ވެރިކަން ކުރާ މައި ޕާޓީ ޕީއެންސީގެ މެމްބަޝިޕް 100،000އަށް އިތުރުކުރުމަށް، ޕާޓީއަށް ތާއީދުކުރާ ރައްޔިތުންގެ ވިސްނުން އެބަހުރި ކަމަށާއި، ލީޑަޝިޕްގެ އަމާޒަކީ އެންމެ މަދުވެގެން ވެސް 90،000 ވުރެ އިތުރުކުރުން ކަމަށް ލޯކަލް ގަވަނަންސް މިނިސްޓަރު އާދަމް ޝަރީފް އުމަރު މިއަދު ވިދާޅުވެއްޖެއެވެ.
ޕީއެންސީއަށް މެންބަޝިޕް އިތުރުކުރުމަށް މިއަދު ކުރިއަށް ގެންދިޔަ ހަރަކާތް ފެށުމުގެ ގޮތުން ނޫސްވެރިންނާ ވާހަކަދައްކަވައި މިނިސްޓަރު އާދަމް ޝަރީފް ވިދާޅުވީ، ރައީސުލްޖުމްޙޫރިއްޔާ ޑރ. މުހައްމަދު މުއިއްޒުގެ ވިސްނުންފުޅަކީ ގާތްގަނޑަކަށް 75،000 މެމްބަރުން ޕާޓީއަށް ހަމަކުރުން ކަމަށެވެ. އެހެންނަމަވެސް ޕާޓީގެ ސަޕޯޓަރުންގެ ވިސްނުން ހުރިގޮތަށް ބަލާއިރު، ރައީސް އެ ވިދާޅުވި ވަރަށް ވުރެ މައްޗަށް، 95،000 ނުވަތަ 100،000 އާ ހަމައަށް ޕާޓީގެ މެމްބަޝިޕް އިތުރުކުރުމުގެ ޝައުގުވެރިކަން އެބަހުރިކަމަށް އާދަމް ޝަރީފް ވިދާޅުވިއެވެ.
އާދަމް ޝަރީފް ވިދާޅުވީ އަމާޒަކީ އެއަށްވުރެ ބޮޑު ޕާޓީއެއް ރާއްޖޭގައި ނާންނާނެ ވަރަށް ޕީއެންސީ ބޮޑުކުރުން ކަމަށެވެ. އަދި އެ އަމާޒަށް ވާސިލުވުމަށް އޮތް އެންމެ ބޮޑު ކާމިޔާބަކީ ރައީސްގެ ސިޔާސަތާއި، ރައްޔިތުންގެ ތާއީދު ކަމަށް އޭނާ ވިދާޅުވިއެވެ.
އެހެންވީމަ އަޅުގަނޑުމެންގެ އަމާޒަކީ އެންމެ މަދުވެގެން 90،000އަށް ޕާޓީގެ މެމްބަޝިޕް އިތުރުކުރުން. އަމާޒަކީ އަހަރެއްހާ ދުވަހުގެ ތެރޭގައި ހުރިހާ ގޮތަކުން ބަލާއިރުވެސް ދިވެހިރާއްޖޭގަ އޮތް އެންމެ ވަރުގަދަ ޕާޓީއަށް ވެ، ދުވަހަކުވެސް އެހެން ޕާޓީއަކުން ނުހަދާ ވަރުގެ ރެކޯޑެއް ހެދުން، ލޯކަލް ގަވަނަންސް މިނިސްޓަރު އާދަމް ޝަރީފް އުމަރު
މިހާރު އިލެކްޝަންސް ކޮމިޝަން (އީސީ)ގެ ދަފުތަރުގައި ވާގޮތުން ނަމަ ޕީއެންސީގައި 65,000 މެމްބަރުން ތިއްބަވާނެ ކަމަށް ޕީއެންސީގެ ލީޑަޝިޕުން ފާހަގަކުރިއެވެ. އޭރުން މިހާތަނަށް 50،851 މެންބަރުންނާއެކު އެންމެ ބޮޑު ޕާޓީގެ ގޮތުގައި އޮތް އެމްޑީޕީއަށް ވުރެ ޕީއެންސީގެ މެންބަރުން އިތުރުވާނެއެވެ.
