ރައްޔިތުންގެ މަޖިލީހުގެ މެންބަރުން، މެންބަރުކަމަށް އިންތިޚާބުވާ ޕާޓީ ބަދަލު ކުރުމުން، އިސްތިއުފާ ދޭން ޖެހޭ ގޮތަށް ހަދާފައިވާ އެންޓި-ޑިފެކްޝަން ގާނޫނުގެ އިސްލާހެއް ބާތިލުކުރަން ހައިކޯޓަށް ހުށަހެޅި މައްސަލަ ބޭރުކޮށްލައިފިއެވެ.
މިއީ އަމިއްލަ ފަރާތަކުން މިދިޔަ ނޮވެންބަރު 18ގައި ހައިކޯޓަށް ހުށަހެޅި މައްސަލައެކެވެ. މި މައްސަލަ ހައިކޯޓަށް ހުށަހަޅާފައިވަނީ އެންޓިޑިފެކްޝަން ގާނޫނުގެ ތިންވަނަ މާއްދާގައި މަޖިލީހުގެ މެންބަރުކަމުން ވަކިވުން ލާޒިމުކުރާ ހާލަތްތައް ބަޔާންކޮށްފައިވަނީ ގާނޫނު އަސާސީއާ ޚިލާފަށް ކަމަށްވާތީ، އެ މާއްދާ ބާތިލު ކަމަށް ކަނޑައަޅައިދިނުމަށް އެދިއެވެ.
މި މައްސަލައާ ގުޅިގެން ހައިކޯޓުން ބުނެފައިވަނީ، ގާނޫނު އަސާސީ އިސްލާހުކޮށްފައިވާތީ، އެ މައްސަލަ ހުށަހެޅިއިރު ފާހަގަކޮށްފައިވާ ސަބަބުތައް މިހާރު އޮތީ އެގޮތަށް ކަމަށް ނުވެލެވޭ ކަމަށެވެ.
އެހެންވެ، އެ މައްސަލަ ބަލައިގަނެވެން ނެތް ކަމަށް އެ ކޯޓުން ވަނީ ނިންމައިފައެވެ.
އެންޓި ޑިފެކްޝަން ގާނޫނު ފާސްކުރީ މިދިޔަ 19 ވަނަ މަޖިލީހުގެ ފަހުކޮޅު، މިދިޔަ އޭޕްރިލް މަހުގެ އެކެއްގައެވެ. އަދި ރައީސް ޑރ. މުޙައްމަދު މުއިއްޒު ބިލް ތަސްދީގު ކުރެއްވީ އޭޕްރިލް 16ގައެވެ.
އެ ގާނޫނުގައިވާގޮތުން މައިގަނޑު ތިން ހާލަތެއްގައި މެންބަރުން މަގާމުން އިސްތިއުފާދޭން ޖެހޭނެއެވެ. އެއީ،
- އިންތިޚާބުވި ޕާޓީން އަމިއްލައަށް ވަކިވުން
- އިންތިޚާބުވި ޕާޓީ ނޫން އެހެން ޕާޓީއެއްގެ ދަފުތަރުގައި ޖެހުން [ޕާޓީ ބަދަލުކުރުން]
- އަމިއްލަގޮތުން އިންތިޚާބުވާ މެންބަރަކު ޕާޓީއަކަށް ސޮއިކުރުން
އޭގެ ފަހުން މި ސަރުކާރުން ވަނީ ޕާޓީ ބަދަލުކުރުމުން ގޮނޑި ގެއްލޭ ގޮތަށް ގާނޫނުއަސާސީ އިސްލާހުކޮށްފައެވެ.
އެ އިސްލާހުގައި ވަނީ މެންބަރުން ޕާޓީ ބަދަލުކުރުމުން ނުވަތަ ޕާޓީން ވަކިކުރުމުން ނުވަތަ އެހެން ޕާޓީއަކަށް ގުޅުމުން ވަގުތުން ގޮނޑި ގެއްލޭނެ ކަމަށެވެ.
އެ އިސްލާހު ބާތިލުކުރަން ސުޕްރީމް ކޯޓަށް މައްސަލައެއް ހުށަހަޅައިފައިވާއިރު، އިދިކޮޅު އެމްޑީޕީއާއި ދަ ޑިމޮކްރެޓްސްއިން ވަނީ މައްސަލައަށް ތަދައްޚުލްވާން ނިންމައިފައެވެ.