އޮޅުވާލައިގެން ޕީއެންސީއަށް މީހުން ވެއްދި މައްސަލައިގައި އެމްޑީޕީއަށް ނިސްބަތްވާ 3،000އަށްވުރެ ގިނަ މީހުންގެ ފަރާތުން ޝަކުވާ ލިބިފައިވާކަމަށް އެމްޑީޕީން މިއަދު ބުނެފިއެވެ.
އެމްޑީޕީގެ ގާނޫނީ ޓީމުން މިއަދު ބޭއްވި ނޫސްވެރިންގެ ބައްދަލުވުމުގައި، އެ ކޮމިޓީގެ މެންބަރު އިބްރާހީމް ޝިޔާމް ވިދާޅުވީ، ޝަކުވާ އައިސްފައި ހުރީ އެ ފޯމުތަކުގައި ކުރީގެ އައިޑީކާޑުގެ ފޮޓޯ ބޭނުންކޮށްފައި ހުރި ކަމަށާއި ފިންގަޕްރިންޓާއި ސޮއި ފޯޖު ކޮށްފައި ހުރި ކަމަށް ބުނެ ކަމަށެވެ.
މި ކަމަކީ ޕާޓީއަކުން އެކަނި ކުރެވޭނެ ކަމެއް ނޫން ކަމަށާއި މިއީ ސަރުކާރުގެ އިދާރާތަކުން ރާވައިގެން ހިންގާފައި އޮތް ޖަރީމާއެއް ކަމަށް ފާހަގަކުރެވޭ ކަމަށް ޝިޔާމް ތުހުމަތު ކުރެއްވިއެވެ.
މިއީ އިދާރީ ގޮތުން އެޅިފައި އޮތް ގޯހެއް ނޫން. ނުނީ މިއީ އިދާރީ މިސްޓޭކެއް ނޫން، ނޫނީ ނޭނގިގެން ކޮށްގެން އުޅޭ ކަމެއް ނޫންކަން އަޅުގަނޑު ފާހަގަކުރަން، މިއީ ކަނޑައެޅިގެން އިނގިގެން ރާވައިގެން، އިންތިޒާމުކޮށްގެން އަދި މީގެތެރޭގައި ޕީއެންސީއާ ސަރުކާރުގެ އިދާރާތައް ބައިވެރިވެގެން އިންތިޒާމުވެގެން ކޮށްފައި އޮތް ކަމެއް ކަމަށް އަޅުގަނޑަށް އެބަ ފާހަގަވޭ މި ހުށަހަޅާފައި ހުރި ޝަކުވާތަކަށް ބަލާއިރު އިބްރާހީމް ޝިޔާމް
އިބްރާހީމް ޝިޔާމް ------
މި މައްސަލާގައި ސަރުކާރު ޝާމިލްވާ ކަމަށް ތުހުމަތުކުރަނީ، ޕްރޮސެކިއުޓާ ޖެނެރަލް އައްބާސް ޝަރީފާއި އޭޓާނީ ޖެނެރަލްގެ އޮފީހުން މިކަމުގައި ފިޔަވަޅެއް އަޅާފައި ނުވާތީ ކަމަށާއި އެއީ އެޕާޓީން ވަރަށް ކަންބޮޑުވާ ކަމެއް ކަން ޝިޔާމް ވަނީ ފާހަގަކުރައްވާފައެވެ.
މި ބައްދަލުވުމުގައި ވަކީލު އައިކް އަހުމަދު އީސާ ވިދާޅުވީ، ދައުލަތުގެ އިދާރާއެއްގެ އެއްވެސް ވަސީލަތެއް ސިޔާސީ ކަމަކަށް ބޭނުންކޮށްފައި ހުރުމަކީ ސީދާ ކޮރަޕްޝަންގެ އަމަލެއް ކަމަށެވެ.
އެގޮތުން، ހޯމް މިނިސްޓްރީގެ ވަސީލަތްތަކެއް ބޭނުންކޮށްގެން ޕީއެންސީގެ ފޯމުތައް ފުރާފައި ހުރީ ކިހިނެތްތޯ އެންޓި ކޮރަޕްޝަން ކޮމިޝަން (އޭސީސީ)އާއި ފުލުހުން ތަހުގީގު ކުރަން ޖެހޭކަން އައިކު ފާހަގަކުރެއްވިއެވެ.
މިވަރުގެ ބޮޑު މައްސަލައެއްގެ ޖިނާއީ ތަހުގީގެއް ކުރެވޭއިރު، ތަހުގީގު ކުރަން އޮންނަ އިދާރާގެ ބެލެނިވެރި ފަރާތް އިސްކޮށް ހުރެ އެކަން ކުރުމަކީ އެއްވެސް ވަރަކަށް ބަލައިގަންނާނެ ކަމެއް ނޫން ކަމަށް އައިކު ވަނީ ވިދާޅުވެފައެވެ.
"މި ތަހުގީގުގެ ތެދުވެރިކަމާ މެދު ސުވާލު އުފޭދެކަމެއް މީ ހޯމް މިނިސްޓަރު ކަމުގައި އިހުސާން ހުންނަވައި، މި ތަހުގީގު ކުރިއަށް ގެންދެވުމަކީ. އެހެންކަމުން މިކަމުގެ އިންޓެގްރިޓީ ހިފެހެއްޓުމަށް ވެސް ވަގުތީ ގޮތުން ނަމަވެސް އަޅުގަނޑުމެން ގޮވާލަން ރައީސުލްޖުމްހޫރިއްޔާ ކުރައްވަން ޖެހޭ ކަމެއް އެއީ ހޯމް މިނިސްޓަރު އަލީ އިހުސާން އިހުސާން މަގާމުން ދުރުކުރެއްވުމަށް" އައިކު ވިދާޅުވިއެވެ.
އޭގެއިތުރުން، މިކަމުގައި ހޯމް މިނިސްޓަރު އަލީ އިހުސާން އަމިއްލަފުޅަށް އިސްތިއުފާ ދެއްވަން ޖެހޭ ކަމަށް ނުވަތަ މިނިސްޓަރު އެ މަގާމުން ވަކި ކުރަން ޖެހޭ ކަމަށް އެޕާޓިން ގަބޫލުކުރާ ކަމަށް އައިކު ވިދާޅުވިއެވެ.
އެމްޑީޕީ ތަމްސީލުކުރާ 12 މެންބަރުގެ ސޮޔާ އެއްކޮށް، އިހުސާންގެ އިތުބާރު ނެތް މައްސަލަ މިދިޔަ ހުކުރު ދުވަހު ވަނި މަޖިލީހަށް ވައްދައިފައެވެ.