ބިންވެރިޔާ ސްކީމުގެ ދަށުން ގޯތި ލިބިފައި ނުވާ ބަޔަކަށް ހުޅުމާލެއިން ބިންދީ, އުސޫލާ ހިލާފަށް, އެޗްޑީސީއިން އަމަލުކޮށްފައިވާ ކަމަށް ތުހުމަތު ކުރެވޭއިރު, އެ މައްސަލައިގެ ޖިނާއީ ތަހުގީގެއް ހިންގުމަށް ދަ ޑިމޮކްރެޓްސް އިން މިއަދު ގޮވާލައިފިއެވެ.
ބިންވެރިޔާ ސްކީމުން ބިން ލިބިފައި ނުވަނީސް, އެޗްޑީސީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދުގެ ބޭބެ, އަދި އެމްޑަބްލިޔުއެސްސީގެ ޑެޕިއުޓީ މެނޭޖިން ޑިރެކްޓަރު, މުޙައްމަދު ފަޒީލް ރަޝީދަށް ހުޅުމާލެއިން ބިން ދީފައިވާ ކަމަށް ބުނާ މައްސަލައެއް އިއްޔެ ވަނީ ފެންމަތި ވެފައެވެ. މި ބޮޑު ތުހުމަތު ފަޒުލް ވަނީ ރޭ ދޮގު ވެސް ކުރައްވާފައެވެ.
ނަމަވެސް ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ)ން އިން މިއަދު ވަނީ ފަޒުލް ހިމެނޭހެން އެޗްޑީސީގެ ޗެއާމަން އަޙްމަދު ނާސިފް, ފިޔަވާ އެ ބޯޑުގައި ހިމެނޭ އެހެން ހުރިހާ ބޭފުޅުން މިއަދުން ފެށިގެން މުއްދަތެއް ނެތް ގޮތަށް ސަސްޕެންޑް ކޮށްފައެވެ. އަދި އެޗްޑީސީން ވަނީ ފަޒީލް ވެސް ސަސްޕެންޑް ކޮށްފައެވެ.
އެ މައްސަލައާ ގުޅިގެން ނެރުނު ބަޔާނެއްގައި ޑިމޮކްރެޓްސްއިން ބުނީ ގޯތީގެ ސައްހަ ނޫން ލިޔުން ތައްޔާރުކޮށްގެން އިންފާރު ރާނަން އެދުނު ހިސާބުން ވެސް އެއީ ބިންވެރިޔާ ސްކީމްގެ ދަށުން ހަވާލުކޮށްފައިވާ ގޯތި ނޫންކަން، އެޗްޑީސީއަށް ސާފުވާކަން އާންމުވެފައިވާ ލިޔެކިޔުމުން ދައްކާ ކަމަށެވެ. އެހެންނަމަވެސް އިންފާރު ރާނަން އެޗްޑީސީއިން ހުއްދަދީ، "ވަގު ގޯތީގެ" އިންފާރު ރާނާފައި ވަނީ އެޗްޑީސީގެ ތެރެއިންކަން ސާފުކޮށް އެނގޭ ކަމަށް ވެސް ބުނެފައިވެއެވެ.
އަދި އެ ބޮޑު ވައްކަމުގެ މައްސަލަ ފުލުހަށް ހުށަހަޅައި، ތަހުގީގުކުރުމަށް އެދުމުގެ ބަދަލުގައި އެ ކުންފުނިން އެ މައްސަލަ ސިއްރުކުރި ކަމީ، މިއަދު ޖިނާއީ ތަހުގީގު ހިންގަންޖެހޭ ކަމެއް ކަމަށް އެ ޕާޓީން ބުންޏެވެ.
