ވ. އަތޮޅާއި ފ. އަތޮޅަށްފަހު ކ. ތިލަފުށި ކައިރިން ވެސް ބޮޑުމަހެއް ފެނިއްޖެއެވެ.
ތިލަފުށި ކައިރިން ބޮޑުމަސް ފެނުނު ކަމަށް ބުނެ ގިނަ އަދަދެއްގެ މީހުން ސޯޝަލް މީޑިއާގައި ވީޑިއޯތައް ޕޯސްޓުކޮށްފައިވެއެވެ. އެގޮތުން، ވީޑިއޯތައް ހިއްސާކޮށް ޕޯސްޓުކޮށްފައިވާ މީހުން ބުނެފައިވާ ގޮތުން، ތިލަފުށި ކައިރިން ބޮޑުމަސް ފެނިފައިވަނީ އިއްޔެގެ ވަގުތުތަކުގައެވެ.
ދައުރަވަމުން އަންނަ ވީޑިއޯތަކުން ފެންނަނީ، ބޮޑުމަސް ނޭވާލުމަށް ފެނުން މައްޗަށް އަރާ މަންޒަރެވެ.
ފާހަގަކޮށްލެވޭ ގޮތުގައި، މިދިޔަ މަހުގެ 20 ގައި ފ. ނިލަންދޫ ކައިރިން ވެސް ބޮޑުމަހެއް ފެނިފައިވާއިރު، ބޮޑުމަސް ފެނުނީ އެރަށު މީހުން ދަތުރޮ ގޮސް، އުޅެ ހަދާ އަތިރިމައްޗާ ދިމާލުން ކަމަށް އެރަށް ކައިރިން ފެނުނު ބޮޑުމަސް ވީޑިއޯ ކުރި މުހައްމަދު ސޮބާހު "ސަން"އަށް މީގެކުރިން ބުނެފައިވެއެވެ.
އޭގެކުރިން މިދިޔަ މަހުގެ ތެރޭގައި، ވ. އަތޮޅު ސިނަމޮން ދޮންވެލި ކައިރިން ވެސް ވަނީ ބޮޑުމަހެއް ފެނިފައެވެ.
އެ ބޮޑުމަހާއެކު ކ. މާފުށީގައި ގެސްޓް ހައުސްއާއި އެކްސްކާޝަން ހިންގުމުގައި ހަރަކާތްތެރިވާ ޝެޑޯ ޕާމް ގެސްޓްހައުސްއިންނެގި ވީޑިއޯއަކަށް މުޅި ދުނިޔޭގެ ސަމާލުކަން ލިބުނެވެ.
އޭބީސީ ނިއުސް އިން ވަނީ މި ވީޑިއޯ ދައްކައި މިއީ ރާއްޖޭގެ ރީތި މަންޒަރުކަން ފާހަގަކޮށްފައެވެ. ބޮޑުމަހަކީ 90 ފޫޓަށް ދިގުވާ މަހެކެވެ. އަދި، ބޮޑުމަހުގެ ބަރުދަން 100،000 ޕައުންޑަށް އަރައެވެ.
ބޮޑުމަސް ރާއްޖެއިން ފެނުމަކީ އެހާ އާންމުކަމެއް ނޫނެވެ. ނަމަވެސް ދިރާސާގޮތުން ދައްކާ ގޮތުގައި މޫސުމޫ ބަދަލުތަކާއެކީގައި އެސޮރުމެން ކާނާ ހޯދުމަށް ހިޖުރަކުރެއެވެ.
ވ އަތޮޅުންނާއި ފ. ނިލަންދޫގެ އިތުރުން ތިލަފުށި ކައިރިން ފެނުނު ބޮޑުމަހަކީވެސް އެގޮތަށް ހިޖުރަކުރި ބޮޑުމަހެއް ކަމަށް ބެލެވެއެވެ.