ބޭރު ފައިސާއާ ބެހޭ ބިލު ދިރާސާކުރުމަށް މިއަދު ބޭއްވި ރައްޔިތުންގެ މަޖިލީހުގެ މާލިއްޔަތު ކޮމިޓީގެ ބައްދަލުވުން، މޯލްޑިވްސް އެސޯސިއޭޝަން ފޯ ޓޫރިޒަމް އިންޑްސްޓްރީ (މަޓީ)ގެ އެދުމުގެ މަތިން ސިއްރުކޮށްފިއެވެ.
ސަރުކާރުގެ ފަރާތުން ބޭރު ފައިސާއާ ބެހޭ ބިލު ހުށަހެޅުއްވީ ޕީއެންސީ ޕާލިމެންޓްރީ ގްރޫޕްގެ ލީޑަރު އަދި އިނގުރައިދޫ ދާއިރާގެ މެންބަރު އިބްރާހީމް ފަލާހެވެ. އިއްޔެގެ ޖަލްސާގައި އެ ބިލު މަޖިލީހުން ބަލައިގަނެ، މާލިއްޔަތު ކޮމިޓީއަށް ފޮނުވީ 51 މެންބަރުންގެ ވޯޓާއެކުއެވެ. ބިލު ބަލައިގަތުމާ ދެކޮޅަށް ވޯޓުދެއްވީ އެންމެ ހަތަރު މެންބަރުންނެވެ.
ބިލު ދިރާސާކުރުމަށް މިއަދު ބޭއްވި މާލިއްޔަތު ކޮމިޓީގައި މަޓީން ވަނީ ބައިވެރިވެފައެވެ.
ކޮމިޓީ ފައްޓަވައި ކޮމިޓީގެ ނައިބު މުގައްރިރު، އޭދަފުށީ ދާއިރާގެ މެންބަރު އަހުމަދު ސަލީމް ވިދާޅުވީ މަޓީން ހުށަހަޅާފައި ވަނީ ބައްދަލުވުން ސިއްރުކުރަން ކަމަށެވެ.
އެއާއެކު ބާރަށު ދާއިރާގެ މެންބަރު އިބްރާހީމް ޝުޖާއު ވަނީ ކޮމިޓީ ސިއްރުކުރަން ހުށަހަޅުއްވާފައެވެ. އެ ހުށަހެޅުމަށް ތާއީދުކުރެއްވީ ހަނިމާދޫ ދާއިރާގެ މެންބަރު އަބްދުލްޣަފޫރު މޫސާއެވެ.
އެއާއެކު ކޮމިޓީގެ އިއްތިފާގުން ފާސްކުރީ އެ ބައްދަލުވުން ސިއްރުކުރުމަށެވެ.
މާލިއްޔަތު ކޮމިޓީގެ ބައްދަލުވުން: މަޓީގެ އެދުމަށް، ބޭރު ފައިސާއާ ބެހޭ ބިލުގެ ކޮމިޓީ ސިއްރުކޮށްފައި -- ފޮޓޯ/ މަޖިލިސް
ފާހަގަކޮށްލެވޭ ގޮތުގައި، ފަތުރުވެރިންނަށް ޚިދުމަތްދޭ ތަންތަނަށް އަންނަ ކޮންމެ ފަތުރުވެރިއެއްގެ ބޮލަށް 500 ޑޮލަރު ރާއްޖޭގެ ބޭންކަކުން މާރުކުރުން ނުވަތަ ލިބޭ އާމްދަނީގެ 20 ޕަސެންޓް މާރު ކުރަން ޖެހޭ ގޮތަށް އެ ބިލުގައި ވަނީ އިޚުތިޔާރު ދީފައެވެ.
ރިސޯޓްތަކަށް އަންނަ ފަތުރުވެރިއެއްގެ ބޮލަށް 500 ޑޮލަރު މާރުކުރަން އެމްއެމްއޭގެ ގަވާއިދުގައި މަޖުބޫރު ކުރުމުން، ޓޫރިޒަމް އިންޑަސްޓްރީގެ އިސް ބޭފުޅުން ވަނީ އެ ގަވާއިދަށް އަމަލު ކުރެވެން ނެތް ކަމަށް ބުނެފައެވެ. އެއީ އެ ގަވާއިދު އޭރު އޮތްގޮތުން ނުލިބޭ އާމްދަނީއެއް ބޭންކަށް މާރު ކުރަން ޖެހޭ ކަމަށް ބުނެއެވެ.
މި މައްސަލައިގައި ވިޔަފާރިވެރިންނާއި ސަރުކާރާ ދެމެދު ޚިޔާލު ތަފާތުވުން އުފެދިފައި ވަނިކޮށް މި ސަރުކާރަށް އެއް އަހަރު ފުރުން ފާހަގަ ކުރުމަށް ބޭއްވި ރަސްމިއްޔާތުގައި ރައީސް ވަނީ އެ ގަވާއިދު ބަދަލު ނުކުރައްވާނެ ކަމަށް ވިދާޅުވެފައެވެ. އަދި ޖެހޭނީ 500 ޑޮލަރު މާރު ކުރަން ކަމަށް ރައީސް ވިދާޅުވިއެވެ.