"މި މައްސަލާގައި ޝާމިލް ވަނީ ސީދާ ރައީސުލްޖުމްޙޫރިއްޔާ ނަން ފޮނުއްވައިގެން އައްޔަނު ކުރައްވާފައިވާ މަގާމެއްގައި ހުންނެވި ފަޒީލްއާއި އޭނާގެ ބޭބެ ފަޒުލް ކަމުގައިވުމަކީ ނުހަނު ކަންބޮޑުވާކަމެއް. ސަރުކާރުގެ މިބާވަތުގެ ސިޔާސީންނާމެދު ކެނޑިނޭޅި ތުހުމަތު އުފުލެމުންދާ މައްސަލަތަކުގައި އެދެވޭ ތަހުގީގެއް ނުހިންގައި، ފިޔަވަޅެއް ނޭޅި، މަގާމުގެ ބާރާއި އިޚުތިޔާރުތައް އަމިއްލަ ޒާތީ އަދި ސިޔާސީ މަންފާއަށް ބޭނުންކުރުމުގައި ދެމިތިބެން މި ސަރުކާރުން ފުރުސަތު ދެމުންދާކަން ފާހަކުރަން،" ޑިމޮކްރެޓްސްގެ ބަނާނުގައި ބުނެފައިވެއެވެ.
ޑިމޮކްރެޓްސްއިން ބުނީ ސީދާ ރައީސް ޑރ. މުހައްމަދު މުއިއްޒު އައްޔަނުކުރައްވާފައިވާ ބޭބޭފުޅުންގެ ފަރާތުން ތަކުރާރުކޮށް އިވި، ފެންނަމުންދާ ކަންކަމުން، ކޮރަޕްޝަނާއި ވައްކަމާއި ފަސާދައަކީ މި ސަރުކާރުގެ ހިންގުމުގެ ވައްޓަފާޅިކަން ސާފުވާ ކަމަށެވެ. އަދި ގާނޫނުއަސާސީއާއި ލާމަރުކަޒީ ގާނޫނުގައި ބަޔާންކުރާ ހަމައިން ހުޅުމާލޭގެ މުނިސިޕަލް ޚިދުމަތްތައް މާލެ ސިޓީ ކައުންސިލަށް ބަދަލުކުރުމުގައި ސަރުކާރުން ފަހަތު ފަޔަށް ބުރަވެ، ލަސްކުރަމުންދަނީ އެ ބާވަރުގެ ކޮރަޕްޝަންގެ ޖަރީމާތަކަށް ކަންފަހިކުރުމަށް ކަމަށް ވެސް އެ ޕާޓީން ބުންޏެވެ.
މި މައްސަލައާ ގުޅިގެން ރައީސް އޮފީހުގެ ތަރުޖަމާނު ހީނާ ވަލީދު މިއަދު ވިދާޅުވީ ގޯތި ލިބިފައިވާ އެއްވެސް މީހެއްގެ ހައްގަކަށް އުނިކަމެއް ލިބިފައިނުވާނެ ކަމަށާއި އަދި ނުވެސް ލިބޭނެކަމަށެވެ.
މި މައްސަލަ ވަރަށް ބޮޑުވެފައިވާއިރު މައްސަލަ ތަހުގީގު ކުރުމަށް ފުލުހުން އިއްޔެ ވަނީ އެޗްޑީސީއަށް ވަދެފައެވެ. އަދި އެންޓި ކޮރަޕްޝަން ކޮމިޝަން (އޭސީސީ) އިން ވެސް އަންނަނީ މައްސަލަ ތަހުގީގު ކުރަމުންނެވެ.
މި މައްސަލަ ފެންމަތި ވެފައި މިވަނީ ކުރީ ސަރުކާރުން މާލޭ ރައްޔިތުންނަށް ދޫކުރި ބިމާއި ފްލެޓްތައް އޭގެ ހައްގުވެރިންނަށް މި ސަރުކާރުން ހަވާލު ނުކުރާ ކަމަށް ބުނެ އެތައް ބަޔަކު ކަންބޮޑުވުން ފާޅުކުރަމުން ދިޔަ ދަނޑިވަޅެއްގައެވެ.
މި މައްސަލައިގެ ތަހުގީގު ފުލުހުންނާއި އޭސީސީއިން ވެސް އަންނަނީ ކުރަމުންނެވެ.