ސޯޝަލް މީޑިއާ ނުވަތަ ޑިޖިޓަލް ވަސީލަތްތައް މެދުވެރިކޮށް ހިންގާ ސައިބާ ކްރައިމްތަކަކީ ބޮޑު ކުށްތަކުގެ ގޮތުގައި ކަނޑައެޅުމުގެ ބިލް ރައީސް ޑރ. މުޙައްމަދު މުއިއްޒު މިއަދު ތަސްދީގުކުރައްވައިފިއެވެ.
ސަރުކާރުގެ ފަރާތުން މާފުށީ ދާއިރާގެ މެންބަރު ހުސައިން ރިޒާ އާދަމް ހުށަހެޅުއްވި އެ ބިލް މަޖިލީހުން ފާސްކުރީ މިމަހުގެ ނުވަ ވަނަ ދުވަހު، 58 މެންބަރުންގެ ވޯޓުންނެވެ.
އެ ބިލުގެ މަގުސަދަކީ، ސައިބާ ކްރައިމަކީ ގާނޫނުން ކުށެއް ކަމުގައި ކަނޑައަޅައި، 10 ކުށެއް ސައިބަކްރައިމްގެ ގޮތުގައި ގާނޫނުލްއުގޫބާތަށް އިތުރުކުރުމެވެ. އެއީ:
- ހުއްދަނެތި ކޮމްޕިއުޓަރު ސިސްޓަމަކަށް އެކްސެސްވުން
- އިތުރު ކުށެއް ކުރުމަށް މަގުފަހިކުރުމުގެ ނިޔަތުގައި ހުއްދަނެތި
- ކޮމްޕިއުޓަރު ސިސްޓަމަކަށް އެކްސެސްވުން
- ހުއްދަނެތި ކޮމްޕިއުޓަރު ޑޭޓާ އިންޓަސެޕްޓުކުރުން
- ހުއްދަނެތި ކޮމްޕިއުޓަރު ޑޭޓާއަށް އިންޓަފިއަކުރުން
- ހުއްދަނެތި ކޮމްޕިއުޓަރު ސިސްޓަމަކަށް އިންޓަފިއަކުރުން
- ނަހަމަގޮތުގައި ޑިވައިސްތައް ބޭނުންކުރުން
- ސައިބާ ވަޔަލަންސްގެ އަމަލުތައް
- ކޮމްޕިއުޓަރާ ގުޅުންހުރި ފޯޖަރީގެ އަމަލުތައް
- ކޮމްޕިއުޓަރާ ގުޅުންހުރި އޮޅުވާލުމުގެ އަމަލުތައް
- ކޮޕީރައިޓާ ގުޅޭ އެއާގުޅުންހުރި އެހެނިހެން ހައްގުތަކަށް އަރައިގަތުމުގެ އަމަލުތައް
އެ ކުށްތަކަށް އަރައިގަތުމުން އެއް އަހަރާއި އެއަށް ވުރެ ބޮޑު ޖަލު ހުކުމްތައް ކުރުމުގެ ބާރު ވެސް ލިބިދީފައިވެއެވެ.
ރައީސް ޑރ. މުޙައްމަދު މުއިއްޒު: އެ މަނިކުފާނު ވަނީ ސައިބާ ކްރައިމް ބިލް ތަސްދީގުކުރައްވައިފައި -- ފޮޓޯ/ ރައީސް އޮފީސް
މީގެ އިތުރުން، ބޭރު ގައުމުތަކުގެ ހުއްދަ ހޯދުމަކާ ނުލައި، އެ ގައުމެއްގެ ކޮމްޕިއުޓަރު ޑޭޓާ ލިބިގަތުމުގެ ބާރު ރާއްޖޭގެ ތަހުގީގީ އިދާރާތަކަށް ދިނުމަށް ޖިނާއީ އިޖުރާއަތުގެ ގާނޫނަށް ގެނައި އިސްލާހުގެ ބިލް ވެސް ރައީސް ވަނީ ތަސްދީގުކުރައްވައިފައެވެ.
ޖިނާއީ އިޖުރާއަތުގެ ގާނޫނަށް އިސްލާހު ގެނައުމުގެ ބިލު ހުށަހެޅުއްްވީ ހޮޅުދޫ ދާއިރާގެ މެމްބަރު އަބްދުއްސައްތާރު މުހައްމަދެވެ. މިމަހުގެ ނުވައެއްގައި އެ ބިލް ވެސް ފާސްކުރީ 58 މެންބަރުންގެ ވޯޓުންނެވެ.
އެ އިސްލާހުގައި ވާގޮތުގައި ސައިބާ ކުށަކާ ގުޅިގެން ބޭރު ގައުމެއް ނުވަތަ ބޭރުގެ އެޖެންސީއަކާއެކު ރާއްޖޭގެ އިދާރާތަކަށް މަސައްކަތް ކުރެވިދާނެއެވެ. އަދި ޖިނާއީ ތަހުގީގު ހިންގުމުގެ ބާރު ލިބިފައިވާ އިދާރާއަކަށް ބޭރު ގައުމެއްގެ ހުއްދަ ހޯދުމަކާ ނުލައި މައުލޫމާތު ހޯދުމުގެ ބާރު ވެސް އެ އިސްލާހާއެކު ވަނީ ދީފައެވެ.
އިސްލާހުގައިވާގޮތުން ބޭރުގައި ހުރި ކޮމްޕިއުޓަރު ސިސްޓަމެއްގައި ރައްކާކޮށްފައިހުރި ޑޭޓާއަށް އެކްސެސްވެވޭނީ ދެ ހާލަތެއްގައެވެ. އެއީ އަމިއްލަ ފަރުދުންގެ ފުރާނައަށް ނުވަތަ ސަލާމަތަށް ބޮޑު ނުރައްކަލެއް ކުރިމަތިވުމުގެ ފުރުސަތު އޮތް ހާލަތެއްގެ އިތުރުން ރާއްޖޭގައި ގެއްލުން ލިބުނު މީހުންގެ އަދަދަށް ބަލައި، އިގުތިސާދީ ގޮތުން ބޮޑު ގެއްލުމެއް މެދުވެރިވެއްޖެ ހާލަތުގައެވެ.
އެ ދެ ބިލް ވެސް ރައީސް ތަސްދީގުކުރެއްވުމުން ގެޒެޓުކޮށް، މިއަދު ވަނީ އަމަލުކުރަން ފަށައިފައެވެ.
ރާއްޖޭގައި އީމެއިލްއާއި ސޯޝަލް މީޑިއާ އެޕްތައް ހެކްކޮށް، މީހުންގެ ޒާތީ މައުލޫމާތު ހޯދައި، ފައިސާ ފޭރުމުގެ މައްސަލަތައް ވެސް ގިނަ އަދަދަކަށް ހިނގައިފައިވެއެވެ.