ފަތުރުވެރިންނަށް ޚިދުމަތްދޭ ތަންތަނަށް އަންނަ ކޮންމެ ފަތުރުވެރިއެއްގެ ބޮލަށް 500 ޑޮލަރު ރާއްޖޭގެ ބޭންކަކުން މާރުކުރުން ނުވަތަ ލިބޭ އާމްދަނީގެ 20 ޕަސެންޓް މާރު ކުރަން ޖެހޭ ގޮތަށް, ބޭރު ފައިސާއާ ބެހޭ އާ ބިލު އެކުލަވާލާ, ރައްޔިތުންގެ މަޖިލީހަށް މިއަދު ހުށަހަޅައިފިއެވެ.
ރިސޯޓްތަކަށް އަންނަ ފަތުރުވެރިއެއްގެ ބޮލަށް 500 ޑޮލަރު މާރުކުރަން އެމްއެމްއޭގެ ގަވާއިދުގައި މަޖުބޫރު ކުރުމުން ޓޫރިޒަމް އިންޑަސްޓްރީގެ އިސް ބޭފުޅުން ވަނީ އެ ގަވާއިދަށް އަމަލު ކުރެވެން ނެތް ކަމަށް ބުނެފައެވެ. އެއީ އެ ގަވާއިދު އޭރު އޮތްގޮތުން ނުލިބޭ އާމްދަނީއެއް ބޭންކަށް މާރު ކުރަން ޖެހޭ ކަމަށް ވިދާޅުވެއެވެ.
މި މައްސަލާގައި ވިޔަފާރިވެރިންނާއި ސަރުކާރާ ދެމެދު ހިޔާލު ތަފާތުވުން އުފެދިފައި ވަނިކޮށް މި ސަރުކާރަށް އެއް އަހަރު ފުރުން ފާހަގަ ކުރުމަށް ބޭއްވި ރަސްމިއްޔާތުގައި ރައީސް ވަނީ އެ ގަވާއިދު ބަދަލު ނުކުރައްވާނެ ކަމަށް ވިދާޅުވެފައެވެ. އަދި ޖެހޭނީ 500 ޑޮލަރު މާރު ކުރަން ކަމަށް ރައީސް ވިދާޅުވިއެވެ.
ނަމަވެސް ބައެއް ލުއިތައްދީ އެމްއެމްއޭއިން މި ފަހުން އަނެއްކާ ވެސް މި ވަނީ ބޭރު ފައިސާގެ ގަވާއިދު އެކުލަވާލައިފައެވެ. އެ ބަދަލުތައް ގާނޫނަކަށް ހެދުމަށްޓަކައި ބިލެއް އެކުލަވާލައި މިއަދު ވަނީ ރައްޔިތުންގެ މަޖިލީހަށް ހުށަހަޅާފައެވެ.
ސަރުކާރުގެ ފަރާތުން މި ބިލު ހުށަހެޅުއްވީ ޕީއެންސީ ޕާލިމެންޓްރީ ގްރޫޕްގެ ލީޑަރު އަދި އިނގުރައިދޫ ދާއިރާގެ މެންބަރު އިބްރާހީމް ފަލާހުއެވެ.
ބިލު ހުށަހެޅުމުގެ މަގުސަދަކީ ރާއްޖޭގައި ބޭރު ފައިސާއިން ކުރެވޭ މުއާމަލާތްތައް ކަނޑައަޅައި، ބޭރު ފައިސާ ރާއްޖެއަށް އެތެރެކުރުމާއި، ބޭރުކުރުމާއި، ބޭރު ފައިސާ ރާއްޖޭގައި ގެންގުޅުމާއި، ޖަމާކުރުމާއު، މަނާކުރުމާ ބެހޭ އުސޫލުތައް ކަނޑައެޅުމެވެ. އަދި އެނޫންވެސް ބޭރު ފައިސާއާ ބެހޭ މުއާމަލާތްތަކާ ގުޅޭ ހަމަތަކާއި އުސޫލުތައް ކަނޑައަޅައި ހިންގުމަށް ބޭނުންވާނޭ ކަމާބެހޭ ހަރުދަނާ އޮނިގަނޑެއް އެކުލަވާލުމެވެ.