ބިލުގައި ހިމެނޭ ބައެއް މުހިންމު ކަންތައްތައް
މި ބިލުގައިވާގޮތުގައި ޓޫރިސްޓުންނަށް ޚިދުމަތް ދޭ ތަންތަން ވަނީ ގިންތިތަކަށް ބަހާލާފައެވެ. އެއީ "ކެޓެގަރީ-އޭ ޓޫރިޒަމް އެސްޓެބްލިޝްމަންޓް" އަދި "ކެޓެގަރީ-ބީ ޓޫރިޒަމް އެސްޓެބްލިޝްމަންޓް" އެވެ. މި ދެ ކެޓަގަރީން ވެސް އިޚުތިޔާރެއް ވަނީ ދީފައެވެ.
ކެޓެގަރީ-އޭ ޓޫރިޒަމް އެސްޓެބްލިޝްމަންޓްގައި ހިމެނެނީ ރަޖިސްޓަރީކޮށްފައިވާ ރިޒޯޓުތަކާއި، އިންޓަގްރޭޓަޑް ޓޫރިސްޓް ރިޒޯޓުތަކާއި، ޕްރައިވެޓް އައިލެންޑްތަކާއި އެނޫންވެސް ތަންތަނެވެ. މި ކެޓަގަރީން ޚިދުމަތްދޭ ކޮންމެ ފަތުރުވެރިއެއްގެ ބޮލަކަށް 500 އެމެރިކާ ޑޮލަރު މާރުކުރަންޖެހެއެވެ. ނުވަތަ މަހެއްގެ ތެރޭގައި އެ އެސްޓެބްލިޝްމަންޓަކަށް ލިބޭ ބޭރު ފައިސާގެ އާމްދަނީގެ 20 ޕަސެންޓް މާރުކުރަންޖެހެއެވެ.
ކެޓެގަރީ-ބީ ޓޫރިޒަމް އެސްޓެބްލިޝްމަންޓްގައި ހިމެނެނީ ރަޖިސްޓަރީކޮށްފައިވާ ޓޫރިސްޓް އުޅަނދުތަކާއި، ޓޫރިސްޓް ހޮޓާތަކުގެ އިތުރުން ޓޫރިސްޓް ގެސްޓްހައުސްތަކެވެ. މި ކެޓަގަރީން ޚިދުމަތް ހޯދާ ކޮންމެ ފަތުރުވެރިއެއްގެ ބޮލަކަށް 25 އެމެރިކާ ޑޮލަރު މާރުކުރަންޖެހެއެވެ. ނުވަތަ މަހެއްގެ ތެރޭގައި އެ އެސްޓެބްލިޝްމަންޓަކަށް ލިބޭ ބޭރު ފައިސާގެ އާމްދަނީގެ 20 ޕަސެންޓް މާރުކުރަންޖެހެއެވެ.
އެ ބިލުގައި ވަނީ ބޭރު ފައިސާ މާރުކުރުމުން އިސްތިސްނާވާ ފަރާތްތަކާއި ހާލަތްތަކެއް ހިމަނައިފައެވެ. އޭގެ ތެރޭގައި:
- ގިނަވެގެން 24 ގަޑިއިރު ހޭދަކޮށްފައި ނުވާ ޓޫރިސްޓުން.
- އުމުރުން 10 އަހަރު ފުރިހަމަނުވާ ކުޑަކުދިން.
- އެ ޓޫރިޒަމް އެސްޓަބްލިޝްމެންޓްގައި ހިލޭ ނުވަތަ ކޮމްޕްލިމެންޓްރީކޮށް ތިބޭ ފަރާތްތައް.
- ސަރުކާރުން ޚާއްސަ އިމްތިޔާޒުތަކެއް ދީފައިވާ މެހެމާނުން.
އާ ބިލުގައި ބުނެފައިވާ ގޮތުން އާމްދަނީގެ ގޮތުގައި އަހަރަކު މަދުވެގެން 15 މިލިއަން ޑޮލަރު ލިބޭ ވިޔަފާރިތަކުން ރާއްޖޭގެ ބޭންކަކަށް ޑޮލަރު މާރުކުރަންޖެހެއެވެ. ކުރިން ޑްރާފްޓުގައި އޮތީ 20 މިލިއަން ޑޮލަރު ލިބޭ ވިޔަފާރިތަކުން ބޭންކަށް މާރުކުރަންޖެހޭ ގޮތަށެވެ. މިހާރު އެ އަދަދު ދަށްކޮށް، އެ ވިޔަފާރިތަކުން އެމްއެމްއޭގައި ރަޖިސްޓްރީ ކުރުން ލާޒިމްކުރާ ގޮތަށް އިސްލާހު ވަނީ ހުށަހަޅާފައެވެ.