އަކުރުތަކާއި އަޑުތައް ވަރަށް އެއްގޮތް ތިން ލަފުޒެއްގެ ވާހަކަ މިއަދު ދައްކައިލައި ހިތްވެއްޖެއެވެ. މި ތިން ލަފުޒުގައި ވެސް ބޭނުންކުރަނީ ދާދި އެއް އަކުރުތަކެކެވެ. އެ ތިން ލަފުޒުގައި ވެސް އަލިފާއި ޅަވިޔަނި ހިމެނެއެވެ. ދެ ލަފުޒުގައި "ކިއުން" ހިމެނެއެވެ. ތިންވަނަ ލަފުޒުގައި ކުޑަ ތަފާތެއް ފާހަގަވެއެވެ. އެއީ އެ ލަފުޒުގެ ނިމޭ ބަޔަށް "ބެލުން" އަންނާތީއެވެ. މިހާރު އެ ތިން ލަފުޒަކީ ކޮބައިކަން ވަރަށް ގިނަ ބޭފުޅުންނަށް އަންދާޒާކޮށްލެވިދާނެކަމަށް އަޅުގަނޑު ގަބޫލުކުރަމެވެ. އެ ތިން ލަފުޒަކީ، އަޅައިކިއުމާއި އަޅުވައިކިއުމާއި އަޅައިބެލުމެވެ. އެއްކަހަލަ ގޮތެއް އެބަހުރި ދެއްތޯއެވެ. ތިން ލަފުޒު ވެސް ކިޔާއިރާއި ލިޔާއިރު އެއްގޮތްކަމެއް ފާހަގަވިޔަސް މާނައިގެ އެއްގޮތްކަމެއް ހުރިތޯ ބެލުމަށް ބަސްފޮތުގެ ގަނޑުތައް އުކައިލަމާތޯއެވެ؟
އަޅައިކިއުން: ލިޔެފައިވާ ނަކަލެއް އޭގެ އަޞްލާ އެއްގޮތްތޯ ބަލާން ކިއުން.
މި މާނައަށް ވިސްނާއިރު ވަރަށް ފަސޭހަކަމާއެކު، މި ލަފުޒު ބޭނުންކުރަންވީ ހާލަތު އެނގެއެވެ. މާނަ ލިޔެފައި އޮތްގޮތުން އެކަން ސާފެވެ. މިއީ ކަނޑައެޅިގެން ލިޔެފައިވާ ލިޔުންތަކާ ގުޅުންހުރި ލަފުޒެއްގެ މާނަކަން ވެސް އެނގެއެވެ. ވަރަށް ގިނައިން އޮފީސްތަކުގައި މިކަން ކުރާންޖެހެއެވެ. ކުރީން ލިޔެފައި އޮތް އެއްޗެއް ދެވަނަ ފަހަރަށް ލިޔާންޖެހިދާނެއެވެ. ނުވަތަ ޓައިޕުކުރާން ޖެހިދާނެއެވެ. ޓައިޕުކުރި ލިޔުން ޓައިޕުކުރެވިފައި އޮތީ އަސްލު ލިޔުމާ އެއް ގޮތަށްތޯ ބެލުމަށް ދެކުދީން އެ ދެ ލިޔުން އަޅައިކިއާނީއެވެ. އެއް ކުއްޖަކު އަސްލު ލިއުން އަޑުހަރުކޮށް ކިޔާއިރު އަނެއް ކުއްޖާ އިންނާނީ ޓައިޕުކުރި ލިޔުން ބަލާށެވެ. ދެ ލިއުމުގައި ތަފާތެއް ވޭތޯ ބަލާށެވެ. މި ކުރެވެނީ އަޅައިކިއުމުގެ މަސައްކަތެކެވެ. މި މަސައްކަތުގައި 2 ލިޔުމަކާއި އަޑުހަރުކޮށް ކިއާނެ ކުއްޖަކާއި ފަރުވާތެރިކަމާއެކު ދެވަނަ ލިޔުމަށް ބަލާނެ ކުއްޖަކު ހުރުން ލާޒިމުވެއެވެ. އަޅައިކިއުމުގެ މަސައްކަތުގެ ނަތީޖާ އެންމެ ފުރިހަމަ ވާނީ އޭރުންނެވެ.
އަޅައިބެލުން: ދެ އެއްޗެއްގައި ނުވަތަ ދެ ކަމެއްގައި ހުރި ތަފާތެއް ނުވަތަ އެއްގޮތް ކަމެއް ބެލުން.
މި ފަހަރު މި ޖެހުނީ ކިޔާކަށް ނޫނެވެ. ބަލާށެވެ. ދެ އެއްޗަށް ބަލާށެވެ. ލިޔުމަކަށް ވެސް ބެލިދާނެއެވެ. ދެ ލިޔުމުގައި ހުރި ތަފާތުތަކަށް ބެލިދާނެއެވެ. އެއްގޮތް ކަންތައްތަކަށް ބެލިދާނެއެވެ. ލިޔުމުގެ ދިގު މިން އެއްވަރުތޯ ބެލިދާނެއެވެ. ދެ ލިޔުމުގެ ފޮންޓުގައި ހުރި ތަފާތު ބެލިދާނެއެވެ. ލިޔުމުގައި ހުރި ސާފުކަމާއި ހުތުރުކަން ވެސް ބެލިދާނެއެވެ. އެކަމަކު، ލިޔުން ބަލައިގެން އަޑު ހަރުކޮށް ކިޔާން ފަށައިފައި، އަނެކާ ލައްވާ ދެ ލިޔުމުގެ ތަފާތުތައް ދެނެގަންނާން ފަށައިފި ނަމަ އަޅައިބަލަނީ އެއް ނޫނެވެ. އަޅައި ކިޔަނީއެވެ. އޮޅުވައި ނުލައްވައްޗެވެ.
