އެމްޑީޕީގެ ދަފުތަރުގައި ތިބި މެންބަރުންނަށް ވަގަށް އެ މެންބަރުން އެހެން ސިޔާސީ ޕާޓީތަކުގެ ދަފުތަރުގައި، ޚާއްސަކޮށް ވެރިކަން ކުރާ ޕީއެންސީގެ ދަފުތަރުގައި ހިމަނަމުންދާކަމުގެ ގިނަ ޝަކުވާތަކެއް ލިބެމުން އަންނަ ކަމަށް އެމްޑީޕީން މިއަދު ބުނެފިއެވެ.
އެމްޑީޕީން ނެރުނު ބަޔާނެއްގައިވަނީ، ޕީއެންސީއަށް ވަނުމަށް ފޯމު ފުރާފައިނުވާ އެ ޕާޓީގެ ބައެއް އާންމު މެންބަރުންނާއި ގައުމީ މަޖިލީހުގެ މެންބަރުން ވެސް އެމްޑީޕީގެ ދަފުތަރުން އުނިކޮށް، ޕީއެންސީގެ ހިމަނާފައިވާތީ އެ މައްސަލަ އެންމެ ހަރުކަށި އިބާރާތުން އެ ޕާޓީން ކުށްވެރިކުރާ ކަމަށެވެ.
"އެހެނިހެން ބައެއް ޕާޓީތަކުގެ ދަފުތަރުގައި ވެސް އެމްޑީޕީގެ މެންބަރުން ހިމަނާފައިވާއިރު މި މައްސަލަތައް ބަލައިދިނުމަށް އިލެކްޝަންސް ކޮމިޝަނަށް ރަސްމީކޮށް މި ޕާޓީގެ ފަރާތުން ހުށަހަޅާނެ ވާހަކަ މި ފުރުސަތުގައި ދަންނަވަމެވެ،" އެމްޑީޕީގެ ބަޔާނުގައިވެއެވެ.
އެ ޕާޓީން ވަނީ، ޕީއެންސީއަށް އެއް ލައްކަ މެންބަރުން ހަމަކުރަން ކަމަށް ބުނެ، މީހުންގެ ސޮއި ފޯޖުކޮށްގެން ފޯމު ހުށަހަޅާ ކަމަށާއި ދައުލަތުގެ ހުރިހާ އިދާރާއަކަށް ނުފޫޒު ފޯރުވައި އެކަން ފޮރުވުމަށް ސަރުކާރުން މަސައްކަތް ކުރާ ކަމަށް ވެސް ތުހުމަތުކޮށްފައެވެ.
ޕީއެންސީން މެންބަރުން އިތުރުކުރުމުގެ ހަރަކާތެއްގެ ތެރެއިން: އެ ޕާޓީން ވަނީ މެންބަރުންގެ އަދަދު 90،000އަށް ވުރެ ވެސް އިތުރުވެފައިވާ ކަމަށް ބުނެފައި -- ސަން ފޮޓޯ/ އިސްމާއީލް އަބްދުލް ޣަފޫރު
އެހެންވެ، އެމްޑީޕީން ވަނީ ސިޔާސީ ޕާޓީތަކަށް މީހުން ވެއްދުމާއި ވަކިކުރުމަށް މިހާރު ކަނޑައަޅާފައިވާ އުސޫލުތަކާއި އިޖުރާއަތްތައް އިތުރަށް ހަރުދަނާކޮށް ވަގު ފޯމު ފުރައިގެން ޕީއެންސީގެ ދަފުތަރަށް މީހުން އިތުރުކުރަން ހުރި ދޮރުތައް ބަންދުކުރުމަށް އިލެކްޝަންސް ކޮމިޝަނަށް ގޮވާލާފައެވެ.
މީގެ އިތުރުން، ސަރުކާރުގެ މުއައްސަސާތަކުގައި ރައްކާކޮށްފައި ހުރި އާންމު ރައްޔިތުންގެ ޒާތީ މައުލޫމާތު ބޭނުންކޮށްގެން ވެރިކަން ކުރާ ޕީއެންސީއަށް ފޯމު ފުރައި މެމްބަޝިޕް އިތުރު ކުރަމުންދާ ކަމަށް އެ ޕާޓީން އަނެއްކާ ވެސް ތުހުމަތުކުރިއެވެ. އެ މައްސަލަ ސީރިއަސް މައްސަލައެއްގެ ގޮތުގައި ބަލައި ގާނޫނީ ފިޔަވަޅު އެޅުމަށް އިލެކްޝަންސް ކޮމިޝަނަށް އެ ޕާޓީން ގޮވާލިއެވެ.
"އޭގެ އިތުރުން، ސޮއި ފޯޖުކޮށްގެން ޕީއެންސީގެ ދަފުތަރުގައި މީހުން ރަޖިސްޓްރީ ކުރަމުންދާ މައްސަލަތައް ތަހުގީގު ކުރުމަށް ވެސް މުއައްސަސާތަކަށް ގޮވާލަމެވެ." ބަޔާނުގައިވެއެވެ.
މީގެ ކުރިން ވެސް އެމްޑީޕީން ވަނީ ޕީއެންސީއަށް މެންބަރުން އިތުރުކުރުމަށް ދައުލަތުގެ މުދަލާއި ވަސީލަތްތައް ބޭނުންކުރާ ކަމަށް ބުނެ އެކަން ކުށްވެރިކޮށްފައެވެ.
މިދިޔަ ނޮވެމްބަރު މަހު ޕީއެންސީން ވަނީ އެ ޕާޓީއަށް އެހާތަނަށް 97،000 ފޯމު ލިބިފައިވާ ކަމަށާއި އެއް ލައްކަ ހަމަކުރާ ފުރަތަމަ ޕާޓީއަކަށް އެ ޕާޓީ ވާނެ ކަމަށް ބުނެފައެވެ.
އިލެކްޝަންސް ކޮމިޝަންގެ ދަފުތަރުން ދައްކާ ގޮތުގައި މެންބަރުން އެންމެ ގިނަ ޕާޓީއަކީ އަދިވެސް އެމްޑީޕީއެވެ. އެގޮތުން، ސެޕްޓެމަބަރު 19އާ ހަމައަށް އެ ޕާޓީގައި ތިބި މީހުންގެ އަދަދު 50،851އަށް އަރާއިރު، އެ ތާރީޚަށް ޕީއެންސީގައި ތިބީ 28،983 މެންބަރުންނެވެ.