އެމްޑީޕީއަށް ނިސްބަތްވާ، ވައިކަރަދޫ ދާއިރާގެ މެންބަރު ހުސައިން ޒިޔާދު (ފިއްޓޭ) އޭނާއަށް ނޭނގި ވެރިކަން ކުރާ ޕީއެންސީއަށް ވެއްދި މައްސަލައިގައި، މެންބަރުކަމުގެ ގޮނޑި ނުގެއްލޭނެ ކަމަށް އިލެކްޝަންސް ކޮމިޝަންސް (އީސީ) އިން މިއަދު ބުނެފިއެވެ.
"ސަން"އަށް މައުލޫމާތު ދެއްވަމުން ފިއްޓޭ މިއަދު ވިދާޅުވީ، އޭނާ ޕީއެންސީއަށް ވެއްދިކަމަށް ފެންނަން އޮތް ތާރީޚަކީ މިދިޔަ މަހުގެ 23ވަނަ ދުވަސް ކަމަށެވެ.
އެ ކަން ކުރީ އޭނާއަށް އެއްވެސް މިންވަރަކަށް އެނގިގެން ނޫން ކަމަށާއި، އެ ކަން އެނގުނީ ވެސް އެހެން މީހެއްގެ ފަރާތުން މިއަދު ކަމަށް އޭނާ ވިދާޅުވިއެވެ.
މެންބަރަކު އޭނާ މަޖިލީހަށް އިންތިޚާބުވީ ޕާޓީ ބަަދަލުކުރުމަކީ އޭނާގެ ގޮނޑި ގެއްލޭނެ ކަމެއްގެ ގޮތުގައި ހަދައި ގާނޫނަށް އިސްލާހެއް ގެނެސް މި ސަރުކާރަށް ނިސްބަތްވާ މެންބަރުން ވަނީ ފާސްކޮށްފައެވެ.
އެއާއެކު ފިއްޓޭގެ ޕާޓީ ބަދަލުވުމާއެކު އޭނާގެ ގޮނޑިއަށް ވާނޭ ގޮތަކާމެދު އޮތީ ސުވާލު އުފެދިފައެވެ.
މި ކަމާ ގުޅިގެން "ސަން"އާ ވާހަކަދައްކަވަމުން އީސީގެ މެންބަރު ހަސަން ޒަކަރިއްޔާ ވިދާޅުވީ، ފިއްޓޭގެ ޕާޓީ ބަދަލުވި މައްސަލަ މިހާރު އެ ކޮމިޝަންގެ ސަމާލުކަމަށް އައިސްފައިވާ ކަމަށެވެ.
ފިއްޓޭގެ ޕާޓީ ބަދަލުކޮށް ޕީއެންސީގެ ދަފުތަރުގައި އޮތީ އޭނާގެ އެއްވެސް އިޚުތިޔާރެއް ނެތި، އޭނާއަށް ނޭނގިކަމަށް ވެސް އެ ކޮމިޝަނަށް އެނގިފައިވާ ކަމަށް ވެސް ވިދާޅުވިއެވެ.
އެއާއެކު އެ ކޮމިޝަންގެ ކުއްލި ބައްދަލުވުމެއް ބާއްވައި، ފިއްޓޭ އަލުން އެމްޑީޕީގެ ދަފުތަރަށް ބަދަލުކުރަން ނިންމައި، އެ ކަން ކޮށްްފައިވާކަމަށް ވެސް ވިދާޅުވިއެވެ.
މީގެ އިތުރުން ގޮނޑިއާމެދު އުފެދުނު ސުވާލާ ގުޅިގެން ޒަކަރިއްޔާ ވިދާޅުވީ، ފިއްޓޭގެ ގޮނޑި ގެއްލެންޖެހޭ އެއްވެސް ސަބަބެއް އެ ކޮމިޝަނަށް ނުފެންނަ ކަމަށާއި، ގޮނޑި ނުގެއްލޭނެ ކަމަށެވެ.
އެއީ ޕާޓީ ބަދަލުވެފައި އޮތުމަކީ ފިއްޓޭ ބޭނުންވެގެން އަމިއްލައަށް ކުރި ކަމަކަށް ނުވާތީ ކަމަށް އޭނާ ވިދާޅުވިއެވެ.
"ފިއްޓޭގެ ގޮނޑި ގެއްލެންޖެހޭ އެއްވެސް ހާލަތެއް ނެތް. ފިއްޓޭ [އަމިއްލައަށް] ޕާޓީ ބަދަލުކުރީއެއް ނޫނެއްނޫންތޯ،" އޭނާ ވިދާޅުވިއެވެ.
ފިއްޓޭ ވަނީ އެހެން ފަހަރުތަކުގައި މެންބަރުންފަދަ ބޭފުޅުން ޕާޓީ ބަދަލުވެއްޖެނަމަ އީސީން އެ ކަން ފްލެގްކޮށް އެކަން އިތުރަށް ބަލައި ޔަގީންކުރާ ކަމަށެވެ. ނަމަވެސް މިފަހަރު އީސީގެ ސަމާލުކަމަށް އެކަން ނާންނާތީ ފިއްޓޭ އެ ކަން ފާހަގަކުރެއްވިއެވެ.
އެކަމާ ގުޅިގެން ޒަކަރިއްޔާ ވިދާޅުވީ، އީސީގެ ސަމާލުކަމަށް އެ ކަން ނައީ، 20ވަަނަ މަޖިލީހުގެ މެންބަރުން ބްލެކްލިސްޓަށް އެޅުމަށްފަހު، 19ވަނަ މަޖިލީހުގެ ބްލެކް ލިސްޓު އިީސީން ރިމޫވްކުރުމުން ކަމަށެވެ. އެހެންވީއިރު، ދެވަނަ ދައުރަކަށް އަލަށް އިންތިޚާބުވީ މެންބަރުންގެ ނަންތައް ވެސް އާ ލިސްޓުތަކުން ފޮހެވިފައި އޮތީކަމަށް ވިދާޅުވިއެވެ.
ޒަކަރިއްޔާ ވިދާޅުވީ އެ މައްސަލަ އިތުރަށް ބަލަމުން އަންނަކަމަށެވެ.
ފިއްޓޭގެ މައްސަލައިގައި އެމްޑީޕީން ނެރުނު ބަޔާނުގައި ބުނީ މެމްބަރު ޒިޔާދުގެ ނަންމަތީގައި ވަގު ފޯމެއް ފުރައި ޕީއެންސީއަށް ވެއްދުން އެންމެ ހަރުކަށި އިބާރާތުން ކުށްވެރިކޮށް އެ މައްސަލަ ސީރިއަސް މައްސަލައެއްގެ ގޮތުގައި ތަހުގީގު ކުރުމަށް ކަމާ ގުޅުންހުރި އިދާރާތަކަށް އެ ޕާޓީން ގޮވައިލާ ކަމަށެވެ.
ފިއްޓޭގެ އިތުރުން ވެސް އެމްޑީޕީގެ ގިނަ މެންބަރުންތަކެއް އެ މީހުންނަށް ނޭނގި ޕީއެންސީއަށް ވެއްދި މައްސަލަ އޮތީ ފެންމަތިވެފައެެވެ.