ޕީއެންސީއަށް މެންބަރުން ބާރު ސްޕީޑުގައި އިތުރުކުރަމުންދާތީ އިދިކޮޅުގެ ފަރާތްތަކުން ބޮޑެތި ތުހުމަތުތަކެއް ވެސް ކުރެއެވެ. އެގޮތުން މަޖުބޫރުންނާއި ސިޔާސީ ނުފޫޒު ފޯރުވައި، މަގާމުގެ ބިރު ދައްކައިގެން މެންބަރުން ޕާޓީއަށް ވައްދާ ކަމުގެ ތުހުމަތުތައް އިދިކޮޅު ފަރާތްތަކުން ކުރެއެވެ.
އެކަމަށް ރައްދު ދެއްވައި އާދަމް ޝަރީފް ވިދާޅުވީ ޕީއެންސީގެ ތެރޭގައި އެއްވެސް ވަރަކަށް ސިޔާސީ ނުފޫޒެއް ބޭނުންކޮށްގެން ނުވަތަ އެއްވެސް ނަހަމަ ގޮތެއްގައި ކުރާ މަސައްކަތެއް ނޯންނާނެ ކަމަށެވެ. އެ ޕާޓީން މަސައްކަތް ކުރަނީ އެއަށްވުރެ މާ ދެފުށްފެންނަ ގޮތަކަށް، މާ ފުޅާ ދާއިރާއެއްގައި ހުޅުވާލައިގެން ކަމަށް ވިދާޅުވިއެވެ.
އަދި ކޮންމެ ކަމެއް ވެސް މަޝްވަރާކޮށްގެން ކުރިއަށްގެންދާ ކަމަށާއި އުސޫލުތަކުން ބޭރުން އެއްވެސް ކަމެއް ނުކުރާނެ ކަމުގެ ޔަގީންކަން ވަނީ އަރުވާފައެވެ.
ހަސަނަށް ހީވާނެ ފުޅަށްބުޑުން ދަންޏާ ކެޔޮގަނޑު ކަނޑާލާނެހެން. އެއީ އެ ވާގޮތަކީ. މި ޕާޓީއަކީ ވަރަށް ތަހުޒީބު ވިސްނުމުގައި ޑިމޮކްރެޓިކް ހަމަހަމަ އުސޫލުގެ ތެރެއިން ކަންކަން ކުރަމުންދާ ޕާޓީއެއް، ލޯކަލް ގަވަނަންސް މިނިސްޓަރު އާދަމް ޝަރީފް އުމަރު
ކޮންމެ ހަފުތާ ބަންދެއްގައި ވެސް ޕީއެންސީގެ މެމްބަޝިޕް އިތުރުކުރުމުގެ ހަރަކާތް ކުރިއަށް ގެންދާ އިރު މިއަދު ގްރޭޓާ މާލޭގެ އިތުރުން ރާއްޖޭގެ ހަތް ސަރަހައްދެއްގަ ޕާޓީގެ މެމްބާޝިޕް އިތުރުކުރުމުގެ މަސައްކަތް ކުރިއަށް ގެންދާނެއެވެ.
މިއަދުގެ ހަރަކާތުގައި ޕީއެންސީއަށް ނިސްބަތްވާ މަޖިލިސް މެންބަރުންނާއި އެ ޕާޓީގެ އިސް ބޭބޭފުޅުން ބައިވެރިވެވަޑައިގެންނެވިއެވެ. އަދި ސަރުކާރުގެ އެކި ކުންފުނިތަކުގެ ސިޔާސީ މަގާމުތަކުގައި ތިއްބެވި ބޭފުޅުން ވެސް ވަނީ ބައިވެރިވެވަޑައިގެންފައެވެ.
ޕީއެންސީން އެއް އަހަރު ތެރޭ އެހާ ގިނަ އަދަދަކަށް މެންބަރުން އިތުރުކޮށްފައިވާއިރު، މިދިޔަ އަހަރު ރައީސް ވެރިކަމަށް ވަޑައިގެންނެވިއިރު އެ ޕާޓީގައި ތިބީ ގާތްގަނޑަކަށް 3،000 މެންބަރުންނެވެ.