އެމެރިކާގައި ޓިކްޓޮކް ބޭން އުވައިލަން އެގައުމުގެ އިންތިޚާބީ ރައީސް ޑޮނަލްޑް ޓްރަމްޕް ހުއްދަ ދެއްވުމާ ގުޅިގެން، އެ އެޕްލިކޭޝަންގެ ޚިދުމަތް އިއްޔެއިން ފެށިގެން އަލުން ފަށައިފިއެވެ.
ރައީސްކަމާ ހަވާލުވުމުގެ ކުރިން ބޭއްވި ރެލީއެއްގައި ޓްރަމްޕް ވިދާޅުވީ 170 މިލިއަން އެމެރިކާ ރައްޔިތުން ބޭނުންކުރާ މި އެޕްލިކޭޝަން އަލުން ފެށުމަށްޓަކައި ޖޮއިންޓް ވެންޗާއެއް އުފެއްދުމަށް މަސައްކަތްކުރާނެ ކަމަށެވެ.
"ޙަޤީޤަތުގައި އަޅުގަނޑުމެންނަށް އެހެން ގޮތެއް ނެތް. އަޅުގަނޑުމެން އެބަޖެހޭ މިކަން ސަލާމަތްކުރަން،"
ރެލީގެ ކުރިން ޓިކްޓޮކްގެ ޔޫޒަރުންނަށް ޓިކްޓޮކުން ފޮނުވި މެސެޖެއްގައި، "ރައީސް ޓްރަމްޕްގެ މަސައްކަތްޕުޅާ ގުޅިގެން، ޓިކްޓޮކް މިހާރު ވަނީ އެމެރިކާގައި އަލުން ފަށާފައި" ކަމަށް ބަޔާންކޮށްފައިވެއެވެ.
ޓިކްޓޮކްގެ ވެބްސައިޓަށް ވަދެވޭ ކަމަށާއި، އެޕްލިކޭޝަންގެ އަސާސީ ބައެއް ޚިދުމަތްތައް ވެސް ބައެއް ޔޫޒަރުންނަށް ލިބެން ފަށާފައިވާ ކަމަށް ޓިކްޓޮކްއިން ބުނެފައިވެއެވެ. ނަމަވެސް އާދީއްތަ ދުވަހުގެ ރޭއާ ހަމައަށް ވެސް އެމެރިކާގެ އެޕް ސްޓޯތަކުން ޓިކްޓޮކް ޑައުންލޯޑް ކުރެވޭކަށް ނެތެވެ.
ޓްރަމްޕް ރައީސްކަމާ ހަވާލުވުމުގެ ކުރިން ޓިކްޓޮކްއިން ޓްރަމްޕަށް ޝުކުރު އަދާކުރި އަދާކުރުމަކީ، އެމެރިކާއާއި ޗައިނާގެ ގުޅުން ނާޒުކު ދަނޑިވަޅެއްގައި ކުރި ކަމެކެވެ.
ވޮޝިންގްޓަންގައި ހުންނަ ޗައިނާގެ އެމްބަސީން ހުކުރު ދުވަހު ބުނެފައިވަނީ ޓިކްޓޮކް ހުއްޓުވުމަކީ އެމެރިކާއިން ދައުލަތުގެ ބާރު ނަހަމަ ގޮތުގައި ބޭނުންކުރުން ކަމަށެވެ. މިކަމާ ގުޅިގެން ޗައިނާއިން އެގައުމުގެ ހައްގުތަކާއި މަސްލަހަތުތައް ހިމާޔަތްކުރުމަށް އަޅަންޖެހޭ ހުރިހާ ފިޔަވަޅެއް އަޅާނެ ކަމަށް ޗައިނާގެ ސަރުކާރުގެ ބުނެފައިވެއެވެ.
ސަލާމަތީ ޤާނޫނުގެ ދަށުން އާދީއްތަ ދުވަހު ތަންފީޒުކުރަން ނިންމާފައިވާ ޓިކްޓޮކް ހުއްޓާލުމުގެ ފިޔަވަޅުގެ ކުރިން، ހޮނިހިރު ދުވަހުގެ ރޭ އެމެރިކާގެ ޔޫޒަރުންނަށް ޓިކްޓޮކް ބޭނުންކުރުން ވަނީ ހުއްޓިފައެވެ.
ޓިކްޓޮކްގެ މައްސަލައަކީ އެމެރިކާއާއި ޗައިނާގެ ދެމެދު އުފެދިފައިވާ ވިޔަފާރީގެ ހަނގުރާމައިގެ އެއް ބައެވެ. 2020ވަނަ އަހަރު އެމެރިކާގެ ކުރީގެ ރައީސް ޑޮނަލްޑް ޓްރަމްޕް ވަނީ ޓިކްޓޮކްއާ ދެކޮޅަށް އެގްޒެކެޓިވް އޯޑަރެއްގައި ސޮއިކުރައްވާފައެވެ. އެއީ ޗައިނާގެ ބައިޓްޑާންސް ކުންފުނިން އެމެރިކާގެ ޔޫޒަރުންގެ ޑޭޓާ ޗައިނާގެ ސަރުކާރާ ހިއްސާކޮށްފާނެކަމުގެ ބިރަށްޓަކައެވެ.
ޓިކްޓޮކްގެ މައްސަލައަކީ އެމެރިކާގެ ގައުމީ ސަލާމަތަށް ނުރައްކަލެއް ކަމަށް ބުނެ، އެމެރިކާގެ ވިޔަފާރިތަކަށް އެ އެޕްލިކޭޝަން ވިއްކުމަށް މަޖުބޫރުކުރުމަށް ޓްރަމްޕް ސަރުކާރުން މަސައްކަތްކުރިއެވެ. ނަމަވެސް ޗައިނާގެ ސަރުކާރުން ވަނީ މި މައްސަލައިގައި އެމެރިކާގެ ސަރުކާރުން އަމަލުކުރާ ގޮތާމެދު ހަރުކަށި އިބާރާތުން ފާޑުކިޔާފައެވެ.
ދުނިޔޭގެ އެންމެ މަޤުބޫލު އެއް ސޯޝަލް މީޑިއާ އެޕްލިކޭޝަނަށްވެފައިވާ ޓިކްޓޮކްގައި މިހާރު 170 މިލިއަނަށްވުރެ ގިނަ އެމެރިކާ ރައްޔިތުން ރަޖިސްޓްރީވެފައިވެއެވެ.