ދަރުމަވަންތަ ހޮސްޕިޓަލާދިމާ މޫދުގައި ފެހުރިއްސެއް އުޅޭ މަންޒަރު ފެންނަ ވީޑިއޯއެއް ސޯޝަލް މީޑިއާގައި ދައުރުވެ، ގިނަ ބައެއްގެ ސަމާލުކަން ހޯދައިފިއެވެ.
މި ވީޑިއޯ އިއްޔެ ސޯޝަލް މީޑިއާގައި ހިއްސާކޮށްފައި ވަނީ ދޮން ކަނބުލޮ ކިޔާ ފޭސްބުކް އެކައުންޓަކުންނެވެ. އެނާ އަކީ ދަރުމަވަންތަ ހޮސްޕިޓަލުގައި މަސައްކަތްކުރާ މީހެކެވެ. "ސަން"އާ ވާހަކަދައްކަމުން އޭނާ ބުނީ ފެހުރިހި ދެއްކީ އެކުގައި މަސައްކަތް ކުރާ ކުއްޖެއް ކަމަށެވެ. އަދި މީގެ ކުރިން އެސަރަހައްދުން ފެހުރިއްސެއް ފެނިފައި ނުވާކަމަށް ވެސް އޭނާ ބުންޏެވެ. މިއަދު އޭނާ ވަނީ އެސަރަހައްދުގައި ކޯމަސް އައިނެއް އުޅޭ ވީޑިއޯއެއް ވެސް ހިއްސާކޮށްފައެވެ.
އޭނާ ވަނީ ފެހުރިހީގެ ގިނަ ވީޑިއޯތަކެއް ހިއްސާކޮށްފައެވެ. ވީޑިއޯއެކު ހިއްސާކުރި ލިޔުމުގައި ވަނީ އެ ފެހުރިހި ފެނިފައި ވަނީ އިއްޔެގެ މެންދުރު 11 ޖަހާ އެހާއިރު ކަމަށެވެ. އަދި ވީޑިއޯ ނަގައިފައި ވަނީ ދަރުމަވަންތަ ހޮސްޕިޓަލުގެ މަތިން ކަމަށެވެ.
މާލޭ ސަރަހައްދަކީ އާންމުކޮށް ފެހުރިހި ފެންނަ ސަރަހައްދަކަށް ނުވާތީ މި ވީޑިއޯ ވަނީ ގިނަ ބައެއްގެ ސަމާލުކަން ހޯދާފައެވެ.
އެގޮތުން، ރާއްޖޭގެ އެންމެ ހިތްގައިމު އެއް ކަމަކީ މޫދުގެ ދިރުންތައް ކަމަށް މި ވީޑިއޯ ހިއްސާކޮށް އެހެން މީހަކު ބުނެފައި ވެއެވެ. މި ފެހުރިހި ފެނުނީ ދަރުމަވަންތަ ހޮސްޕިޓާ ކައިރިން ކަމަށްވުމުން ބައެއް މީހުން ވަނީ މަޖާޒީ ގޮތެއްގައި އެކަމާ ގުޅިގެން ވާހަކަ ދައްކާފައެވެ.
"ތީ ބަލިމީހުން އުފާކޮށްލަދޭން،" މީހަކު ކޮމެންޓު ކޮށްފައި ވެއެވެ.
ފެހުރިހި އައީ ޑޮކްޓަރަށް ދައްކަން ކަމަށާއި ނަމްބަރު ޖެހެންދެން މޫދުގައި މަޑުކޮށްގެން އޮތީކަމަށް އިތުރު މީހަކު ލިޔެފައި ވެއެވެ.
"މޫދުގައި އުޅޭ އެންމެ ބޮޑު މަސް ޒިޔާރާތް ކުރީ އަހަރެމެންގެ ތޮއްޖެހިފައިވާ ސިޓީއަށް. މިއީ ރާއްޖޭގެ ރީތިކަން،" އިތުރު މީހަކު ލިޔެފައި ވެއެވެ.
މި އަހަރުގެ ކުރީކޮޅު ބައެއް އަތޮޅުތަކުން ވަނީ ރާއްޖެއިން އާންމުކޮށް ނުފެންނަ ބާވަތެއްގެ ބޮޑުމަހެއް ފެނިފައެވެ. މި ބޮޑުމަހުގެ ވީޑިއޯތަކަށް ވެސް ސޯޝަލް މީޑިއާގައި ބޮޑު ސަމާލުކަމެއް ލިބުނެވެ.
ސޯޝަލް މީޑިއާގައި މިއަހަރު ފުރަތަމަ އާންމުންގެ ސަމާލުކަން ހޯދީ ވ. އަތޮޅުން ފެނުން ބޮޑުމަހެކެވެ. މި ބޮޑުމަސް ބަލައިލުމަށް ރާއްޖޭގެ އެކި ހިސާބުތަކުން މީހުން ދިޔައެވެ. އަދި މި ބޮޑުމަހާއެކު ކ. މާފުށީގައި ގެސްޓް ހައުސްއާއި އެކްސްކާޝަން ހިންގުމުގައި ހަރަކާތްތެރިވާ ޝެޑޯ ޕާމް ގެސްޓްހައުސްއިން ނެގި ވީޑިއޯއެއް ވަނީ ދުނިޔޭގެ ސަމާލުކަން ވެސް ހޯދާފައެވެ.
އެއަށްފަހު ތިލަފުށި ކައިރިންނާއި ފާފު އަތޮޅުން ވެސް ބަޑުމަހެއް ފެނި އާންމުންގެ ސަމާލުކަން ހޯދިއެވެ.
ރާއްޖެ ޒިޔާރާތްކުރާ ފަތުރުވެރިން ވެސް އެންމެ ގަޔާވާ އެއް ކަމަކީ ރާއްޖޭގެ މޫދުގެ ދިރުންތަކެވެ.