މި ބިލުގައިވާގޮތުގައި ޓޫރިސްޓުންނަށް ޚިދުމަތް ދޭ ތަންތަން ވަނީ ގިންތިތަކަށް ބަހާލާފައެވެ. އެއީ "ކެޓެގަރީ-އޭ ޓޫރިޒަމް އެސްޓެބްލިޝްމަންޓް" އަދި "ކެޓެގަރީ-ބީ ޓޫރިޒަމް އެސްޓެބްލިޝްމަންޓް" އެވެ. މި ދެ ކެޓަގަރީން ވެސް އިޚުތިޔާރެއް ވަނީ ދީފައެވެ.
ކެޓެގަރީ-އޭ ޓޫރިޒަމް އެސްޓެބްލިޝްމަންޓްގައި ހިމެނެނީ ރަޖިސްޓަރީކޮށްފައިވާ ރިޒޯޓުތަކާއި، އިންޓަގްރޭޓަޑް ޓޫރިސްޓް ރިޒޯޓުތަކާއި، ޕްރައިވެޓް އައިލެންޑްތަކާއި އެނޫންވެސް ތަންތަނެވެ. މި ކެޓަގަރީން ހިދުމަތްދޭ ކޮންމެ ފަތުރުވެރިއެއްގެ ބޮލަކަށް 500 އެމެރިކާ ޑޮލަރު މާރުކުރަންޖެހެއެވެ. ނުވަތަ މަހެއްގެ ތެރޭގައި އެ އެސްޓެބްލިޝްމަންޓަކަށް ލިބޭ ބޭރު ފައިސާގެ އާމްދަނީގެ 20 ޕަސެންޓް މާރުކުރަންޖެހެއެވެ.
ކެޓެގަރީ-ބީ ޓޫރިޒަމް އެސްޓެބްލިޝްމަންޓްގައި ހިމެނެނީ ރަޖިސްޓަރީކޮށްފައިވާ ޓޫރިސްޓް އުޅަނދުތަކާއި، ޓޫރިސްޓް ހޮޓާތަކުގެ އިތުރުން ޓޫރިސްޓް ގެސްޓްހައުސްތަކެވެ. މި ކެޓަގަރީން ހިދުމަތް ހޯދާ ކޮންމެ ފަތުރުވެރިއެއްގެ ބޮލަކަށް 25 އެމެރިކާ ޑޮލަރު މާރުކުރަންޖެހެއެވެ. ނުވަތަ މަހެއްގެ ތެރޭގައި އެ އެސްޓެބްލިޝްމަންޓަކަށް ލިބޭ ބޭރު ފައިސާގެ އާމްދަނީގެ 20 ޕަސެންޓް މާރުކުރަންޖެހެއެވެ.
ލިބޭ އާމްދަނީގެ ޕަސެންޓެއް ބޭންކުތަކަށް މާރުކުރަން ޖެހޭ ގޮތް ހެދުމަކީ ޓޫރިޒަމް އިންޑަސްޓްރީގެ ކުރީގެ ވެސް ހުށަހެޅުމެކެވެ. ނަމަވެސް އެމްއެމްއޭއާއި ސަރުކާރުން ފުރަތަމަ ނިންމީ އެ އިހުތިޔާރު ނުދީ ސީދާ ވަކި އަދަދަކަށް ޑޮލަރު މާރު ކުރަން އެންގުމަށެވެ.
