ގެއްލިގެން ހީޯދަމުންދާ "ސީމެކްސް" ދޯނީގެ ފަޅުވެރިޔާ ހޯދުމަށް 200 ނޯޓިކަލް މޭލުގެ ސަރަހައްދެއް މިއަދު ބަލައިފައިވާކަމަށް މޯލްޑިވްސް ނެޝެނަލް ޑިފެންސް ފޯސް (އެމްއެންޑީއެފް)އިން ބުނެފިއެވެ.
މައުލޫމާތު ލިބިިފައިވާގޮތުގައި ހޯމަ ދުވަހުގެރޭ އެ ބޯޓުން ގެއްލިފައިވަނީ ނޭޕާލްގެ ރައްޔިތެއް ކަމަށްވާ ރާޖް ކުމާރެވެ.
އެމްއެންޑީއެފްއިން މީޑިއާތަކާއި ހިއްސާކުރި މެސެޖެއްގައި ވަނީ މި ހާދިސާއާއި ގުޅިގެން ގެއްލުނު މީހާ ހޯދުމަށް 200 ނޯޓިކަލް މޭލުގެ ސަރަހައްދެއް މިއަދު ބަލާފައިވާ ކަމަށެވެ.
އަދި އޭނާ ހޯދުމުގެ އޮޕަރޭޝަން ކުރިއަށް ގެންގޮސްފައި ވަނީ ކަނޑުމަގުން ކަމަށާއި އަދިވެސް އޭނާ ފެނިފައިނުވާކަމަށް އެމްއެންޑީއެފްއިން ވަނީ މައުލޫމާތު ދީފައެވެ.
މި ހާދިސާއާ ގުޅިގެން މީގެ ކުރިން ފުލުހުން ބުނެފައި ވަނީ، އޭނާ ގެއްލުނީ އައްޑޫ ސިޓީއިން ފުރައިގެން މާލެއަށް ދަތުރުކުރި "ސީމެކްސް" ނަމަކަަށް ކިޔާ ބޯޓަކުން ކަމަށެވެ. އޭނާ ބޯޓުގައި ނެތްކަން އެނގިފައި ވަނީ ފުވައްމުލައް ސިޓީއާ އަށް މޭލަށް ކައިރިވެފައި ވަނިކޮށް ކަމަށް ފުލުހުން މައުލޫމާތުދިނެވެ.
ފުލުހުން ބުނީ އެ ބޯޓް އެރޭގެ 11:30 ހާއިރު އައްޑޫ ސިޓީއިން ފުރިއިރު ރާޖް ކުމާރު ބޯޓްގައި ހުރި ކަމަށެވެ. އަދި އެރޭގެ 01:15 ހާއިރު ބޯޓްގެ ކެޕްޓަނާ އޭނާ ވާހަކަ ދެއްކިކަމަށް ވެސް ފުލުހުން ވަނީ ބުނެފައެވެ.
ފަޅުވެރިޔާ ހޯދުމުގެ މަސައްކަތް އެމްއެންޑީއެފްއިން ކުރަމުންދާ އިރު، އެ މައްސަލަ ފުލުހުން ވެސް ދަނީ ތަހުގީގު ކުރަމުންނެވެ.
ފާހަގަކޮށްލެވޭ ގޮތުގައި މި ދުވަސްވަރަކީ ރާއްޖޭގެ އެކި ހިސާބުތަކަށް މޫސުން ގޯސް ދުވަސްވަރެކެވެ. އެހެންކަމުން ކަމާބެހޭ ފަރާތްތަކުން ގެންދަނީ މޫސުމަށް ސަމާލުވުމަށް ވެސް އިލްތިމާސްކުރަމުންނެވެ.