ބިންވެރިޔާ ސްކީމުން ގޯތި ހައްގު ނޫން ފަރާތްތަކަކަށް ގޯތި ދީފައިވާ ކަމަށް ތުހުމަތު ކުރެވޭ މައްސަލައިގެ ތަހުގީގާ ގުޅޭ ގޮތުން، ޕޮލިސް ކޮމިޝަނަރު އަލީ ޝުޖާއު، އެންޓި ކޮރަޕްޝަން ކޮމިޝަން (އޭސީސީ)އާ މިއަދު މަޝްވަރާކުރައްވައިފިއެވެ.
ފުލުހުން އެކްސްގައި ކުރި ޕޯސްޓެއްގައި ވަނީ ސީޕީ، އޭސީސީގެ މެންބަރުންނާ މިއަދު ބައްދަލުކުރެއްވި ކަމަށާއި، ބިންވެރިޔާ ސްކީމާ ގުޅުންހުރި ކޮރަޕްޝަންގެ މައްސަލަ ތަހުގީގުކުރުމާ ގުޅޭގޮތުން އެ ބައްދަލުވުމުގައި ފުޅާ ދާއިރާއެއްގައި މަޝްވަރާކުރި ކަމަށެވެ.
ފުލުހުން ސޯޝަލް މީޑިއާގައި ހިއްސާ ކުރި ފޮޓޯތަކުން ފެންނަނީ ކޮމިޝަނާއާއި ފުލުހުންގެ އިސްވެރިންތަކެއް އޭސީސީގެ ރައީސް އާދަމް ޝާމިލް އާއި އެ ކޮމިޝަންގެ އިސްވެރިންތަކަކާ ބައްދަލު ކުރައްވާ ތަނެވެ.
އެ ބައްދަލުވުމާ ގުޅޭ އިތުރު ތަފުސީލެއް މިހާތަނަށް ލިބިފައިނުވެއެވެ.
ބިންވެރިޔާ ސްކީމުން ނުހައްގުން ގޯތި ދީފައިވާ ކަމުގެ ތުހުމަތުތަކެއް ފެންމަތިވީ، އެކަމާ ގުޅުންހުރި ލިޔެކިޔުންތަކެއް އާންމުވުމާ ގުޅިގެންނެވެ. އެގޮތުން ހުޅުމާލެ ބަލަހައްޓާ ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ)ގެ މެނޭޖިން ޑިރެކްޓަރު އިބްރާހީމް ފަޒުލް ރަޝީދުގެ ބޭބެ އަދި އެމްޑަބްލިޔުއެސްސީގެ ޑީއެމްޑީ މުހައްމަދު ފަޒީލް ރަޝީދަށް ގޯއްޗެއް ދިނުމަށް ހަދައިފައިވާ އެއްބަސްވުމެއް ވެސް އާންމުވެފައިވެއެވެ.
އެއީ ފަޒީލަށް ގޯތި ލިބުމަށް ޝަރުތު ހަމަނުވާ ކަމަށް ބިންވެރިޔާ ސްކީމްގެ ފައިނަލް ލިސްޓުގައި ބުނެފައި ވަނިކޮށެވެ.
އެ މައްސަލަ ރައްޔިތުންގެ މަޖިލީހަށް ހުށަހަޅައި އެމްޑީޕީން ވަނީ، ބިންވެރިޔާ ސްކީމުން އުސޫލުން ބޭރުން 50 ގޯތި ދޫކޮށްފައިވާކަން އެނގެން އޮތް ކަމަށް ބުނެފައެވެ. އެ ގޯތިތަކުގެ ޖުމްލަ އަގު 400 މިލިއަނަށްވުރެ މަތިވާނެ ކަމަށް ލަފާކުރެވޭ ކަމަށް ވެސް އެ ޕާޓީން ބުނެފައިވެއެވެ.
އެ މައްސަލައިގައި ފުލުހުން ޖިނާއީ ތަހުގީގެއް ފަށައި، އިއްޔެ އެޗްޑީސީ އޮފީސް ބަލައި ފާސްކޮށްފައިވެއެވެ.
މީގެ އިތުުރުން ޕްރޮސެކިއުޓާ ޖެނެރަލް އައްބާސް ޝަރީފް ވަނީ، ބިންވެރިޔާ ސްކީމްގެ އިތުރުން ގެދޮރުވެރިޔާ ސްކީމާ ގުޅުވައި ކުރެވޭ ތުހުމަތުތަކުގެ އަވަސް ތަހުގީގެއް ހިންގައި، ކޮންމެ ހަފުތާއަކު ތަހުގީގާ ގުޅޭ މައުލޫމާތު ހިއްސާކުރުމަށް އަމުރުކުރައްވައިފިއެވެ.