނަ ކޭސްތައް އަވަހަށް ޑިސްޗާޖު ނުކުރާނެކަން ފާހަގަކުރައްވައި އޭނާ ވިދާޅުވީ، އެ ޕޭޝަންޓު ހޮސްޕިޓަލުގައި އެޑްމިޓުކޮށްފައި އޮތް ކަމަށެވެ.
މި ހާދިސާއާ ގުޅިގެން ސުވާލުކުރުމުން އެމްއެމްޑީއެފުން ބުނީ، ހުޅުމާލޭގައި ރޭ އަލިފާނުގެ ހާދިސާއެއް ހިނގިކަމުގެ ރިޕޯޓެއް ލިބިފައި ނެތް ކަމަށެވެ. އެހެންވެ، ހާދިސާ ހިނގަން މެދުވެރިވި ސަބަބު އެނގިފައެއް ނުވެއެވެ.