ފަނޑިޔާރުން ކަންނެތްކަމުން ސަލާމަތްވާންޖެހޭ ކަމަށާއި، ނުނިމި ފުނިޖެހިފައިވާ މައްސަލަތައް ބަލާ ނިންމުމަށް ރައްޔިތުންގެ މަޖިލީހުގެ ވެލިދޫ ދާއިރާގެ މެންބަރު މުހައްމަދު އައްބާސް މިއަދު ގޮވާލައްވައިފިއެވެ.
މަޖިލީހަށް ހުށަހަޅާފައިވާ މަސްތުވާތަކެތީގެ ގާނޫނަށް އިސްލާހު ގެނައުމުގެ ބިލަށް ބަހުސްކުރައްވާ އެމްޑީއޭގެ މެންބަރު އައްބާސް ވިިދާޅުވީ މަސްތުވާތަކެތި ހުއްޓުވޭނީ މޯލްޑިވްސް ޕޮލިސް ސާވިސަސްއާއި، ކަސްޓަމްސް އަދި ޖުޑިޝަރީ ދާއިރާ ގުޅިލާމެހިގެން ކަމަށެވެ.
މަސްތުވާތަކެތީގެ ސަބަބުން ރާއްޖޭގެ ޒުވާން ޖީލު ހަލާކުވެގެންދާއިރު، ބަލަން ނުތިބެވޭނެ ކަމަށާއި ކަންބޮޑުވާ މިންވަރަށް އެ މައްސަލަ ބޮޑުވެފައިވާ ކަމަށް އައްބާސް ވިދާޅުވިއެވެ. އަދި އެ މައްސަލަ އިންތިހާއަށް ބޮޑުވެފައި ވަނީ ތަންފީޒީ އިދާރާތަކުންނާއި ތަހުގީގީ އިދާރާތަކުން ނަގަންޖެހޭ ވަރަށް ޒިންމާ ނުނަގާތީ ކަމަށް ވެސް އައްބާސް ވިދާޅުވިއެވެ.
އެގޮތުންއިނާޔަތާއި، ހިމާޔަތާއި، ރައްކާތެރިކަން ދީ އަދި 80،000ހުން ފެށިގެން އެއްލައްކަ ރުފިޔާއާ ހަމައަށް ބޮޑު މުސާރަދިނުމަށް ފަހު ބައިތިއްބާ ފަނޑިޔާރުން "ކަންނެތްވެއްޖެ" ކަމަށް ވިދާޅުވެ އައްބާސް ވަނީ ވަރަށް ބޮޑަށް ނުރުހުން ފާޅުކުރައްވާފައެވެ.
ޚާއްސަކޮށް މި ފަނޑިޔާރުން އެބަޖެހޭ ކަންނެތްކަމުން ސަލާމަތްވާން. ފަނޑިޔާރުން އެބަޖެހޭ ކޮންމެ އަހަރަކު [ޗުއްޓީއަށް ދާން]. އަޅުގަނޑުމެން މި އިއްޒަތްތެރި މަޖިލީހުން މި ތިބެނީ ޗުއްޓީ ނުނަގަން ރައްޔިތުންގެ ހައްގުގަ. ފަނޑިޔާރުން ހަމަ ޖެހޭދޯ ކޮންމެ އަހަރަކު އެއްފަހަރު އެއް މަސް ދުވަސް ދެ މަސް ދުވަސް ޗުއްޓީ ނަންގަވަން؟ ނުޖެހޭ. ނުނިމި ހުރި މައްސަލަތައް ނިންމަންވީ، ވެލިދޫ ދާއިރާގެ މެންބަރު މުހައްމަދު އައްބާސް
އައްބާސް ވަނީ ފަނޑިޔާރުން ޗުއްޓީއަށް ދިޔުމުގެ ބަދަލުގައި ފުނިޖެހިފައިވާ މައްސަލަތައް ބަލާ ނިންމުމަށް ގޮވާލައްވާފައެވެ.
