އިންސްޓަގްރާމުން ވީޑިއޯ އެޑިޓް ކުރެވޭ އެޕެއް "އެޑިޓްސް" ނަމުގައި ތައާރަފުކުރުމަށް ނިންމައިފިއެވެ.
މި އިއުލާނު ކޮށްފައިމިވަނީ އެމެރިކާގެ އިންތިޚާބީ ރައީސް ޑޮނަލްޑް ޓްރަމްޕް، ޓިކްޓޮކް ބަންދުކުރުމަށް ނެރެފައިވާ ގާނޫނަށް ވަގުތީ ލުޔެއް ދޭނެކަމަށް ބުނުމާ ދިމާކޮށެވެ.
އިންސްޓަގްރާމްގެ ވެރިޔާ އާދަމް މޮސެރީ ވިދާޅުވި ގޮތުގައި "އެޑިޓްސް" އަކީ ހަމައެކަނި ވީޑިއޯ އެޑިޓްކުރާ އެޕެއް ނޫނެވެ. މިއީ މޯބައިލް ވީޑިއޯ އުފެއްދުމަށް ބޭނުންވާ ހުރިހާ ވަސީލަތްތަކެއް އެއްތަނަކުން ލިބޭނެ އެޕެކެވެ. މި އެޕް މާރިޗު 13ގައި ރަސްމީކޮށް ނެރުމަށް ވަނީ ހަމަޖެހިފައެވެ.
މި އިއުލާނު ކުރެވުނީ ޓިކްޓޮކާއި އޭގެ ވީޑިއޯ އެޑިޓިން އެޕްކަމަށްވާ ކެޕްކަޓް އެމެރިކާގައި ބަންދުކުރުމަށް އައު ގާނޫނެއް ފާސްވެފައިވަނިކޮށެވެ. ޖެނުއަރީ 19ގައި އެމެރިކާގެ ސުޕްރީމް ކޯޓުން ވަނީ ޓިކްޓޮކްގެ ޗައިނާގެ މައި ކުންފުނި ބައިޓްޑާންސްއިން އެޕް ވިއްކާލަންޖެހޭނެ ކަމަށް ނިންމައިފައެވެ. އެހެންނޫންނަމަ އެމެރިކާގައި އެޕް ބަންދުކުރަންޖެހޭނެއެވެ.
އެހެންނަމަވެސް ރައީސް ޓްރަމްޕް ވަނީ މި ގާނޫނު ތަންފީޒުކުރުން ފަސްކުރުމަށް އެގްޒެކެޓިވް އަމުރެއް ނެރުއްވާނެ ކަމަށް ވިދާޅުވެފައެވެ. މިއީ އެމެރިކާގެ ގައުމީ ސަލާމަތަށް ރައްކާތެރި ޙައްލެއް ހޯދުމަށް ވަގުތު ހޯދުމަށް ކަމަށް އެ މަނިކުފާނު ވިދާޅުވިއެވެ. މިހާރު ވަނީ ޓިކްޓޮކްގެ ޚިދުމަތް އެމެރިކާގައި އަލުން ދޭން ފެށިފައެވެ.
އެމަނިކުފާނުގެ ވިސްނުމަކީ ޓިކްޓޮކްގެ ބައެއް އެމެރިކާގެ ވެރިފަރާތްތަކަށް ލިބޭނެ ގޮތެއް ހެދުމެވެ. މި ނިންމުމާ ގުޅިގެން ޓިކްޓޮކް ބަންދުކުރުމަށް ތާއީދުކުރާ ފަރާތްތަކަށް ގާނޫނީ ފިޔަވަޅު ނޭޅޭނެ ކަމަށް ވެސް އެމަނިކުފާނު ވަނީ ވިދާޅުވެފައެވެ.