ވޭޕް އެތެރެކޮށް އޭގެ ވިޔަފާރި ކުރުމާއި އެ ބޭނުން ކުރުން ފެށިގެން މަނާވެއްޖެއެވެ.
މި ކަން މަނާވީ ދުންފަތް ކޮންޓްރޯލް ކުރުމާ ބެހޭ ގާނޫނަށް އިސްލާހު ގެނައުމުގެ ބިލު، ރައީސް ޑރ. މުޙައްމަދު މުއިއްޒު މިދިޔަ މަހު 13ގައި ތަސްދީގު ކުރެއްވުމާއެކުގައެވެ.
ވޭޕުކުރުމާއި، އެ ވިއްކުމާއި، އޭގެ އެއްވެސް މުއާމަލާތެއް ކުރުން މަނާވެފައިވާއިރު، އެފަދަ ކަމެއް ކޮށްފިނަމަ ހަރުކަށި ޖޫރިމަނާ އަދަބު ދޭން ވަނީ ކަނޑައަޅައިފައެވެ. އޭގެ ތެރޭ ހިމެނެނީ:
-
ވޭޕް ބޭނުންކޮށްފިނަމަ / 5000 ރ. ޖޫރިމަނާ
-
ވޭޕް ވިއްކާ ކޮންމެ މީހަކު / 20،000 ރ. ޖޫރިމަނާ
-
ވިއްކާ ކޮންމެ ވޭޕަކަށް / 10،000 ރ. ޖޫރިމަނާ
-
ހިލޭ ވެސް ވޭޕެއް ދީފިނަމަ / 10،000 ރ. ޖޫރިމަނާ
މި އިސްލާހުގެ ބޭނުމަކީ އީ-ސިނގިރޭޓާއި، ވޭޕްކުރުމަށް ބޭނުންކުރާ އާލާތްތަކާއި، އެ އެއްޗިއްސާއެކު ބޭނުންކުރުމަށް ތައްޔާރުކޮށްފައިވާ އުފެއްދުންތައް ރާއްޖެއަށް އެތެރެކުރުމާއި، ވިއްކުމާއި، ހިލޭ ބެހުމާއި، ބޭނުންކުރުން މަނާކުރުމެވެ.
އަދި ގާނޫނާ ޚިލާދަށް އަމަލުކުރާ ފަރާތްތަކާމެދު ގާނޫނުގެ ދަށުން އެޅޭނެ ފިޔަވަޅުތައް އިތުރުކުރުމަށާއި އެ ނޫންވެސް ގާނޫނު ތަންފިޒުކުރުމުގައި ދިމާވާ ދަތިތައް ހައްލުކުރުމެވެ.
ދުންފަތުގެ އިސްތިއުމާލުކުރުމުން ސަލާމާތްވާން ބޭނުންވާ މީހުންނަށް ކޮންމެ ރަށެއްގައި ވެސް މިހާރު ސިޒޭޝަން ކްލިނިކްގެ ޚިދުމަތް ލިބޭނެހެން ވަނީ ގާއިމްކޮށްފައެެވެ. އެހީ ހޯދުމަށް ކުއިޓްލައިން 1676 އަށް ވެސް ގުޅޭނެއެވެ.