މި ސަރުކާރުން މަސްވެރިންނަށް 48 ގަޑިއިރު ތެރޭ ފައިސާ ދޫކުރަން ފެށީ ދެކޮޅު ޖެހޭނެ ގޮތަކަށް ނޫން ކަމަށާއި އެއީ ފުލެއް ނެތް ހައްލެއް ކަމަށް ވިދާޅުވެ، ކުރީގެ ރައީސް އަބްދުﷲ ޔާމީން އަބްދުލްގައްޔޫމް ރޭ އެ ކަމަށް ވަރަށް ބޮޑަށް ފާޑުވިދާޅުވެއްޖެއެވެ.
ސަރުކާރުން ވަނީ އަންގާރަ ދުވަހުން ފެށިގެން ބޭންކް އޮފް މޯލްޑިވްސް (ބީއެމްއެލް) މެދުވެރިކޮށް މަސްވެރިންނަށް 48 ގަޑިއިރު ތެރޭ ފައިސާ ދޫކުރަން ފަށައިފައެވެ.
ސަރުކާރަށް ވަރަށް ބޮޑަށް ފާޑުކިޔާ ޔާމީންގެ އަމިއްލަފުޅު ޕާޓީ ޕީއެންއެފުން ސިލްސިލާކޮށް ބާއްވާ ޖަލްސާތަކުގެ ތެރެއިން ރޭގެ ޖަލްސާގައި ވާހަކަދައްކަވަމުން އެ މަނިކުފާނު ވިދާޅުވީ، މި ސަރުކާރުން ކުރާ ހަމައެކަނި ކަމަކީ އެކިއެކި ތާރީޚުތައް ރައްޔިތުންނަށް ދިނުމާއި ބަހަނާ ދެއްކުން ކަމަށެވެ.
އެ ގޮތުން، އެއް ކަމަކަށް ޔާމީން ފާހަގަކުރެއްވީ މި އަހަރު ކަމެއްނުވީ ބަޖެޓު އޮތް ގޮތުން ކަމަށް ރައީސް ޑރ. މުހައްމަދު މުއިއްޒު ވިދާޅުވި ވާހަކަފުޅެވެ. ޔާމީން ވިދާޅުވީ، ޕީއެންސީގެ މެޖޯރިޓީ އޮތް މަޖިލީހަށް ސަޕްލިމެންޓަރީ ބަޖެޓު ހުށަހަޅައިގެން ކަންކަން އިސްލާހުކުރެވޭނެ ކަމަށާއި ބަޖެޓު އޮތް ގޮތުން ކަންކަންނުވީ ކަމަށް ވިދާޅުވުމަކީ ދެކޮޅުޖެހޭ ވާހަކައެއް ނޫން ކަމަށެވެ.
މަސްވެރިންނަށް ފައިސާ ދޫކުރަން ފެށިކަން ފާހަގަކުރައްވައި އެ މަނިކުފާނު ވިދާޅުވީ، އެއީ ވެސް ފުލެއް ނެތް ހައްލެއް ކަމަށެވެ.
"މިފްކޯއާއި ދެން އޮތީ ފިނޭންސް މިނިސްޓްރީ. ދެން އޮތީ ބީއެމްއެލް. މި ތިން ތަން ސިންޑިކޭޓްކޮށްގެން ފައިސާ ހޯދާ ވާހަކަ. މިފްކޯއަކީ ބަނގުރޫޓުވެފައި އޮތް ތަނެއް. އެ މީހުން އެ މީހުންގެ ސަޕްލަޔަރުންނަށް ފައިސާ ނުދައްކާ އެ އުޅެނީ. ދެން މިފްކޯއިން ލާނެ ލާރިއެއް ނޯންނާނެ މިއަކަށް،" ޔާމީން ވިދާޅުވިއެވެ.
"ދެން އޮތީ މިނިސްޓްރީ އޮފް ފިނޭންސް. ފިނޭންސުން އެ އުޅެނީ މި އަންނަ މަހުގެ މުސާރަ ދެވޭނެ ގޮތެއް ނެތިގެން. ބަނގުރޫޓުވެފައި އޮތް ތަނެއް. ފައިސާއެއް އޮތް ތަނެއް ނޫން އެއީއެއް،"
ކުރީގެ ރައީސް ޔާމީން: އެ މަނިކުފާނު ވިދާޅުވީ މަސްވެރިންނަށް ފައިސާ ދޫކުރަނީ ދެކޮޅުޖެހޭ ގޮތަކަށް ނޫން ކަމަށް -- ފޮޓޯ/ ޕީއެންއެފް
އެ މަނިކުފާނު ވިދާޅުވީ، ބީއެމްއެލް ހިމެނޭހެން ފިނޭންސް މިނިސްޓްރީއާއި މިފްކޯއަކީ ވެސް އެ ކަމަށް ބޭނުންވާ ފައިސާ ހުރި ތަންތަނެއް ނޫން ކަމަށެވެ. އެހެންވެ، އެއީ ދެކޮޅު ޖެހޭނެ ކަމެއް ނޫން ކަމަށް އެ މަނިކުފާނު ގަބޫލުކުރައްވައެވެ.
ޔާމީން ވިދާޅުވީ، މަސްވެރިންނަށް 48 ގަޑިއިރު ތެރޭ ފައިސާ ދޫކުރުމަކީ ބީއެމްއެލަށް ވެސް ކުރެވޭވަރުގެ ކަމެއް ނޫން ކަމަށެވެ. އެކަމަކު، އެއީ ސަރުކާރު ހިއްސާވާ ކުންފުންޏެއްވީމާ ވީވަރަކުން ސަރުކާރުން އެދޭ ކަންކަން ކޮށްދެނީ ކަމަށާް އެ މަނިކުފާނު ވިދާޅުވިއެވެ.
"ބީއެމްއެލް އެކަނި ކިހިނެއްހެއްޔޭ މަސްވެރިން ބާނާ މަހުގެ ކަންތައް އެ ބުނާ ގޮތަށް ކުރާނީ. އެހެންވީމާ ރައްޔިތުން ގަބޫލުކުރާނެ ކަމަށް މި ކަހަލަ ދޭސީ، ދެއުޅިއެއްނުވާ ވާހަކަދައްކާފައި ރައްޔިތުންގެ ބޮލަށް ހަމަ ޗިޕު ޖެހުން ނޫން ކަމެއް ނުކުރޭ ނޫންތޯ،" އެ މަނިކުފާނު ވިދާޅުވިއެވެ.
މަސްވެރިންނަށް އަންގާރަ ދުވަހުން ފެށިގެން ބީއެމްއެލް މެދުވެރިކޮށް 48 ގަޑިއިރު ތެރޭ ފައިސާ ދޫކުރާނެކަން ރައީސް އިއުލާނުކުރެއްވީ ކ. ގާފަރު ރައްޔިތުންނާ މުޚާތަބުކޮށް ވާހަކަދައްކަވަމުންނެވެ.
އެ މަނިކުފާނު ވިދާޅުވީ، އެކަން ކުރަނީ ފިނޭންސް މިނިސްޓްރީއާއި މިފްކޯއާއި ބީއެމްއެލް އެކުވެގެން ކަމަށެވެ. އެ ކަން ކުރާ ގޮތުގެ ތަފުސީލެއް އެ މަނިކުފާނު ހިއްސާއެއް ނުކުރައްވައެވެ.