މި ސަރުކާރުން ދަނީ، ރައްޔިތުންގެ އަޑު އެހުމަކާ ނުލައި އަމިއްލަ މަންފާއަށް ބޭކާރު ޚަރަދުތައް ކުރަމުން ކަމަށް އެމްޑީޕީގެ ރައީސް އަބްދުﷲ ޝާހިދު މިއަދު ވިދާޅުވެއްޖެއެވެ.
އެކްސްގައި ކުރެއްވި ޕޯސްޓެއްގައި ޝާހިދު ވިދާޅުވި ގޮތުގައި، މި އަހަރު ނިމޭއިރު ސަރުކާރުގެ މާލީ ހިސާބުތަކުން ދިވެހީންގެ ހިތްތަކަށް ހިތްހަމަޖެހުމެއް އަދި ފިނިކަމެއް ލިބޭ ތަނެއް ނުފެނުނެވެ.
"އެންމެހާ ދިވެހިން، ކޮއްޕަމުން، ލަވަމުން، ވައްދަމުން އެގެންދަނީ ނުތަނަވަސްކަމާއި ކަންބޮޑުވުމެއްގެ ތެރެއަށް. އަޅުވެތިކަމުގެ ބަނދެލުމަކުން ދިވެހިން ބަނދެލުމަށް މި ސަރުކާރުން އެވަނީ މިސްރާބު ހިފާފައި،" އޭނާ ވިދާޅުވިއެވެ.
ފިނޭންސް މިނިސްޓްރީން އެންމެ ފަހުން އާންމުކޮށްފައިވާ، ޚަރަދުތަކުގެ ތަފާސްހިސާބަށް އިޝާރާތް ކުރައްވައި ޝާހިދު ވިދާޅުވީ އާސަންދައަށް ސަރުކާރުން ކުރި ޚަރަދުން 101 މިލިއަން ރުފިޔާމަދުކުރިއިރު، އިވެމުންދަނީ ނިކަމެތި ރައްޔިތުމީހާ، އާސަންދައަށް އެދި ރޮއެ، ކުރާ އާދޭހުގެ ހިތްދަތި އަޑު ކަމަށެވެ. އެހެން ނަމަވެސް ސިޔާސީ މުވައްޒަފުންނާ ގުޅުންހުރި ޚަރަދުތަކަށް 1.4 ބިލިއަން ރުފިޔާ އިތުރަށް ޚަރަދުކޮށްފައިވާކަން އޭނާ ފާހަގަކުރެއްވިއެވެ.
"އާންމު ރައްޔިތުންގެ ވޭނުގެ އަޑު އެހުމާއި ނުލައި ކުރިއަށްދަނީ ސަރުކާރުގެ އިސްވެރިންގެ ޒާތީ މަންފާއަށް ކުރާ ބޭކާރު ހޭދަތަކާއި އެމަގަށް ކުރާ މަސައްކަތްތައް," ޝާހިދު ތުހުމަތު ކުރެއްވިއެވެ.
މި ސަރުކާރުން ވެރިކަމާ ހަވާލުވީއިރު ގައުމު ދިޔައީ ބަނގުރޫޓުވަމުން ކަމަށް ރައީސް ޑރ. މުހައްމަދު މުއިއްޒު ތަކުރާރުކޮށް ވިދާޅުވެއެވެ. އިގުތިސާދީ ހާލަތު ރަނގަޅު ކުރުމަށް ސަރުކާރުން ވަނީ ގިނަ ފިޔަވަޅުތަކެއް އަޅައިފައެވެ. އޭގެ ތެރޭގައި ޓޫރިޒަމް ވިޔަފާރިތަކުން ދިވެހި ބޭންކުތަކަށް އާމްދަނީގެ 20 ޕަސަންޓު ޑޮލަރުން މާރުކުރަންޖެހޭގޮތަށް ގާނޫނު އިސްލާހު ކުރުމާއި، އެއާޕޯޓު ޓެކުހާއި ފީތައް ބޮޑުކުރުމާއި، އާސަންދަ ރިފޯމު ކުރުމުގެ އިތުރުން ސިޔާސީ މުވައްޒަފުންގެ މުސާރަ ކުޑަކުރަން ނިންމުން ފާހަގަކުރެވެއެވެ.
މި ފިޔަވަޅުތަކުގެ ސަބަބުން އެ ކަމުގެ ފައިދާ ލިބިގެންދާނީ ރައްޔިތުންނަށް ކަމަށް ސަރުކާރުން ބުނެއެވެ.
މި ބަދަލުތަކާ އެކު ބޭރުގެ މާލީ އިދާރާތަކުން ވެސް ވަނީ ރާއްޖޭގެ އިގުތިސާދީ ރަނގަޅު ހާލަތަށް އިޔާދަކުރުމަށް ސަރުކާރުން ކުރަމުން ގެންދާ މަސައްކަތް ފާހަގަކޮށްފައެވެ.
މިމަހުގެ ފަސް ވަނަ ދުވަހުގެ ނިޔަލަށް ދައުލަތުގެ އާމްދަނީ އާއި ޚަރަދުތައް ހުރި މިންވަރާ ގުޅޭ ގޮތުން ފިނޭންސްއިން އާންމުކޮށްފައިވާ ތަފާސްހިސާބުން ދައްކާ ގޮތުގައި މިއަހަރުގެ އެހާތަނަށް އާމްދަނީގެ ގޮތުގައި 31.9 ބިލިއަން ރުފިޔާ ލިބިފައިވެއެވެ. މިދިޔަ އަހަރު އެ މުއްދަތުގައި ލިބިފައި ވަނީ 31.1 ބިލިއަން ރުފިޔާއެވެ.
ޚަރަދަށް ބަލާއިރު، މިއަހަރު 43.6 ބިލިއަނަށް އަރައިފައިވާއިރު، މިދިޔަ އަހަރު މި މުއްދަތުގައި ޚަރަދުތައް ހުރީ 42.9 ބިލިއަން ރުފިޔާގައެވެ.