ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ (އަދުރޭ)ގެ ދަރިކަލުން އިބްރާހީމް ފައިސަލް ޓޫރިޒަމް މިނިސްޓަރުކަމުން މިއަދު ވަކިކުރުމާއެކު އެ މަނިކުފާނު ވެސް މަގާމުން ދުރުކުރަން އުޅޭ ކަމުގެ އަޑުތަކެއް ފެތުރިފައިވަނިކޮށްް، އަބްދުއްރަހީމް މިރޭ މެލޭޝިއާއިން ރާއްޖެއަށް ވަޑައިގެންފިއެވެ.
ފައިސަލް ޓޫރިޒަމް މިނިސްޓަރު ކަމުން ވަކިކޮށްފައިވާކަން ރައީސް އޮފީހުން މިއަދު އިއުލާން ކުރީ، މަޖިލިސް ޗުއްޓީގައި އޮތް މި ދުވަސްވަރު އަބްދުއްރަހީމް މެލޭޝިއާގައި ހުންނަވަނިކޮށެވެ.
މިރޭ 10:30ހާއިރު މެލޭޝިއާއިން އައިސް ޖެއްސި ފްލައިޓެއްގައި އަބްދުއްރަހީމްވަނީ ރާއްޖެ ވަޑައިގެންފައެވެ. އެ މަނިކުފާނާ ބައްދަލުކުރުމަށް ނޫސްވެރިން ވެސް ވެލާނާ އިންޓަނޭޝަނަލް އެއާޕޯޓުގެ ވީއައިޕީ ޓާމިނަލް ކައިރީގައި މަޑުކޮށްގެން ތިއްބެވެ.
އެހެންނަމަވެސް، "ސަން"އަށް މައުލޫމާތު ލިބިފައިވާ ގޮތުގައި އަބްދުއްރަހީމް ވަނީ ވީއައިޕީ ލައުންޖަށް ވަދެވަޑައިގަތުމުގެ ބަދަލުގައި، ބޯޓުން ފައިބައިވަޑައިގެންނެވި ގޮތަށް ކާރުކޮޅުގައި އެއާޕޯޓުން ވަޑައިގެންފައެވެ.
ފައިސަލް މަގާމުން ވަކިކުރި ނަމަވެސް، އެކަމާ ގުޅޭ މާގިނަ މައުލޫމާތެއް ރައީސް އޮފީހުން ހާމަކޮށްފައެއް ނުވެއެވެ. އަދި ފައިސަލް ވެސް ވަނީ އޭނާއަށް މަގާމުން ވަކިކުރިކަމުގެ ސިޓީ ލިބިވަޑައިގަތީ މިއަދު ހެނދުނު ކަމަށާއި އެ ސިޓީގައި މަގާމުން ވަކިކުރީ ކީއްވެކަން ބުނެދީފައިނުވާ ކަމަށް ވިދާޅުވެފައެވެ.
ޕީއެންސީގެ ޗެއާޕާސަން އަބްދުއްރަހީމާއި، ޕީއެންސީގެ ރައީސް، ރައީސް ޑރ. މުޙައްމަދު މުއިއްޒު: އެ ދެ ބޭފުޅުން ގުޅުން ގޯސްވެފައިވާ ކަމަށް އަބްދުއްރަހީމް ވަނީ އެއްބަސްވެވަޑައިގެންފައި --
އެ ނިންމެވުމާ ގުޅިގެން އަބްދުއްރަހީމް މިއަދު ވަނީ ފައިސަލްގެ ދިފާއުގައި ވާހަކަދައްކަވައިފައެވެ. އެކްސްގައި ކުރެއްވި ޕޯސްޓެއްގައި އެ މަނިކުފާނު ވަނީ ފައިސަލް މަސައްކަތްކުރެއްވީ އިޚުލާސްތެރިކަމާއެކު ކަމަށާއި، ނަތީޖާވެސް ނެރެދެއްވި ކަމަށް ވިދާޅުވެ ތައުރީފު ކުރައްވައިފައެވެ.
ފައިސަލް މަގާމުން ވަކިކުރުމާއެކު ބައެއް މީޑިއާތަކާއި ސޯޝަލް މީޑިއާގައި ވަނީ އަބްދުއްރަހީމާއި ރައީސް ޑރ. މުޙައްމަދު މުއިއްޒުގެ ގުޅުން ގޯސްވެ، މަޖިލީހުގެ ރައީސްކަމުން އަބްދުއްރަހީމް ދުރުކުރަން އުޅޭ ކަމަށް ޚަބަރު ފަތުރައިފައެވެ.
މީގެ އިތުރުން އަބްދުއްރަހީމް 'ދައުރު' ނޫހަށް ދެއްވި އިންޓަވިއުއެއްގައި ވަނީ ރައީސާ ގުޅުން ގޯސްކަމަށް އެއްބަސްވެވަޑައިގެންފައެވެ. އަދި ގުޅުން ރަނގަޅު ނަމަ މިހެން ކަން ދިމާނުވީސް ކަމަށް އެ މަނިކުފާނު ވިދާޅުވެފައިވެއެވެ.
އެ ތުހުމަތުތަކާ ގުޅިގެން ޕީއެންސީގެ ޕާލިމަންޓްރީ ގްރޫޕު (ޕީޖީ)ގެ ލީޑަރު އިބްރާހިމް ފަލާހް "ސަން"އަށް ވިދާޅުވީ، އަބްދުއްރަހީމް ވަކިކުރަން ނޫޅޭ ކަމަށާއި އެ މަނިކުފާނު ހިމެނޭ ގޮތަށް ޕީޖީ އެއްކޮށް އޮތީ ރައީސާ އެއްކޮށް ކަމަށެވެ.
ރައީސް މިހާރު ގެންދަވަނީ ތިލަދުންމަތީ އުތުރުބުރީގެ ރަށްތަކަށް ދަތުރުކުރައްވަމުންނެވެ. އެ ދަތުރުފުޅުގައި އެކި ރަށްރަށަށް ވަޑައިގެން ރައްޔިތުންނާ ބައްދަލުކުރައްވައި ވާހަކަ ދެއްކެވި ނަމަވެސް، އެ މަނިކުފާނު ސީދާ ގޮތެއްގައި އަބްދުއްރަހީމާއި ފައިސަލާ ގުޅޭ ގޮތުން މިހާތަނަށް ވާހަކަ ދައްކަވާފައި ނުވެއެވެ.