ހުޅުމާލެއިން މީގެ މަހެއްހާ ދުވަސް ކުރިން ގެއްލުނު ބިދޭސީއަކު ހޯދަން ފުލުހުން އާންމުންގެ އެހީއަށް މިއަދު އެދިއްޖެއެވެ.
ފުލުހުން އާންމުކުރި މައުލޫމާތުގައިވާ ގޮތުން ހޯދަމުންދަނީ އިންޑިއާ ރައްޔިތެއް ކަމަށްވާ އުމޭޝް މާންޖީ (41އ) އެވެ.
ފުލުހުން ބުނީ، އުމޭޝް މާންޖީ ގެއްލިފައިވާ ކަމަށް ރިޕޯޓުކުރީ، މިދިޔަ މަހުގެ 14 ވަަނަ ދުވަހުގެ ހެނދުނު 07:00 އެހާކަންހާއިރު އޭނާ ދިރިއުޅޭ ހުޅުމާލެ ފޭސް 1ގެ ޓެމް ޕްލޭން 61އިން ނުކުމެގެން ދިޔަފަހުން އެއްވެސް ފަރާތަކަށް ޚަބަރެއް ނުވެ، ވީނުވީއެއް ނޭނގި ގެއްލިފައިވާތީ ކަމަށެވެ.
އޭނާ ގެއްލިގެން ފުލުހުންނަށް ރިޕޯޓްކުރުމާއެކު ކަމާ ގުޅުންހުރި ފަރާތްތަކާ އެކަމުގެ މައުލޫމާތު ހިއްސާކޮށް، ހޯދުމަށް މިހަތާނަށް ކުރި މަސައްކަތުން އޭނާއާ ބެހޭ އެއްވެސް މައުލޫމާތެއް އަދި އުޅޭތަނެއް ހޯދިފައިނުވާ ކަމަށް ފުލުހުން ބުންޏެވެ.
އެހެންވެ، އުމޭޝް މާންޖީއާ ބެހޭ އެއްވެސް މައުލޫމާތެއް ލިބިފައިވާ ފަރާތެއްވާނަމަ، ހުޅުމާލެ ފުރަތަމަ ފިޔަވަހީގެ ޕޮލިސް ސްޓޭޝަންގެ އިންވެސްޓިގޭޝަން ނަންބަރު 9980062 އަށް ގުޅައި ހިއްސާކުރުމަށް ވަނީ އެދިފައެވެ.
މާލެ ސަރަހައްދުން މީހުން ގެއްލިގެން ހޯދަން ދޭތެރެއަކުން ފުލުހުން އިއުލާންކުރެއެވެ. އޭގެ ތެރެއިން ގިނަ ހާލަތްތަކުގައި ފުލުހުން ވަނަވަރު އާންމުކުރާތާ މާގިނައިރުތަކެއް ނުވެ، އެ މީހުން ފެންނަ ކަމަށް ފުލުހުން ބުނެއެވެ.