ވެރިކަން ކުރާ ޕާޓީ، ޕީއެންސީއަށް އެކި ޕާޓީތަކުން ވަގަށް މެންބަރުން ވައްދާކަމަށް އިދިކޮޅު އެމްޑީޕީން ކުރި ތުހުމަތުތަކަކީ 100 ޕަސެންޓު ދޮގެއް ކަމަށް ޕީއެންސީގެ ޑެޕިއުޓީ ޕީޖީ ލީޑަރު މުޙައްމަދު އިސްމާއީލް މިއަދު ވިދާޅުވެއްޖެއެވެ.
އެމްޑީޕީން އިއްޔެ ނެރުނު ބަޔާނެއްގައިވަނީ، ޕީއެންސީއަށް ވަނުމަށް ފޯމު ފުރާފައިނުވާ އެ ޕާޓީގެ ބައެއް އާންމު މެންބަރުންނާއި ގައުމީ މަޖިލީހުގެ މެންބަރުން ވެސް އެމްޑީޕީގެ ދަފުތަރުން އުނިކޮށް، ޕީއެންސީގެ ހިމަނާފައިވާ ކަމަށް ބުނެފައެވެ.
އެ ޕާޓީން ވަނީ، ޕީއެންސީއަށް އެއް ލައްކަ މެންބަރުން ހަމަކުރަން ކަމަށް ބުނެ، މީހުންގެ ސޮއި ފޯޖުކޮށްގެން ފޯމު ހުށަހަޅާ ކަމަށާއި ދައުލަތުގެ ހުރިހާ އިދާރާއަކަށް ނުފޫޒު ފޯރުވައި އެކަން ފޮރުވުމަށް ސަރުކާރުން މަސައްކަތް ކުރާ ކަމަށް ވެސް ތުހުމަތުކޮށްފައެވެ.
އަދި އެ މައްސަލަތައް ބަލައިދިނުމަށް އިލެކްޝަންސް ކޮމިޝަނަށް ރަސްމީކޮށް އެ ޕާޓީގެ ފަރާތުން ހުށަހަޅާނެ ވާހަކަ ބުނެފައިވެއެވެ.
މީގެ އިތުރުން ސަގާފަތާ ބެހޭ މިނިސްޓްރީގެ ކުރީގެ ސްޓޭޓު މިނިސްޓަރު މުހައްމަދު ތާރިގު (މަނަދޫ ތާރިގު) އޭނާއަށް ނޭނގި ޕީއެންސީއަށް ވެއްދީކަމަށް ބުނެ އެ މައްސަލަ ވަނީ ފުލުހަށް ހުށަހަޅައިފައެވެ.
އެކަމާ ގުޅިގެން ޕީއެންސީގެ ޕީޖީ ގްރޫޕުގެ ޑެޕިއުޓީ ލީޑަރު އަދި ވިލިމާލެ ދާއިރާގެ މެންބަރު މުހައްމަދު އެކްސްގައި ކުރެއްވި ޕޯސްޓެއްގައި ވަނީ އެ ތުހުމަތުތައް ދޮގުކުރައްވައިފައެވެ.
އޭނާ ވިދާޅުވީ ޕީއެންސީއަށް މެންބަރުން އިތުރުކުރުމުގެ މަސައްކަތް ކުރިއަށްދަނީ ސީދާ އޭނާގެ ބެއްލެވުމުގެ ދަށުން ކަމަށް ވިދާޅުވެފައެވެ. އެގޮތުން ފޯމް ފުރައިފައި ހުންނާނީ ވެސް އާންމު މީހާ ގާތަށް ގޮސްގެން ކަމަށް މުޙައްމަދު ވިދާޅުވިއެވެ.
އެއާއެކު އޭނާ ވިދާޅުވީ އެ މައްސަަލައިގައި ފުލުހަށް ޖަވާބުދާރީ ވާން ޖެހުނަސް އެކަން ކުރައްވާނެކަމަށް ވިދާޅުވެފައެވެ. އަދި ޕީއެންސީއަށް މެންބަރުން އިތުރުކުރުމުގެ ހަރަކާތްތައް މުޅި ރާއްޖޭގައި ކުރިއަށްދާތާ 11 މަސް ވީއިރު، ރައްޔިތުންގެ ތަރުހީބު ލިބެމުން އަންނަކަމަށް ވެސް އޭނާ ވިދާޅުވިއެވެ.
މިދިޔަ ނޮވެމްބަރު މަހު ޕީއެންސީން ވަނީ އެ ޕާޓީއަށް އެހާތަނަށް 97،000 ފޯމު ލިބިފައިވާ ކަމަށާއި އެއް ލައްކަ ހަމަކުރާ ފުރަތަމަ ޕާޓީއަކަށް އެ ޕާޓީ ވާނެ ކަމަށް ބުނެފައެވެ.
އިލެކްޝަންސް ކޮމިޝަންގެ ދަފުތަރުން ދައްކާ ގޮތުގައި މެންބަރުން އެންމެ ގިނަ ޕާޓީއަކީ އަދިވެސް އެމްޑީޕީއެވެ. އެގޮތުން، ސެޕްޓެމަބަރު 19އާ ހަމައަށް އެ ޕާޓީގައި ތިބި މީހުންގެ އަދަދު 50،851އަށް އަރާއިރު، އެ ތާރީޚަށް ޕީއެންސީގައި ތިބީ 28،983 މެންބަރުންނެވެ.