އަމާޒަކީ އަންނަ އަހަރު 15 ޕަސެންޓް އިތުރަށް ފަތުރުވެރިން ގެނައުން ކަމަށް ޓޫރިޒަމް މިނިސްޓަރު އިބްރާހީމް ފައިސަލް މިއަދު ވިދާޅުވެއްޖެއެވެ.
ރާއްޖޭގެ ފަތުރުވެރިކަމުގެ ތާރީޚުގައި ފުރަތަމަ ފަހަރަށް އެއް އަހަރު ތެރޭ ދެ މިލިއަން ފަތުރުވެރިން ރާއްޖެއަށް ވަނީ ޒިޔާރަތްކޮށްފައެވެ.
މި އަހަރުގެ ދެ މިލިއަންވަނަ ފަތުރުވެރިޔާއަށް މަރުހަބާ ކިޔުމަށްޓަކައި، ވެލާނާ އިންޓަނޭޝަނަލް އެއާޕޯޓުގައި މިއަދު ވަނީ ޚާއްސަ ރަސްމިއްޔާތެއް ބާއްވާފައެވެ.
އެ ރަސްމިއްޔާތަށް ފަހު މީޑިއާތަކާ ވާހަކަދައްކަވަމުން މިނިސްޓަރު ފައިސަލް ވިދާޅުވީ މިއީ ފަތުރުވެރިކަމުގެ ތާރީޚުގައި ރާއްޖެއަށް ލިބުނު ބޮޑު ކާމިޔާބީއެއް ކަމަށެވެ. އަދި ފަތުރުވެރިކަމުން ލިބޭ އާމްދަނީއަށް ބަލާއިރު ގާތްގަނޑަކަށް ފަސް ބިލިއަން ޑޮލަރާ ގާތަށް އާމްދަނީ ޖެހިދާނެ ކަމަށް ގަބޫލުކުރައްވާ ކަމަށް ފައިސަލް ވިދާޅުވިއެވެ.
އެހެންކަމުން އަމާޒަކީ އަންނަ އަހަރު، 15 ޕަސެންޓް އިތުރަށް ފަތުރުވެރިން ގެނައުން ކަމަށް ފައިސަލް ވިދާޅުވިއެވެ.
އަޅުގަނޑުމެންގެ އަމާޒަކީ ﷲގެ ހެޔޮ ރަހުމަތްފުޅާ އެކީގައި މުޅި ސަރުކާރާއި، މުޅީ ޓީމް އެއްކޮށް ގުޅިގެން މިއަންނަ އަހަރު 15 ޕަސެންޓުގެ ކުރިއެރުމެއް އެރައިވަލްސް ހޯދުން، ޓޫރިޒަމް މިނިސްޓަރު އިބްރާހީމް ފައިސަލް
ފަތުރުވެރިކަމުގެ ދާއިރާއަށް މިއަދު ލިބުނު ކާމިޔާބީއަކީ އެކެއްގެ އެކަނި މަސައްކަތެއް ނޫންކަން ފާހަގަކުރައްވައި ފައިސަލް ވަނީ ދާއިރާ ކުރިއެރުވުމަށް މަސައްކަތްކުރާ އެންމެންނަށް ޝުކުރުއަދާކުރައްވާފައެވެ.
މިއަދު ރާއްޖެ އައި ދެ މިލިއަންވަނަ ފަތުރުވެރިޔާއަކީ، ފިރިމީހާއާއި ދެ ކުދިންނާއެކު ރާއްޖެ ޒިޔާރަތްކުރި އޮސްޓްރިއާގެ އަންހެނެކެވެ. އެއާޕޯޓުން އޭނާއަށް މަރުހަބާކީ، ފައިސަލެވެ.
މިދިޔަ އަހަރު ރާއްޖެއަށް ޖުމުލަ 1،747،370 ފަތުރުވެރިން ޒިޔާރަތްކުރިއެވެ. އެހެންވެ، މި އަހަރު ދެ މިލިއަން ފަތުރުވެރިން ގެނެއުމަކީ ސަރުކާރުގެ އަމާޒެކެވެ.
ފާހަގަކޮށްލެވޭ ގޮތުގައި ވެލާނާ އިންޓަނޭޝަނަލް އެއާޕޯޓު ބޮޑުކުރަން މިހާރު ކުރިއަށްދާ މަޝްރޫއު އަންނަ އަހަރު ތެރޭގައި ނިންމާލެވޭނެ ކަމަށް ސަރުކާރުން ވަނީ ބުނެފައެވެ. އެ މަސައްކަތް ނިންމާލެވި، އަންނަ އަހަރު 2.2 މިލިއަން ފަތުރުވެރިން ގެންނަން ސަރުކާރުން ވަނީ އަމާޒު ކަނޑައަޅައިފައެވެ.
ތަފާސްހިސާބުތައް ދައްކާ ގޮތުގައި މި އަހަރު ރާއްޖެއަށް އެންމެ ގިނަ ފަތުރުވެރިން ޒިޔާރަތްކުރީ ޗައިނާއިންނެވެ. އެ ގައުމުން 259،000 އަށްވުރެ ގިނަ ފަތުރުވެރިން ވަނީ ޒިޔާރަތްކޮށްފައެވެ. ދެވަނައިގައި އޮތް ރަޝިއާއިން 214،000 އަށްވުރެ ގިނަ ފަތުރުވެރިން ވަނީ ޒިޔާރަތްކޮށްފައެވެ. ޖުމުލަ 170،000 އަށްވުރެ ގިނަ ފަތުރުވެރިންނާ އެކު ތިންވަނައަށް އެންމެ ގިނައިން ރާއްޖެއަށް ޒިޔާރަތްކުރީ އިނގިރޭސިވިލާތުންނެވެ.