ހައުސިން މިނިސްޓްރީގެ ކުރީގެ ސްޓޭޓް މިނިސްޓަރު އަކްރަމް ކަމާލުއްދީނު ހިމެނޭހެން އިތުރު ހަތަރު މީހެއްގެ ޕާސްޕޯޓު ހިފަހައްޓައިފިއެވެ.
އިތުބާރު ހުރި މަސްދަރަކުން "ސަން"އަށް މައުލޫމާތު ދިން ގޮތުގައި މި ހަތަރު މީހުންގެ ޕާސްޕޯޓު ހިފަހައްޓަން އަންގައިފައިވަނީ ލިސްޓުގައި ނެތް ބަޔަކަށް ބިންވެރިޔާގެ ބިން ލިބުނު މައްސަލައިގެ ތަހުގީގުތަކާ ގުޅިގެންނެވެ.
މި މީހުންގެ ޕާސްޕޯޓު ހިފަހައްޓަން އަމުރުކޮށްފައިވަނީ އެންޓި ކޮރަޕްޝަން ކޮމިޝަން (އޭސީސީ)އިންނެވެ. އެނގިފައިވާ ގޮތުގައި ޕާސްޕާޓު ހިފަހައްޓަން އަމުރުކުރި ހަތަރު މީހުންނަކީ:
- އަކްރަމް ކަމާލުއްދީން، ކުރީގެ ސްޓޭޓް މިނިސްޓަރު
- މުޙައްމަދު އާރިފް، ކުރީގެ ސީނިއާ އެގްޒެކެޓިވް ޑިރެކްޓަރު
- ލިރުގަމް ވަހީދު،، ކުރީގެ ސީނިއާ އެގްޒެކެޓިވް ޑިރެކްޓަރު
- އަހްމަދު ވިޝާން ނަސީމް، ޑިރެކްޓަރު ޖެނެރަލް
ހަމަ މި މައްސަަލައިގައި މިއަދުވަނީ އެޗްޑީސީގެ މެނޭޖިން ޑިރެކްޓަރު އިބްރާހީމް ފަޒުލް ރަޝީދާއި އޭނާގެ ބޭބެ، އެމްޑަބްލިޔުއެސްސީގެ ޑީއެމްޑީ މުހައްމަދު ފަޒީލް ރަޝީދު ހިމެނޭ ގޮތަށް 20 މީހުންގެ ޕާސްޕޯޓު ހިފަހައްޓައިފައެވެ.
މި 20 މީހުންގެ ޕާސްޕޯޓު ހިފަހައްޓާފައި ވަނީ ވަކި މުއްދަތެއް ނެތް ގޮތަށެވެ.
ވަގު ލިޔުން ހަދައިގެން ޝަރުތުހަމަނުވާ ބަޔަކަށް ގޯތިދިން މައްސަލައާ ގުޅިގެން ފުލުހުން ރޭ ބޭއްވި ނޫސްވެރިންގެ ބައްދަލުވުމުގައި އެސިސްޓެންޓް ކޮމިޝަނާ އޮފް ޕޮލިސް އަބްދުﷲ ޝަރީފް ވިދާޅުވި ގޮތުގައި، ތަހުގީގަށް ސުވާލު ކުރެވުނު ފަރާތްތަކުން ބުނެފައިވަނީ ފޯޖުކުރި ލިޔުންތައް ދީފައި އޮތީ ކުރީ ސަރުކާރުން ކަމަށެވެ.
އެ ގޮތުން މި މައްސަލައިގައި ފުލުހުން ފަޒީލާ ސުވާލުކުރުމުން، އޭނާ ވެސް ބުނެފައި ވަނީ އެ ގޮތަށް ކަމަށް ޝަރީފް ވިދާޅުވިއެވެ. ޝަރީފް ވިދާޅުވި ގޮތުގައި، ގޯތި ނުލިބުމުން ފަޒީލް ވަނީ ހައުސިން މިނިސްޓްރީގެ ކުރީގެ ސްޓޭޓް މިނިސްޓަރު އަކްރަމް ކަމާލުއްދީނާ ވެސް ބައްދަލުކޮށްފައެވެ.
ނަމަވެސް މި ކަމާ ގުޅިގެން އަކްރަމް މިއަދު އެކްސްގައި ކުރެއްވި ޕޯސްޓެއްގައިވަނީ، ފަޒީލްއާ އެއްވެސް މުއާމަލާތެއް ކޮށްފައިނުވާނެ ކަމަށާއި، އަދި ދުވަހަކު ދިމާވެފައި ވެސް ނުވާ ކަމަށެވެ. އަދި އެއްވެސް ކަމެއްގައި އޭނާއާ ބައްދަލުކުރަން ފަޒީލް އެދިފައި ވެސް ނުވާ ކަމަށް އަކްރަމް ވިދާޅުވިއެވެ.
ގޯތި ވައްކަމުގެ މައްސަލަ ސަމާލު ކަމަށް އައީ ފަޒީލް ރަޝީދުގެ ޝަރުތު ހަމަނުވި ނަމަވެސް، އޭނާއަށް ގޯތި ދީފައިވާ ލިޔެކިޔުމެއް ސޯޝަލް މީޑިއާއަށް ލީކުވުމާ ގުޅިގެންނެވެ.
މި މައްސަލަ އެންޓި ކޮރަޕްޝަން ކޮމިޝަން (އޭސީސީ)އާއި ގުޅިގެން ތަހުގީގު ކުރުމަށް ތައްޔާރުވަމުން އަންނައިރު، ފަޒުލް ހިމެނޭހެން އެޗްޑީސީގެ ބޯޑު މެންބަރުންތަކެއް ވަނީ ސަސްޕެންޑުކޮށްފައެވެ. އަދި އޭނާގެ ބޭބެ ފަޒީލް ވެސްވަނީ ސަސްޕެންޑު ކޮށްފައެވެ.