އެކަންކަން ފާހަގަކުރައްވާ އައްބާސް ވިދާޅުވީ ރާއްޖޭގެ ޖުޑިޝަރީ ވަނީ ވަރަށް ބޮޑަށް "ފެއިލްވެފަ" ކަމަށެވެ. މަސްތުވާތަކެތީގެ ގިނަ މައްސަލަތަކުގައި ވެސް އެންމެ 15، 10 ދުވަހަށް ބަންދުގެ މުއްދަތު ޖަހައި، ދެން އެ ކުށްވެރިން އަނެއްކާވެސް ދޫކޮށްލަނީ މަގުމައްޗަށް ކަމަށް އައްބާސް ވިދާޅުވިއެވެ.
ރާއްޖޭގެ ޒުވާން ޖީލު މަސްތުވާތަކެތިން ރައްކާތެރިކުރުމަށްޓަކައި މަސްތުވާތަކެތި ވިޔަފާރިކުރާ މީހުންގެ ދަލުން ސަލާމަތްކުރަން ގާނޫނަށް ގެންނަންޖެހޭ އިސްލާހުތައް ގެނެސް، ތަހުގީގީ މުއައްސަސާތަކުން އޭގެ ޒިންމާ ރަނގަޅަށް ނަގަން ޖެހޭނެ ކަމަށް އައްބާސް ވިދާޅުވިއެވެ. އަދި މިހާރު ހުށަހަޅާފައިވާ އިސްލާހުތައް ގާނޫނަށް ގެނައުމުން ތަންފީޒީ އަދި ތަހުގީގީ އިދާރާތަކުން އެކަމަށް ހައްލު ހޯދުމަށް މަސައްކަތްކުރައްވާނެ ކަމަށް އުންމީދުކުރައްވާ ކަމަށް އައްބާސް ވިދާޅުވިއެވެ.
ސަރުކާރުގެ ފަރާތުން މި ބިލު ހުށަހެޅުއްވީ ގަމު ދާއިރާގެ ޕީއެންސީ މެންބަރު ޔޫސުފް ނަޝީދެވެ.
މި ބިލު ހުށަހެޅުމުގެ ބޭނުމަކީ، ދިވެހިރާއްޖޭގައި މަސްތުވާތަކެތިން ވިޔަފާރިކުރުމާއި، މަސްތުވާތަކެތި ޓްރެފިކްކުރުމުގެ ވިޔަފާރި އިތުރަށް ފުޅާވެ، މަސްތުވާތަކެތި ގެންގުޅޭ އަދި ބޭނުންކުރާ މިންވަރު އިތުރުވެ، މަސްތުވާތަކެއްޗާ ގުޅޭ ކުށްތައް އިތުރުވަމުންދާތީ އެކަންކަން ހުއްޓުވުމަށްޓަކައި ގާނޫނު ތަންފީޒުކުރާ ފަރާތްތަކަށް ލިބިދޭ ބާރުތައް އިތުރުކުރުމެވެ.
އަދި މަސްތުވާތަކެއްޗަށް ދެވި ހިފާފައިވާ މީހުންނަށް ހަރުދަނާ ގޮތެއްގައ ފަރުވާދީ، ހެޔޮގޮތުގައި މުޖުތަމައުއަށް އަނބުރާ ރުޖޫއަވެވޭނެ ފުރުސަތު ދިނުމަށްޓަކައި މަސްތުވާތަކެއްޗާ ބެހޭ ގާނޫނުގައި ކަނޑައަޅާފައިވާ ނިޒާމު އިސްލާހުކޮށް އެ ނިޒާމު އިތުރަށް ހަރުދަނާކުރުމަށެވެ.
މި ބިލުގައި ކަމާ ގުޅުން ހުރި އިދާރާތަކަށް ލިބިދޭ ބާރުތައް ވެސް އިތުރަށް ހަރުކަށިކޮށްފައިވެއެވެ.