ތަފާތުކުރުމެއް ނެތި ރައްޔިތުންނަށް އަސާސީ ހައްގުތައް ކަށަވަރުކޮށްދެއްވާނެކަމުގެ ޔަގީންކަން ރައީސް ޑރ. މުޙައްމަދު މުއިއްޒު މިއަދު ދެއްވައިފިއެވެ.
ބައިނަލްއަގްވާމީ އިންސާނީ ހައްގުތަކުގެ ދުވަހާ ގުޅިގެން އެކްސްގައި ކުރެއްވި ޕޯސްޓެއްގައި ރައީސް ވިދާޅުވީ އިންސާނީ ހައްގުތަކުގެ ދުވަސް ފާހަގަކުރާއިރު، މި ދުވަސް ހަނދާންކޮށްދެނީ އެކެއް އަނެކެއްގެ ހައްގުތައް ގުޅިފައިވާކަން ކަމަށެވެ. އަދި މިއީ، އެހެން މީހުންގެ މިނިވަންކަމަށް ވަކާލާތުކުރުމަކީ އަމިއްލަ މިނިވަންކަން ދިފާއުކުރުމަށް ވެސް މުހިންމު ކަމެއްކަން ހަނދާންކޮށްދޭ ދުވަހެއް ކަމަށް ރައީސް ވިދާޅުވިއެވެ.
ހަމައެއާއެކު މިއީ މީގެ 75 އަހަރުކުރިން އެކުލަވައިލެވުނު ބައިނަލްއަގްވާމީ އިންސާނީ ހައްގުތަކާ ބެހޭ މުއާހަދާގެ ވެސް ރޫހު ކަމަށް އެ މަނިކުފާނު ވިދާޅުވިއެވެ.
ރައީސް ވިދާޅުވީ އެ ރޫހާ އެއްގޮތަށް ރާއްޖެ ދެމިއޮންނާނީ އަބުރުވެރިކަމާއި، ހަމަހަމަކަމާއި އިންސާފުވެރިކަމުގެ އަސާސްގެ މައްޗަށް ހިމެނޭ ޑިމޮކްރަސީއެއް ބިނާކުރުމުގައި ކަމަށެވެ.
އަދި މި ސަރުކާރުގެ އަމާޒަކީ ރާއްޖޭގެ ސިއްހީ ޚިދުމަތާއި، ތައުލީމާއި، އިންސާފު ހުރިހާ ރައްޔިތުންނަށް ވެސް ހަމަހަމަކަމާއެކު ލިބޭ، އަމާން، އަދި އެންމެން ޝާމިލުވާ މުޖުތަމައުއެއް ބިނާކުރުން ކަމަށް ރައީސް ވިދާޅުވިއެވެ.
އަދި ސަރުކާރުން ދެމި އޮންނާނީ ނޫސްވެރިކަމުގެ މިނިވަންކަމާއި މަސައްކަތްތެރިންގެ ހައްގުތަކާއި މިންތީގެ ހަމަހަމަކަމުގެ އިތުރުން ދެމެހެއްޓެނިވި ވެއްޓެއް ދަމަހައްޓައި އަންނާން އޮތް ޖީލުތަކަށް ޔަގީންކޮށްދިނުމުގައި ކަމަށް ރައީސް ވިދާޅުވިއެވެ.
ކޮންމެ އަހަރެއްގެ ޑިސެންބަރު 10ވަނަ ދުވަހަކީ އދ. އިން ކަނޑައަޅައިގެން ފާހަގަކުރާ އިންސާނީ ހައްގުތަކުގެ ދުވަހެވެ.