އެ ބިލުގައި ވަނީ ބޭރު ފައިސާ މާރުކުރުމުން އިސްތިސްނާވާ ފަރާތްތަކާއި ހާލަތްތަކެއް ހިމަނައިފައެވެ. އޭގެ ތެރޭގައި:
- ގިނަވެގެން 24 ގަޑިއިރު ހޭދަކޮށްފައި ނުވާ ޓޫރިސްޓުން
- އުމުރުން 10 އަހަރު ފުރިހަމަނުވާ ކުޑަކުދިން
- އެ ޓޫރިޒަމް އެސްޓަބްލިޝްމެންޓްގައި ހިލޭ ނުވަތަ ކޮމްޕްލިމެންޓްރީކޮށް ތިބޭ ފަރާތްތައް
- ސަރުކާރުން ޚާއްސަ އިމްތިޔާޒު ތަކެއް ދީފައިވާ މެހެމާނުން
އާ ބިލުގައި ބުނެފައިވާ ގޮތުން އާމްދަނީގެ ގޮތުގައި އަހަރަކު މަދުވެގެން 15 މިލިއަން ޑޮލަރު ލިބޭ ވިޔަފާރިތަކުން ރާއްޖޭގެ ބޭންކަކަށް ޑޮލަރު މާރުކުރަންޖެހެއެވެ. ކުރިން އޮތީ 20 މިލިއަން ޑޮލަރު ލިބޭ ވިޔަފާރިތަކުން ބޭންކަށް މާރުކުރަންޖެހޭ ގޮތަށެވެ. މިހާރު އެ އަދަދު ދަށްކޮށް، އެ ވިޔަފާރިތަކުން އެމްއެމްއޭގައި ރަޖިސްޓްރީ ކުރުން ލާޒިމްކުރާ ގޮތަށް އިސްލާހު ވަނީ ހުށަހަޅާފައެވެ.
ނަމަވެސް އެފަދަ ވިޔަފާރިތަކުން މާރުކުރަން ޖެހެނީ ކިތަށް ޕަސެންޓްކަމެއް ބިލްގައެއް ނެތެވެ.
މިހާރު ހުށަހަޅާފައި އޮތް ގޮތުން ބޭރު ފައިސާ ބޭންކަށް ޖަމާނުކުރާ ވިޔަފާރިތަކަށް މަހުން މަހަށް ލިބޭ އާމްދަނީގެ 0.25 ޕަސެންޓަށްވުރެ އިތުރުނުވާ އަދަދަކުން ޖޫރިމަނާކުރެވޭނެއެވެ. އަދި ޖޫރިމަނާ ނުދައްކާ ހޭދަވާ ކޮންމެ ދުވަހަކަށް އާމްދަނީގެ 0.25 ޕަސެންޓަށްވުރެ އިތުރުނުވާ އަދަދަކުން ޖޫރިމަނާކުރެވޭނެއެވެ.
ހަމައެއާއެކު ލާޒިމުކުރާ އަދަދަށް މާރުނުކޮށްފި ހާލަތުގައި މަހުން މަހަށް ލިބޭ އާމްދަނީގެ 0.5 ޕަސެންޓަށްވުރެ އިތުރުނުވާ އަދަދަކުން ޖޫރިމަނާކުރެވޭނެއެވެ. އަދި އެ އަދަދަށް މާރުނުކޮށް ހޭދަވާ ކޮންމެ ދުވަހަކަށް އާމްދަނީގެ 0.5 ޕަސެންޓަށްވުރެ އިތުރުނުވާ އަދަދަކުން ޖޫރިމަނާކުރެވޭނެއެވެ.
އަދި ގާނޫނާ ޚިލާފުވެއްޖެނަމަ ކުޑަބޮޑުމިނަށް ބަލައި 10،000 ރުފިޔާއާއި އެއް މިލިއަން ރުފިޔާއާ ދެމެދުގެ އަދަދަކުން ޖޫރިމަނާކުރެވޭ ގޮތަށް ވަނީ އިސްލާހު ހުށަހަޅާފައެވެ.