އެމެރިކާގެ ސާޗް އިންޖީން ސްޓާޓްއަޕް ކުންފުނި ޕަޕްލެކްސިޓީ އޭއައި އިން ޓިކްޓޮކްގެ ޗައިނީސް މައި ކުންފުނި ބައިޓްޑާންސް އަށް، ޓިކްޓޮކް ޔޫއެސްއާއެކު އެއްވުމުގެ ހުށަހެޅުމެއް ހުށަހަޅާފައިވާ ކަމަށް އެކުންފުންޏާ ހަވާލާދީ ރޮއިޓާސް އިން ބުނެފިއެވެ.
ޓިކްޓޮކް އަކީ ބައިޓްޑާންސް އާއި ގުޅުން ކަނޑާނުލައިފިނަމަ އާދިއްތަ ދުވަހުން ފެށިގެން އެމެރިކާގައި މަނާ ކުރެވޭނެ އެޕްލިކޭޝަނެކެވެ. ނަމަވެސް އިންތިޚާބުވެފައިވާ ރައީސް ޑޮނަލްޑް ޓްރަމްޕް ވިދާޅުވެފައިވަނީ ހޯމަ ދުވަހު މި ކުންފުންޏަށް 90 ދުވަހުގެ މުއްދަތެއް ދެއްވުމަށް ވިސްނާވަޑައިގަންނަވާ ކަމަށެވެ.
މި މަސައްކަތުގެ ދަށުން، ޕަޕްލެކްސިޓީ އާއި ޓިކްޓޮކް ޔޫއެސް އެއްވެ، ނިއު ކެޕިޓަލް ޕާޓްނަސް އާއި އެކު އައު ވިޔަފާރިއެއް އުފައްދާނެ ކަމަށް މަޢުލޫމާތު ދިން ފަރާތުން ބުނެފައިވާކަމަށް ރޮއިޓާސްއިން ބުނެފައިވެއެވެ. މި ހުށަހެޅުގެ ސަބަބުން ބައިޓްޑާންސްގެ ގިނަ އިންވެސްޓަރުންނަށް އެފަރާތްތަކުގެ ހިއްސާ ދެމެހެއްޓުމުގެ ފުރުސަތު ލިބޭނެއެވެ.
ޕަޕްލެކްސިޓީ އޭއައި އަކީ ބޮޑެތި ލޭންގުއޭޖް މޮޑެލްތަކުގެ ބޭނުން ހިފައިގެން، ސުވާލުތަކަށް އަވަސް ޖަވާބު ދިނުމުގެ ޓެކްނޮލޮޖީ ތަރައްގީކޮށްފައިވާ ކުންފުންޏެކެވެ.
ޓިކްޓޮކް ވަނީ އާދިއްތަ ދުވަހުން ފެށިގެން އެމެރިކާގައި ބްލެކްއައުޓް ކުރެވޭނެ ކަމަށް ބުނެފައެވެ. މިއީ އެޕަލް އަދި ގޫގުލް ފަދަ ކުންފުނިތަކަށް ބައިޑެންގެ ސަރުކާރުން އެކަށީގެންވާ ޔަގީންކަމެއް ނުދޭނަމަ، އަޅާނެ ފިޔަވަޅެއް ކަމަށް ބުނެފައިވެއެވެ.
އެމެރިކާގައި 170 މިލިއަނަށްވުރެ ގިނަ ޔޫސަރުން ބޭނުންކުރާ ޓިކްޓޮކް އެޕްލިކޭޝަނަކީ ޗައިނާގެ ސަރުކާރުން އެމެރިކާގެ ރައްޔިތުންގެ މައުލޫމާތު ހޯދުމަށް ބޭނުންކުރެވިދާނެ އެޕްލިކޭޝަނެއް ކަމުގެ ބިރު އޮތުމާ ގުޅިގެން، އެޤައުމުގެ ގައުމީ ސަލާމަތަށް ނުރައްކަލެއް ކަމުގައި ބައިޑެންގެ ސަރުކާރުން ބަލައި، ވޭތުވެދިޔަ އަހަރުތަކުގައި އެކި ފިޔަވަޅުތައް އަޅަމުން އަންނަ އެޕްލިކޭޝަނެކެވެ.
ޓިކްޓޮކް އިން ބުނެފައިވަނީ އެ އެޕްލިކޭޝަން ތެރެއިން އެއްވެސް މައުލޫމާތެއް ޗައިނާގެ ސަރުކާރާ ހިއްސާނުކުރާ ކަމަށެވެ.