އަޅައިކިއުމާއި އަޅައިބެލުން ބައެއް ފަހަރަށް އޮޅުވައިލެވޭތަން އާދެއެވެ. ދެ ކުއްޖެއްގެ ސިފަތަކެއް އަޅައިކިޔާނީއެއް ނޫނެވެ. އަޅައިބަލާނީއެވެ. އަރަބީންގެ ކެއުމުގައި މިރުސް ބޭނުންކުރާ ވަރާއި ދެކުނު އިންޑިޔާގެ ކެއުމުގައި މިރުސް ބޭނުންކުރާ މިންވަރެއް އަޅައިބަލާ ދިރާސާކުރެވިދާނެއެވެ. ބަންގުލަދޭޝް މީހުން ދަނޑުހައްދަން ބޭނުންކުރާ ސާމާނާއި ދިވެހީން ދަނޑުހައްދަން ބޭނުންކުރާ ސާމާނު އަޅައިބަލައި ދެނެގަނެވިދާނެއެވެ. ކުޑަފަރީގެ ބިމުގެ ބޮޑު މިނާއި ހެނބަދޫގެ ބިމުގެ ބޮޑު މިން އަޅައިބެލިދާނެއެވެ. އެހެންވީމާ، އަޅައިބަލާނީ ދެ އެއްޗެއްގައި ނުވަތަ ދެ ކަމެއްގައި ހުރި ތަފާތެއް ނުވަތަ އެއްގޮތްކަމެކެވެ. ނަމަނަމަ، އަހުމަދާއި މުޙަންމަދާ ދެމީހުން ތެރެއިން ދިގީ ކާކުތޯ އަޅައިނުކިޔާށެވެ. އެކަމަކު އެ ދެމީހުންގެ ތެރެއިން ދިގީ ކާކުތޯ އަޅައިބަލާށެވެ.
އަޅުވައިކިއުން: ދެ ޖިންސުގެ ދެމީހެއްގެ ދެމެދުގައި ލޯބީގެ ގުޅުމެއް ހުންނަ ކަމަށް ވާހަކަ ދެއްކުން.
މިއީ މިހާރު އެހައި އާންމު ލަފުޒެއް ކަމަށް ގަބޫލެއް ނުކުރަމެވެ. އެހެނަސް ސަރުކާރު އޮފީސްތަކުގައި އެއް ދުވަސްވަރެއްގައި ވަރަށް އާންމުކޮށް ބޭނުންކުރަމުން ދިޔަ ލަފުޒެކެވެ. އޮފީސްތަކުގައި މިހާރު ވެސް މިކަން ހިނގާކަމަށް ވެއެވެ. އެހެނަސް ކަން ހިނގިއަސް، މިހާރު މި ލަފުޒު އޮފީސްތަކުގައި އަޑު އިވުން މަދުވެއްޖެއެވެ. ތަންކޮޅެއް އުމުރުން ދޮށީ ބޭފުޅުންގެ ވާހަކަތަކުގައި މިހާރު ވެސް މި ލަފުޒު ބޭނުންކުރައްވާ އަޑު އިވެއެވެ. ޅަކުދީންގެ ބަސްކޮށާރުން އެ ލަފުޒު އުވިދިއައީ ކަމަށް ވެދާނެއެވެ. ނުވަތަ ލަފުޒުގައި "އައްޗިކަމެއް" ހުންނަހެން ހީވާތީ އެ ލަފުޒާ ދުރުހެލިވީކަމަށް ވެސް ވެދާނެއެވެ. އަނެއްކާ އެ ލަފުޒު މާ ގިނަގިނައިން ތަކުރާރުކުރީމާ ވާން ބޭނުންނުވާ ކަމެއް ވެދާނެތީ އެ ލަފުޒު ބޭނުންކުރުން ހުއްޓުނީކަމަށް ވެސް ވެދާނެއެވެ. އިހު ބައެއް މީހުން ބުނާ ގޮތުން ވިއްޔާ އަޅުވައިކިއުމަކީ ދެ މީހުން ހިތާވާކަމެކޯލައެވެ. ހިތާވާން ހަދާ ފަންޑިތައަކަށް ވެޔޯލައެވެ. ކޮންމެއަކަސް، ދެ މީހުންގެ ދެމެދުގައި ލޯބީގެ ގުޅުމެއް ނެތަސް، އެ ދެމީހުން އުޅެނީ ރައްޓެހިވެގެންކަމަށް އޮފީސްތެރޭގައި ކިއަން ފަށައިފި ނަމަ، ލޯބި އުފެދިދާނެއެވެ. މި ލިއުން ވިދާޅުވާ ބޭފުޅުން އަމިއްލައޮފީހުގައި މިކަން ތަޖުރިބާ ނުކުރެއްވުމަށް ނަސޭހަތްތެރިވަމުން މި ފަހަރުގެ ކޮލަމް ނިންމާލަމެވެ. ކިއުންތެރީން އަޅުގަނޑަށް ދެއްވި ނަސޭހަތާ އެއްގޮތަށް ކޮލަމް ކުރު ކޮށްލީއެވެ.