ނެޓްފްލިކްސްގެ އެންމެ ކާމިޔާބު ޝޯ "ސްކުއިޑް ގޭމް" މުޅިން އާ ސީޒަނަކާއެކު އެނބުރި އަތުވެއްޖެއެވެ.
ޝޯ އައި ގޮތަށް ދުނިޔޭގެ ހުރިހާ ގައުމެއްގެ ޗާޓުގެ އެއްވަނައަށް ވަނީ އަރައިފައެވެ.
ދެކުނު ކޮރިއަން ޝޯ ސްކުއިޑް ގޭމްގެ ފުރަތަމަ ސީޒަނެއް 2021 ވަނަ އަހަރު ނެރުމާ އެކު އެ ޝޯ ވެގެން ގޮސްފައިވަނީ މުޅި ސްޓްރީމިން ސާވިސްއިން އެޅުވި އެންމެ ކާމިޔާބު އެއް ޝޯއަށެވެ. އެންމެ ގިނަ ބަޔަކު ބެލި ޝޯތަކުގެ ކުރީގައި ވެސް މި ޝޯ ހިމެނެއެވެ.
ދިގު އިންތިޒާރަކަށް ފަހު ޝޯގެ ދެވަނަ ސީޒަން އެންމެ ފަހުން މިއޮތީ ޕްލެޓްފޯމަށް އައިސްފައެވެ. ފުރަތަމަ ސީޒަނާ އެއްގޮތަށް އާ ސީޒަން ވެސް އަމާޒު ހިފާފައި ހުރި އަނެއްކާވެސް ރެކޯޑު ތަކެއް މުގުރާށެވެ.
ނެޓްފްލިކްސްއިން ހާމަކޮށްފައިވާ ގޮތުގައި ސްކުއިޑް ގޭމް މިހާރު އަންނަނީ ދުނިޔޭގެ ހުރިހާ ސަރަހައްދެއްގައި ޓްރެންޑިން ވަމުންނެވެ. އެގޮތުން ނެޓްފްލިކްސް ލިބޭ 93 ގައުމުގެ ތެރެއިން އެ ހުރިހާ ގައުމެއްގެ ނެޓްފްލިކްސް ޝޯތަކުގެ އެއްވަނައިގައި އޮތީ ސްކުއިޑް ގޭމެވެ.
ޖުމްލަ ހަތް އެޕިސޯޑް ހިމެނޭ އާ ސީޒަން ރިލީޒް ކުރުމާއެކު އެތައް ބަޔަކު ޝޯ އެއްކޮށް ބިންޖުކޮށް ނިންމާލައިފިއެވެ. ބޮޑު ސަސްޕެންސް ގަނޑަކާއެކު އާ ސީޒަން ނިމޭއިރު މިކަމާ އެތައް ފޭނުންނެއް ތިބީ ހިތްހަމަ ނުޖެހިފައެވެ.
ނަމަވެސް ކުރީގެ ސީޒަނާ އެއްވަރަށް މިފަހަރު އާ ސީޒަނަކަށް އިންތިޒާރު ކުރާކަށް ނުޖެހޭނެއެވެ. ޝޯގެ ތިންވަނަ ސީޒަންގެ މަސައްކަތް ނިންމާލާފައިވާއިރު އަންނަ އަހަރުގެ ތެރޭގައި އާ ސީޒަން ރިލީޒް ކުރާނެ ކަމަށް މައުލޫމާތު ލިބެއެވެ. އަދި މި ސީޒަނާއެކު ސްކުއިޑް ގޭމްގެ ވާހަކައަށް ނިމުމެއް އަންނާނެއެވެ.