ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ ދަށުގައި އޮތް ހުޅުމާލޭގެ މުނިސިޕަލް ޚިދުމަތްތައް މާލޭ ސިޓީ ކައުންސިލުގެ ދަށަށް އަދިވެސް ބަދަލުނުކުރެވެނީ ސިޓީ ކައުންސިލްގައި އެކަމަށް ބޭނުންވާ ވަސީލަތްތަކާއި މާލީ ތަނަވަސްކަން ނެތުމުން ކަމަށް އެޗްޑީސީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު މިއަދު ވިދާޅުވެއްޖެއެވެ.
މާލެ ސިޓީގެ މުނިސިޕަލް ހުރިހާ ޚިދުމަތްތަކެއް، މާލެ ސިޓީ ކައުންސިލަށް ބަދަލުކުރެއްވުމަކީ ރައީސް ޑރ. މުއިއްޒު ރިޔާސީ އިންތިޚާބުގެ ތެރޭ ވެވަޑައިގެންނެވި ރިޔާސީ ވައުދުފުޅެކެވެ.
މިއަދު ބޭއްވި ރައްޔިތުންގެ މަޖިލީހުގެ މާލިއްޔަތު ކޮމިޓީގައި ވާހަކަދައްކަވަމުން ފަޒުލް ވިދާޅުވީ އެޗްޑީސީން އެ ޚިދުމަތްތައް ސިޓީ ކައުންސިލާ ހަވާލުކުރަން މިހާރު ވެސް ތިބީ ތައްޔާރަށް ކަމަށެވެ.
"އަޅުގަނޑުމެން އެޗްޑީސީގެ ފާރާތުން ސަރުކާރުގެ އަމާޒަށް ވާސިލުވުމަށްޓަކައި ހުރިހާ ކަމެއް ތައްޔާރުކޮށްގެން ރެޑީގަ މިތިބީ އިނގޭތޯ. ކައުންސިލުން ވެސް މާދަމާ ހަވާލުކުރަން ދެންނެވީމަ އަޅުގަނޑުމެން ހަވާލުކުރާ ގޮތަށް މިތިބީ. އެކަމު ހަވާލުކުރެވެން އަންނާނީ އަޅުގަނޑުމެންގެ ކޮމާޝަލް ޔުނިޓްސްތައް ނަގާފަ ދެން ހުރި އޭރިއާތައް މުނިސިޕަލް ޚިދުމަތްދޭން،" ފަޒުލް ވިދާޅުވިއެވެ.
މާލޭ ސިޓީ މޭޔަރު އާދަމް އާޒިމް -- ފޮޓޯ/ މާލޭ ސިޓީ ކައުންސިލް
ފަޒުލް ވިދާޅުވީ، މިކަމާ ގުޅިގެން ކައުންސިލާ ބައްދަލުކުރުމުން އެނގުނީ ކައުންސިލުގެ ތަނަވަސްކަން ނެތުމުގެ ސަބަބުން އެމަސައްކަތާ ހަވާލު ނުވެވިފައި ވާކަން ކަމަށެވެ.
"އެޗްޑީސީގެ ފަރާތަކުން އެއްވެސް ހުރަހެއް ނެތް ތިކަމަކަށް. މީގަ އޮތް އުނދަގުލަކީ ނުވަތަ ހުރަހަކީ ސިޓީ ކައުންސިލަށް ފައިނޭންޝަލް ރިސޯސަސް ހަމަޖެހިފައި ނެތުމުން އެއީ އުޒުރަކީ. އެބޭފުޅުންނަށް ވެސް އެތިބީ ހަވާލުވާން އެކަމަކު އޭގަ ފައިނޭންޝަލް ކަންތައްތައް ހަމަނުޖެހޭތީ މަޑުޖައްސާލައިގެން ތިބީ ކަމަށް އަޅުގަނޑަށް މައުލޫމާތު ލިބެނީ،" ފަޒުލް ވިދާޅުވިއެވެ.
އެޗްޑީސީން ފޯރުކޮށްދޭ ރަށްވެެހިކަމުގެ ޚިދުމަތްތައް މާލެ ސިޓީ ކައުންސިލްގެ ދަށަށް ބަދަލުކުރުމަށް ފިނޭންސް މިނިސްޓްރީއާ އެޗްޑީސީއާ މާލެ ސިޓީ ކައުންސިލާއި ދެމެދު އެމްއޯޔޫއެއްގައި ސޮއިކޮށްފައި ވަނީ ޖެނުއަރީ ހަތަރެއްގައެވެ.
އެ އެމްއޯޔޫގެ ދަށުން އިދާރީ ދާއިރާތައް ލާމާރުކަޒީ އުސޫލުން ހިންގުމުގެ ގާނޫނޫގެ ތެރެއިން އެޗްޑީސީއިން ހުޅުމާލޭގައި ދެމުންދާ ރަށްވެހިކަމުގެ ޚިދުމަތްތައް އެ ތާރީޚުން ފެށިގެން އެއް މަސް ދުވަސް ތެރޭ ހުއްޓައިލަން ޖެހެއެވެ.
އެހެންނަމަވެސް އޭގެ ފަހުން އަހަރެއް ވާން ގާތްވެފަ ވާއިރު ވެސް އެ ޚިދުމަތް ސިޓީ ކައުންސިލްގެ ދަށަށް ބަދަލުކުރެވިފައެއް ނުވެއެވެ.
ރައީސްގެ ވައުދުފުޅާ ގުޅިގެން އެޗްޑީސީގެ ބައެއް މުވައްޒަފުންގެ ކަންބޮޑުވުންތަކެއް ވެސް ފެންމަތިވިއެވެ. ނަމަވެސް އެމަނިކުފާނު ވިދާޅުވީ ހުޅުމާލޭގެ މުނިސިޕަލް ޚިދުމަތްތައް މާލޭ ސިޓީ ކައުންސިލުގެ ދަށަށް ބަދަލުކުރި ނަމަވެސް އެ ޚިދުމަތާއެކު ސިޓީ ކައުންސިލަށް ބަދަލުކުރާ އެއްވެސް މުވައްޒަފެއްގެ މުސާރައާއި އިނާޔަތްތައް ކުޑަނުވާނެ ކަމަށެވެ.
ފާހަގަކޮށްލެވޭ ގޮތުގައި މީގެ ކުރިން ރައީސް މުއިއްޒު، މާލޭގެ މޭޔަރު ކަމުގެ މަގާމުގައި ހުންނެވިއިރު، ހުޅުމާލޭގެ މުނިސިޕަލް ޚިދުމަތްތައް ސިޓީ ކައުންސިލްގެ ދަށަށް ބަދަލުކުރެއްވުމަށް މަސައްކަތްކުރެއްވިއެވެ. އެހެންނަމަވެސް އޭރު އެކަން ވެފައެއް ނުވެއެވެ.
އެކަމުގައި އޭރު، ސިޓީ ކައުންސިލާ އެޗްޑީސީއާ ދެމެދު ޚިޔާލުތަފާތުންތައް ވަރަށް ބޮޑަށް ހުއްޓެވެ.
ހުޅުމާލޭގެ މުނިސިޕަލް ޚިދުމަތްތައް ފޯރުކޮށްދިނުމަކީ ގާނޫނީ ގޮތުން ކައުންސިލުން ކުރަން ޖެހޭ ކަމެކެވެ.