ދައުލަތުގެ މާލީ ހާލަތު ރަނގަޅު ކުުރުމަށްޓަކައި އިސްލާހީ ފިޔަވަޅުތައް އެޅުމުގެ މަސައްކަތަށް ޚާއްސަކޮށްފައިވާ ކޮމިޝަނަރަކަށް، މީރާގައި އިސް މަގާމުތައް ފުރުއްވާފައިވާ އަސްމާ ޝަފީއު ހޮވައިފިއެވެ.
ފިނޭންސް މިނިސްޓްރީން މިއަދު ބުނީ، ދައުލަތުގެ މާލީ ނިޒާމު ހަރުދަނާ ކުރުމުގެ ގޮތުން ކުރިއަށްގެންދާ މަސައްކަތްތަކުގެ ތެރެއިން، ދައުލަތުގެ އެކިއެކި ދާއިރާތައް ރިފޯމް ކުރުމާބެހޭ މަސައްކަތްތައް ހަލުވި ކުރުމަށްޓަކައި މާލީ ވުޒާރާއިން ގާއިމުކޮށްފައިވާ އިކޮނޮމިކް ރިފޯމް އޮފީހުގެ ކޮމިޝަނަ އޮފް ރިފޯމްގެ މަގާމަށް އަސްމާ ހޮވައިފައިވާ ކަމަށެވެ.
މީގެ ކުރިން އަސްމާ ވަނީ މީރާގެ ޑިރެކްޓާ ޖެނެރަލް، ޕްލޭނިން އެންޑް ޑެވެލޮޕްމެންޓްގެ މަގާމާއި ޑެޕިއުޓީ ކޮމިޝަނާ ޖެނެރަލް އޮފް ޓެކްސޭޝަންގެ މަގާމު ފުރުއްވާފައެވެ.
ރިފޯމް ކޮމިޝަނަރަކު ހޯދާކަން ހާމަކޮށް މިމަހުގެ ހަތަރު ވަނަ ދުވަހު ފިނޭންސް މިނިސްޓްރީން ކުރި އިއުލާނެއްގައި އެ މަގާމުގެ ޒިންމާތަކުގެ ތެރޭގައި:
- އިގުތިސާދީ އިސްލާހުތައް ގެނައުމާއި ދައުލަތުގެ ކުންފުނިތައް އިސްލާހު ކުރުން ހިމެނޭ ގޮތަށް ގައުމީ އިސްލާހީ އެޖެންޑާއެއް އެކުލަވާލައި ތަންފީޒުކުރުމުގައި އިސްކޮށް މަސައްކަތްކުރުން
- އިގުތިސާދު ސިންދަފާތުކޮށް، ވާދަވެރިކަން އިތުރުކޮށް، ދެމެހެއްޓެނިވި ގޮތެއްގައި ތަރައްގީ ގެނައުމުގެ ހަރަކާތްތައް ރާވައި ތަންފީޒުކުރުން
- އިސްލާހީ ފިޔަވަޅުތަކާ ގުޅުންހުރި ސިޔާސަތުތަކާ ބެހޭ ގޮތުން ފިނޭންސް މިނިސްޓަރާއި މުސްތަޝާރަށް ލަފާ ދިނުން
ރާއްޖޭގެ މާލީ ހާލަތު ގޯސްވުމުގެ ސަބަބުން ގިނަ ދާއިރާތައް ރިފޯމް ކުރުމުގެ މަސައްކަތް ސަރުކާރުން ވަނީ ފަށައިފައެވެ. އެގޮތުން، ސަބްސިޑީ މުރާޖާކުރުމާއި، އާސަންދަ ރިފޯމްކުރުމުގެ އިތުރުން އެއް މަސައްކަތެއް ކުރާ މުއައްސަސާތައް އެއް ކުރުމުގެ މަސައްކަތް ވެސް މިސަރުކާރުން މިހާރު ވަނީ ފަށައިފައެވެ.
ދިވެހި ރައްޔިތުންނަށް ހިލޭ ބޭސްފަރުވާ ފޯރުކޮށްދޭ ނިޒާމު، އާސަންދައާއި ބައެއް ސަބްސިޑީތައް މުރާޖާކުރުމުގެ އިތުރުން ޚަރަދު ކުޑަކުރުމުގެ ގިނަ އިސްލާހީ ފިޔަވަޅުތަކަކާއެކު އަންނަ އަހަރު ދައުލަތުގެ ބަޖެޓުން ޖުމުލަ 11.5 ބިލިއަން ރުފިޔާ ސަލާމަތް ކުރެވޭނެ ކަމަށް ފިނޭންސް މިނިސްޓްރީން މީގެކުރިން ވަނީ ބުނެފައެވެ.