ހިޔާ ޓަވަރުތަކުގައި އިތުރު ލިފްޓު ހަރުކުރުމުގެ މަސައްކަތުގެ ދަށުން 32 ލިފްޓު ގަތް ކަމަށާއި އެ ލިފްޓުތައް ގަތުމަށް 18 މިލިއަން ޑޮލަރު ހޭދަވި ކަމަށް ހައުސިން ޑިވަލޮޕްމަންޓް ކޯޕަރޭޝަން (އެޗްޑީސީ)ގެ މެނޭޖިން ޑިރެކްޓަރު އިބްރާހީމް ފަޒުލް ރަޝީދު މިއަދު ވިދާޅުވެއްޖެއެވެ.
ރައްޔިތުންގެ މަޖިލީހުގެ މާލިއްޔަތު ކޮމިޓީގައި ހަނިމާދޫ ދާއިރާގެ އެމްޑީޕީ މެންބަރު އަބްދުލްޣަފޫރު މޫސާ ކުރެއްވި ސުވާލަށް ޖަވާބުދެއްވާ ފަޒުލް ވިދާޅުވީ، ހިޔާގައި އިތުރަށް ހަރުކުރާ ހުރިހާ ލިފްޓެއް ގަތުމަށްޓަކައި 18 މިލިއަން ޑޮލަރު ހޭދަވި ކަމަށެވެ.
"18 މިލިއަން ޑޮލަރު އިނގޭތޯ. އެއީ، ގާތްގަނޑަކަށް ހިޔާގެ ހުރިހާ ލިފްޓެއް ގަތުމަށް.. 32 ލިފްޓު އެއީ. އެ މަސައްކަތް ކުރިއަށްދަނީ،" ފަޒުލް ވިދާޅުވިއެވެ.
ހިޔާގެ ކޮންމެ ޓަވަރެއްގައި އިތުރު ދެ ލިފްޓު ހަރުކުރުމަކީ ރައީސް ޑރ. މުޙައްމަދު މުޢިއްޒުގެ ރިޔާސީ ވައުދެކެވެ.
މީގެ ކުރިން އެޗްޑީސީން ބުނި ގޮތުގައި އަންނަ އަހަރުގެ ތެރޭގައި އެ މަސައްކަތް ނިމި، އަލަށް ހަރުކުރާ ލިފްޓުތައް ބޭނުންކުރެވެން ފެށޭނެއެވެ.
ހިޔާ ފުލެޓުތަކަށް އިތުރު ލިފްޓު ހަރުކުރަން މިދިޔަ ފެބްރުއަރީގައި ހަވާލުކުރީ ޗަައިނާގެ ޝަންޔަންގް ޔުއާންޑާ އިންޓެލެކްޗުއަލް ގުރޫޕާއެވެ.
ކޮންމެ ޓަވަރެއްގައި އިތުރު ދެ ލިފްޓު ހަރުކުރާ ގޮތަށް، 16 ޓަވަރުގައި ޖުމްލަ 32 ލިފްޓު ހަރުކުރަން ހައުސިން ޑިވޮލޮޕްމަންޓު ކޯޕަރޭޝަން (އެޗްޑީސީ)ން ވަނީ އެ ކުންފުންޏާ އެކު އެއްބަސްވުމެއްގައި ސޮއިކޮށްފައެވެ.