މޯލްޑިވްސް ބްރޯޑްކާސްޓިން ކޮމިޝަން (ބްރޯޑްކޮމް)ގެ ނައިބު ރައީސް, މުޙައްމަދު ފަޒީންގެ މައްޗަށް ތުހުމަތުކުރެވޭ ޖިންސީ ފުރައްސާރައިގެ މައްސަލަ މިނިވަން މުއައްސަސާތަކާ ބެހޭ ކޮމިޓީން ބެލިއިރު، ހަމައެކަނި ފިރިހެނުން ތިބެގެން މައްސަލަ ބެލުމުން މަޖިލީހުގެ ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް (ކުޑޫ) އެކަން ހައްލުކުރުމަށް މިއަދު އެދިވަޑައިގެންފިއެވެ.
"ސަން"އަށް އެނގިފައިވާ ގޮތުގައި ފަޒީންގެ މައްޗަށް ތުހުމަތު ކުރަނީ ބްރޯޑްކޮމްގައި މަސައްކަތް ކުރާ އަންހެން މުވައްޒަފަކަށް ޖިންސީ ގޯނާ ކުރި ކަމަށެވެ.
އެއީ މިނިވަން މުއައްސަސާއެއް ކަމުން، މަޖިލީހުގެ ކަމާ ގުޅޭ މުއައްސަސާއިން ވަނީ މައްސަލަ ބަލަން ފަށައިފައެވެ.
ބްރޯޑްކޮމްގެ ނައިބު ރައީސް, މުޙައްމަދު ފަޒީން: އޭނާއަށް ތުހުމަތު ކުރެވޭ ފުރައްސާރައިގެ މައްސަލައެއް އަންނަނީ ބަލަމުން -- ފޮޓޯ/ ޕީއެސްއެމް
އެ މައްސަލައާ ގުޅުން ހުރި ފަރާތްތަކާ ބައްދަލުކުރުމަށް މި މަހުގެ 21ގައި މިނިވަން މުއައްސަސާތަކާ ބެހޭ ކޮމިޓީން ބައްދަލުވުމެއް ބޭއްވިއެވެ. އެ ބައްދަލުވުމުގައި ބައިވެރިވެވަޑައިގެންނެވީ:
- ފެލިދޫ ދާއިރާގެ މެންބަރު އާދަމް ޒާހިރު
- ހިތަދޫ އުތުރު ދާއިރާގެ މެންބަރު މުހައްމަދު ސިނާން
- ހެންވޭރު ހުޅަނގު ދާއިރާގެ މެންބަރު އަލީ އިބްރާހީމް
- ފުވައްމުލަކު ދެކުނު ދާއިރާގެ މެންބަރު އިބްރާހީމް ހުސައިން
- މާފުށީ ދާއިރާގެ މެންބަރު ހުސައިން ރިޒާ އާދަމް
އެ ބައްދަލުވުމުގައި އާދަމް ޒާހިރުވަނީ، ކޮމިޓީން ކުރިއަށްގެންދާ ތަހުގީގުގައި ބައެއް މީހުންގެ ޒާތީ މައުލޫމާތު ހިމެނޭތީ ބައްދަލުވުން ސިއްރު ކުރުމަށް ހުށަހަޅުއްވާފައެވެ. އަދި ކޮމިޓީގެ އިއްތިފާގުން ވަނީ އެ ބައްދަލުވުން ސިއްރު ކުރުމަށް ފާސްކޮށްފައެވެ.
އެ ބައްދަލުވުމާ ގުޅޭ ގޮތުން ކުޑޫ، މަޖިލީހުގެ ރައީސް އަބްދުއްރަހީމް އަބްދުﷲއަށް ފޮނުއްވި ސިޓީއެއްގައި ވަނީ ޖިންސީ ފުރައްސާރައިގެ މައްސަލަތައް، މަޖިލީހުގެ ކޮމިޓީއަކުން ކުރިއަށްގެންދާ ތަހުގީގުގައި ނުވަތަ އިތުރު މައުލޫމާތު ސާފުކުރުމުގެ މަރުހަލާގައި އެ ކޮމިޓީގައި ހުސް ފިރިހެން ބޭފުޅުން ތިއްބެވުމަކީ އެފަދަ މައްސަލަތަކުގައި ގެންނަ އަންހެނުންނަށް އެ ކަމުގައި މައުލޫމާތު ދިނުމުގެ އިތުރުން ޖަވާބުދާރީ ވުުމަށް ދަތި އުނދަގޫތަކެއް ފޯރާނޭ ކަމެއް ކަމަށެވެ.
ވީމާ އެފަދަ ހާލަތްތަކުގައި، ރައްޔިތުންގެ މަޖިލީހުގައި ތިއްބެވި އަންހެނުން އެކަމުގައި ޝާމިލް ކޮށްދިނުމަށް ނުވަތަ މަޖިލީހުގެ ބޭރުން ފަންނީ އެހީތެރިކަން ހޯދުން ރަނގަޅު ކަމަށް އޭނާ ފާހަގަކުރެއްވިއެވެ.
"ވީމާ މަޖިލިސް ގަވައިދުގެ މަތިން މިކަންތައް ކުރިއަށް ގެންދެވޭނެ ގޮތް ހައްދަވައިދެއްވުން އެދި ދެންނެވީމެވެ." ސިޓީގައިވެއެވެ.
ކުރިން ރާއްޖެ ޓީވީގައި ނޫސްވެރިއެއްގެ ގޮތުގައި މަސައްކަތް ކުރެއްވި, ފަޒީން, ބްރޯޑްކޮމްގެ ނައިބު ރައީސްގެ މަގާމަށް އައްޔަނުކުރީ ނިމިދިޔަ އެމްޑީޕީ ސަރުކާރުގައެވެ.