އާންމު ރައްޔިތުން ސައިބަ ސެކިއުރިޓީއަށް އަހުލުވެރި ކުރުވުމަށް ބާއްވާ "ސައިބަ އެކްސްޕޯ 2024" ހުޅުވައިފިއެވެ.
ހުޅުމާލޭ ސެންޓްރަލް ޕާކުގައި އެ ކަމަށް ޓަކައި ބޭއްވި ރަސްމިއްޔާތުގައި މި އެކްސްޕޯ ހުޅުއްވައިދެއްވީ ޑިފެންސް މިނިސްޓަރު ގައްސާން މައުމޫނެވެ.
ހުޅުމާލެ ސެންޓްރަލް ޕާކުގައި ކުރިއަށް ގެންދިއުމަށް ހަމަޖެހިިފައިވާ މި ސައިބަ އެކްސްޕޯއަކީ ސަރުކާރުގެ މުއައްސަސާތަކާއި ކުންފުނިތަކާއި އަމިއްލަ ކުންފުނިތަކާއި ފަންނީ ބޭފުޅުންނަށް ހުޅުވާލައިގެން ކުރިއަށް ގެންދިއުމަށް ހަމަޖެހިފައިވާ އެކްސްޕޯއެކެވެ.
މި އެކްސްޕޯ ކުރިޔަށްދާނީ މިއަދުން ފެށިގެން ހުކުރުގެ ނިޔަލަށެވެ. މިއީ އެންމެން ގުޅިގެން ރައްކާތެރި ޑިޖިޓަލް މާހައުލެއް ގާއިމުކުރުމާއި އާންމު ރައްޔިތުން ސައިބަ ސެކިއުރިޓީއަށް އަހުލުވެރިކުރުވުމަށް ބާއްވާ އެކްސްޕޯއެކެވެ.
އަދި މި އެކްސްޕޯ ވެގެންދާނީ ސައިބަ ސެކިއުރިޓީއަށް ބޭނުންކުރެވޭ ގެޖެޓްތަކާއި ޚިދުމަތްތައް އެއްތަނަކުން ބަލާލެވޭނެ އަދި އާއްމުކޮށް ކުރިމަތިވާ ސައިބަ އެޓޭކްތަކާއި މިފަދަ އެޓޭކްތައް ހުއްޓުވަން ކުރެވިދާނެ ކަންކަމާމެދު މި ދާއިރާގެ ފަންނީ މާހިރުންނާ މަޝްވަރާކޮށްލަން ލިބޭނެ ރަނގަޅު ފުރުސަތަކަށެވެ.