މީހުންނަށް ނޭނގި ވަގު ފޯމު ފުރައިގެން ސިޔާސީ ޕާޓީތަކަށް ވައްދާ މައްސަލައިގެ ޝަކުވާ ބޮޑުވެ، އީފާސް މެދުވެރިކޮށް އޮންލައިންކޮށް ޕާޓީތަކަށް މީހުން ވައްދާ ގޮތަށް އުސޫލު ބަދަލުކުރުމަށް މަސައްކަތްކުރަމުން އަންނަ ކަމަށް އިލެކްޝަންސް ކޮމިޝަން (އީސީ)ން މިއަދު ބުނެފިއެވެ.
އީސީގެ މެންބަރު ހަސަން ޒަކަރިއްޔާ "ސަން"އަށް ވިދާޅުވީ، ޕާޓީތަކަށް މީހުން ވެއްދުމުގައި ވަގު ފޯމު ހުށަހަޅާ މައްސަލަތައް ބޮޑުވެ، މިދިޔަ އަހަރުގެ ފަހު ދެ ކުއާޓަރުން ފެށިގެން މިދިޔަ ހަފުތާގެ ނިޔަލަށް ވެސް 300 އަށްވުރެ ގިނަ ޝަކުވާ އާންމު ރައްޔިތުންގެ ފާރާތުން އެ ކޮމިޝަނަށް ހުށަހަޅާފައި އެބައޮތް ކަމަށެވެ.
އެ މައްސަލަތައް ފެންނަނީ ވަކި ޕާޓީއެއްގެ ފަރާތުން ނޫން ކަމަށާއި، ގިނަ ޕާޓީތަކަކަށް ވަގު ފޯމު ފުރައިގެން މީހުން ވައްދާ މައްސަލަ ފެންމަތިވެފައިވާ ކަމަށް ހަސަން ވިދާޅުވިއެވެ.
އެފަދަ ބައެއް މައްސަލަތައް ފުލުހަށް ވެސް ހުށަހަޅާފައިވާ ކަމަށް ހަސަން ވިދާޅުވިއެވެ.
އެހެންކަމުން އެކަން ހައްލުކުރުމަށް އެ ކޮމިޝަނުން މިހާރު މަސައްކަތްތަކެއް ކުރަމުން އަންނަ ކަމަށް ހަސަން ވިދާޅުވިއެވެ. އީސީން މަސައްކަތްކުރަމުންދަނީ ކުރިއަށް އޮތް ދެ މަސް ތެރޭ އުސޫލަށް ބަދަލުގެނެސް އީފާސް މެދުވެރިކޮށް ޕާޓީއަށް ވައްދާ ގޮތަށް ބަދަލު ގެނައުމަށް ކަމަށް އޭނާ ވިދާޅުވިއެވެ. ހަސަން ވިދާޅުވީ، ގާނޫނާއި ގަވާއިދަށް ބަދަލު ގެނައުމަށް ވަގުތުކޮޅެއް ނެގި ނަމަވެސް އެ ކޮމިޝަނުން މަސައްކަތްކުރަނީ ވީހާވެސް އަވަހަށް އެކަން ކުރުން ކަމަށެވެ.
ވަގަށް ސިޔާސީ ޕާޓީތަކަށް މީހުން ވައްދާ މައްސަލަ ސަމާލުކަމަށް އައީ މީގެ ދުވަސްތަކެއް ކުރިންނެވެ. އެ ކަމާ ގުޅިގެން އީސީންވަނީ އެ މައްސަލަ ހައްލު ކުރުމަށް ފިޔަވަޅުތަކެއް އަޅައިފައެވެ. އޭގެ ތެރޭގައި ސިޔާސީ ޕާޓީއެއްގެ މެންބަރެއްތޯ އެސްއެމްއެސްގެ މެދުވެރިކޮށް ބެލޭނެ ގޮތް ހެދުން ހިމެނެއެވެ.
ޕީއެންސީއަށް ވަގަށް މެންބަރުން އިތުރުކުރާ ކަމަށް ބުނެ މިފަހުން މައްސަލަތަކެއް ފެންމަތިވެފައިވާއިރު އެމްޑީޕީ އުފެއްދީންސުރެ އެ ޕާޓީގައި އިސްކޮށް މަސައްކަތް ކުރައްވަމުން އަންނަ, ރައްޔިތުންގެ މަޖިލީހުގެ މަނަދޫ ދާއިރާގެ ކުރީގެ މެންބަރު މުހައްމަދު ތޯރިގު, އޮޅުވާލައިގެން ސަރުކާރު ހިންގާ ޕީއެންސީއަށް ވައްދާފައިވާ ކަމަށް ވިދާޅުވެ, އެ މައްސަލަ އޭނާ ވަނީ ފުލުހަށް ވެސް ހުށަހަޅައިފައެވެ.
ޕީއެންސީން އެއް އަހަރު ތެރޭ އެހާ ގިނަ އަދަދަކަށް މެންބަރުން އިތުރުކޮށްފައިވާއިރު، މިދިޔަ އަހަރު ރައީސް ވެރިކަމަށް ވަޑައިގެންނެވިއިރު އެ ޕާޓީގައި ތިބީ ގާތްގަނޑަކަށް 3،000 މެންބަރުންނެވެ.
ސަރުކާރު ހިންގާ ޕީއެންސީއަށް 100،000 މެންބަރުން ހަމަކުރުމުގެ ވިސްނުން ގެންގުޅޭކަމަށް އެ ޕާޓީން މީގެ ކުރިން ބުނެފައިވެއެވެ. އެމްޑީޕީގެ މެންބަރުން އޮޅުވާލައިގެން ޕީއެންސީއަށް ވައްދަމުން އަންނަ ކަމަށް އެމްޑީޕީން ތުހުމަތު ކުރެއެވެ. ނަމަވެސް ޕީއެންސީން ވަނީ އެ ތުހުމަތުތައް ދޮގު ކޮށްފައެވެ.