މި އަހަރުވާނީ ރައްޔިތުންގެ މަޖިލީހުގެ ތާރީޚުގައި ވެސް އެންމެ އުފެއްދުންތެރި މަސައްކަތްތަކެއް ކުރާނެ އަހަރަށް ކަމަށް މަޖިލީހުގެ ރައީސް، އަބްދުއްރަހީމް އަބްދުﷲ މިރޭ ވިދާޅުވެއްޖެއެވެ.
ޕީއެސްއެމްގެ ރާއްޖެ މިއަދު ޕްރޮގްރާމްގައި ވާހަކަފުޅު ދައްކަވަމުން އަބްދުއްރަހީމް ވަނީ މި ފެށުނު އަހަރު، ރައްޔިތުން ހިތްހަމަޖެހޭ ވަރުގެ މަސައްކަތްތަކެއް މަޖިލީހުން ކުރާނެ ކަމުގެ ޔަގީންކަން ދެއްވައިފައެވެ.
"ރައްޔިތުންނަށް އަޅުގަނޑުމެން ދޭން އޮތް ޔަގީންކަމަކީ، ރައްޔިތުން ހިތްހަމަޖެހޭ މަޖިލީހަކަށް 20ވަނަ މަޖިލިސް ހަދައިދޭނަމޭ. ރައްޔިތުންނަށް އިތުބާރާއި ޔަގީންކަން އޮންނަ މަޖިލީހަކަށް ހަދައިދޭނަމޭ. ރައްޔިތުން އަޅުގަނޑުމެންނާ ހަވާލުކުރި މަަސައްކަތް، ރައްޔިތުން ހިތްހަމަޖެހޭ ފެންވަރަށް އިރާދަކުރެއްވިއްޔާ 20ވަނަ މަޖިލީހުގެ މެންބަރުން ކޮށްދޭނޭ،" އަބްދުއްރަހީމް ވިދާޅުވިއެވެ.
މީގެ އިތުރުން މިދިޔަ އަހަރު މަޖިލީހުން ކުރި މަސައްކަތްތަކަށް އަބްދުއްރަހީމް ވަނީ "އޭ ގްރޭޑް" ދެއްވައިފައެވެ. ވިދާޅުވީ މިދިޔަ އަހަރު މަޖިލީހުން ވަރަށް މުހިންމު މަސައްކަތްތަކެއް ނިންމާލި ކަމަށާއި، ޖުމްލަކޮށް މަސައްކަތާމެދު ވަރަށް ހިތްހަމަޖެހިވަޑައިގަންނަވާ ކަމަށެވެ. އެ ގޮތުން މަޖިލީހުގެ ޖަލްސާތައް ގަވާއިދުން ބާއްވައި، ކޮމިޓީތަކުގައި ވެސް މުހިންމު މަސައްކަތްތަކެއް ބާރު ސްޕީޑުގައި ކޮށްފައިވާކަން އަބްދުއްރަހީމް ފާހަގަ ކުރެއްވިއެވެ.
މިދިޔަ އަހަރު މަޖިލީހުން ކުރި މުހިންމު މަސައްކަތްތަކުގެ ތެރޭގައި ގާނޫނު އަސާސީއަށް ބޮޑު ތިން އިސްލާހެއް ގެނައުމުގެ އިތުރުން، ފަތުރުވެރިކަމުގެ ދާއިރާއިން ނަގާ ޓެކްސް އިތުރު ކުރުމާއި، ދުންފަތް ކޮންޓްރޯލް ކުރުމާބެހޭ ގާނޫނުގެ ދަށުން ގެނެވުނު އިސްލާހުތައް ވެސް ހިމެނެއެވެ.
ޕީއެންސީގެ ސުޕަމެޖޯރިޓީ އޮންނަ މަޖިލީހުން ފާސްކުރި ފުރަތަމަ ބަޖެޓު ތަންފީޒު ކުރާނީ މި އަހަރެވެ. މި އަހަރަށް ފާސްކުރި ބަޖެޓު ރައީސް ޑރ. މުހައްމަދު މުއިއްޒު މީގެ ކުރިން ސިފަ ކުރައްވާފައި އޮތީ "ބޯހިޔާވަހިކަމުގެ ރަންޒަމާނެއް" ގެންނާނެ ބަޖެޓުގެ ގޮތުގައެވެ.
އަބްދުއްރަހީމް ވިދާޅުވި ގޮތުގައި މި އަހަރަށް ފާސްކޮށްފައި އޮތް 56.6 ބިލިއަން ރުފިޔާގެ ބަޖެޓުން، މަޝްރޫއުތައް ހިންގަން ދައްޗެއް ނުވާނެއެވެ. އެ މަނިކުފާނު ވިދާޅުވި ގޮތުގައި މި އަހަރު ވާނީ އެންމެ ގިނަ މަޝްރޫއު ހިންގާނޭ އަހަރަށެވެ.
މި ވެރިކަމުގެ ފުރަތަމަ އަހަރު ތަރައްގީގެ މަޝްރޫއުތައް ކުރިޔަށް ނުގެންދެވުނީ އެކަށީގެންވާ ވަރަށް ބަޖެޓުގައި ފައިސާ ހިމަނާފައި ނެތަތީ ކަމަށް ސަރުކާރުން ބުނެއެވެ. ހުސްވި 2024ވަނަ އަހަރަށް، މިދިޔަ މަޖިލީހުން ފާސްކުރީ 49.8 ބިލިއަން ރުފިޔާގެ ބަޖެޓެކެވެ. އެ ބަޖެޓުގެ އިތުރަށް ޚަރަދުކުރާނެ 5.1 ބިލިއަން ރުފިޔާގެ ސަޕްލިމެންޓަރީ ބަޖެޓެއް ވެސް މި ސަރުކާރުގައި ފާސްކުރިއެވެ.