އައްޑޫ ސިޓީއިން ފުރައިގެން މާލެއަށް ދަތުރުކުރި "ސީމެކްސް" ބޯޓުގެ ފަޅުވެރިއެއް ރޭގެ ވަގުތެއްގައި ގެއްލިގެން ހޯދަން ފަށައިފިއެވެ.
ގެއްލުނު ފަޅުވެރިޔާއަކީ ނޭޕާލްގެ ރައްޔިތެއް ކަމަށްވާ ރާޖު ކުމާރެވެ.
އެކަމާ ގުޅިގެން ފުލުހުން މީޑިއާތަކާ ހިއްސާކުރި މެސެޖެއްގައި ބުނީ، އޭނާ ގެއްލިފައިވާ ކަމުގެ މައުލޫމާތު ރޭގެ ވަގުތެއްގައި ފުލުހުންނަށް ރިޕޯޓުކުރި ކަމަށެވެ.
އަދި އޭނާ ގެއްލުނީ އައްޑޫ ސިޓީއިން ފުރައިގެން މާލެއަށް ދަތުރުކުރި "ސީމެކްސް" ބޯޓަކުން ކަމަށް ފުލުހުން ބުންޏެވެ. އޭނާ ބޯޓުގައި ނެތްކަން އެނގިފައި ވަނީ އައްޑޫ ސިޓީއާ ފުވައްމުލައް ސިޓީއާ އަށް މައިލްސްއަށް ކައިރިވެފައި ވަނިކޮށް ކަމަށް ފުލުހުން މައުލޫމާތުދިނެވެ.
ފުލުހުން ބުނީ އެ ބޯޓް ރޭ 11:30 ހާއިރު އައްޑޫ ސިޓީއިން ފުރިއިރު ރާޖް ކުމާރު ބޯޓްގައި ހުރި ކަމަށެވެ. އަދި ރޭ 01:15 ހާއިރު ބޯޓްގެ ކެޕްޓަނާ އޭނާ ވާހަކަ ދެއްކި ކަމަށް ވެސް ފުލުހުން ބުންޏެވެ.
ފަޅުވެރިޔާ ހޯދުމުގެ މަސައްކަތް އެމްއެންޑީއެފް އިން ކުރަމުންދާ ކަމަށް ފުލުހުން ބުންޏެވެ.
އަދި އޭނާ ގެއްލުނު މައްސަލަ ފުލުހުން ވެސް ތަހުގީގުކުރަމުންދާ ކަމަށް ފުލުހުން ބުންޏެވެ.
ފާހަގަކޮށްލެވޭ ގޮތުގައި މިދުވަސްވަރަކީ ރާއްޖޭގެ އެކި ހިސާބުތަކަށް މޫސުން ގޯސް ދުވަސްވަރެކެވެ. އެހެންކަމުން ކަމާބެހޭ ފަރާތްތަކުން ގެންދަނީ މޫސުމަށް ސަމާލުވުމަށް ވެސް އިލްތިމާސްކުރަމުންނެވެ.