ހުޅުމާލެ ފަޅު ތެރެއިން މަރުވެފައި އޮއްވައި އިއްޔެ ފެނުނު މ. މަޑުއްވަރީ، ކޮކްނަޓްވިލާ، އުމުރުން 36 އަހަރުގެ އިބްރާހިމް ޖިނާހު މުޙައްމަދު މަރުވީ ފަތައިފައި ދަނިކޮށް އަކުނިވަޔަށް ދަަމައިގެން ހިނގި ހާދިސާއެއްގައިކަމަށް ބެލެވޭކަމަށް އޭނާގެ އާއިލާއިން މިއަދު ބުނެފިއެވެ.
އިއްޔެ ހަވީރު 16:30 ހާއިރު ޖިނާހުގެ ހަށިގަނޑު ފެނުނީ ހުޅުމާލެ ފަޔާ ސްޓޭޝަނާ ދިމާލުންނެވެ. އެއީ ހުޅުމާލޭގައި މަސްވެރި އޮޑިދޯނިފަހަރު ބަނދަރުކުރާ ސަރަހައްދެވެ.
ޖިނާހުގެ ކުއްލި މަރާ ގުޅިގެން އޭނާގެ އާއިލާގެ ފަރާތުން އެކަމާ ގުޅޭ މައުލޫމާތު "ސަން"އާ ހިއްސާކުރަމުން އޭނާގެ ބައްޕަ ތައުފީގް ބުނީ، ޖިނާހަކީ ކަންނެލި މަސްވެރިކަންކުރާ މީހެއްކަމަށެވެ. އަދި އޭނާއަކީ އޭނާ މަސައްކަތްކުރާ އޮޑީގެ ކައްޕީންގެ ތެރެއިން އެއް ކައްޕިކަމަށް ވެސް ތައުފީގް ބުންޏެވެ.
ޖިނާހުގެ ބައްޕައާއި އޭނާގެ ބޭބެ އަދްލީ މުޙައްމަދު ބުނި ގޮތުގައި އެންމެ ފަހުން ޖިނާހާ ބައްދަލުވެ ވާހަކަ ދެކެވުނީ ހޮނިހިރު ދުވަހުގެ އިރުއޮއްސުނު ފަހުންނެވެ.
"6:30 ހާއިރު އަޅުގަނޑާ ދިމާވީ އެއީ ދިމާނުވާތާ ފުދޭވަރަކަށް ދުވަސްކޮށްފައި. ދެން މިތާ [ގޭގައި] ތިބެފައި މަންމަމެން ގެއަށް ދާން ދިޔައީ. ގޮސް މަންމަމެން ގެއަށް ވަދެފައި މަންމަމެން ގެއިން ކައިގެން ދެން ދިޔައީ، ދޯނީގައި ހުރި ރައްޓެއްސަކު ބުނެގެން،" އަދްލީ ބުންޏެވެ.
އޭނާގެ އެ އެކުވެރިޔާއާ އެކު ފަހުން ފޭސް ދޭކަށް ގޮސް އެ ތަނުން ކުރަން ހުރި މަސައްކަތްތައް ނިންމައިލުމަށްފަހު އަދްލީގެ ކޮއްކޮ ލައްވައި، ޖިނާހާއި އެނާގެ އެކުވެރިޔާ ކާރެއްގައި ފޮނުވީ ފޭސް އެކަކަށެވެ. ޖިނާހުގެ އެކުވެރިޔާ ހުޅުމާލެ، އެންޒީ ކައިރިއަށް ބޭލުމަށްފަހު، ޖިނާހު ބޭލީ ކަންނެލި ޖެޓީއަށެވެ. އޭރު ރޭގަނޑު 11:00 ޖަހައިފާނެ ކަމަށް އަދުލީ ބުންޏެވެ.
އޭނާ ބުނި ގޮތުގައި އެ ރޭ 10:45 ހާއިރުގެ ފަހުން ދެން އިތުރު އެއްވެސް ޚަބަރެއް ޖިނާހުގެ ފަރާތުން ނުވެއެވެ.
އާއިލާއިން ބުނީ މި މަރަކީ އެހެން މީހަކު ބައިވެރިވެގެން ހިނގި މަރެއްކަމަށް ބުނަން ނޭނގޭ ކަމަށެވެ. އެއީ އެފަދަ އެއްވެސް ކަމަކަށް ޝައްކުކުރެވޭ ކަހަލަ ކަމެއް ނުވާތީ ކަމަށް ބުންޏެވެ.
"ސީދާ އެެހެން ބުނަން ނޭނގޭ. އެއްޗެކޭ ނުއެއް ބުނެވޭނެތާ،" އަދްލީ ބުންޏެވެ.
ޖިނާހުގެ ބައްޕަ ތައުފީގް ބުނި ގޮތުގައި ޖިނާހަކީ ބޮޑު އެއްވެސް ބަލިމަޑުކަމެއް ތަހައްމަލުކުރާ މީހެއް ނޫނެވެ. ނަމަވެސް އޭނާއަކީ ދޭތެރެއަކުން އަކުނިވަޔަށް ދަމާ މީހެކެވެ.
"އެހެން ހިނގާ އުޅޭއިރު ވެސް އަކުނިވަޔަށް ދަމާނެ،" ތައުފީގް ބުންޏެވެ.
އިތުރަށް ވާހަކަދައްކަމުން އަދްލީ ބުނީ، އޭނާއަށް އެނގިފައިވާ ގޮތުގައި ކެޔޮޅު ރަށަށް ދާން ޖެހޭތީ، ނޮވެމްބަރު 30 ގައި ހުޅުމާލެ އަންނަން ވާނެ ކަމަށް ޖިނާހު ގާތު ކެޔޮޅު ބުންޏެވެ.
މަސައްކަތުގެ ކަންތައްތައް ހުރި ގޮތުން، ޖިނާހު ހުރީ ވަރަށް ބޮޑަށް ޕްރެޝަރުގައި ކަމަށް ބެލެވޭކަމަށް އަދްލީ ބުންޏެވެ.
"އެހެންވެ ބޮޑަށް ލަފާކުރެވެނީ އެ ޕްރެޝަރު އޭނާގެ ބޮލުގައި އިނީމާ ކަންނޭނގެ. [ދަންވަރު] 2:00 ޖަހަންދެން އަޅުގަނޑަށް ލަފާކުރެވޭ ގޮތުން އޭނާ ހުރީ ތޮށިމަތީގައި. ޖެޓީ މަތީގައި ހުރެފައި އެ ތަނުން ދެވޭނެ ގޮތެއް ނުފެނުނީމާ އޭނާ އެ ވިސްނީ ފަތައިފައި އަރަންކަމަށް ބޮޑަށް ވިސްނެނީ އަޅުގަނޑަށް،" އަދްލީ ބުންޏެވެ.
އެއާއެކު ބޮޑަށް ބެލެވެނީ ޖިނާހު މަރުވާން މެދުވެރިވި ހަދިސާ ހިނގީ ފަތައިފައި އޮޑިއަށް އަރަން ދަނިކޮށް އަކުނިވަޔަށް ދަމައިގެން ކަމަށް އޭނާގެ އާއިލާއިން ބުނެއެވެ.
ނަމަވެސް، ކަނޑުމަތީގެ ނުރައްކާ ޖިނާހަށް ރަނގަޅަށް އެނގޭނެކަމަށް އާއިލާއިން ބުނެއެވެ.
"އެންމެ ރަނގަޅަށް ދެނެވޮޑިގެންވަނީ މާތްﷲ،" ތައުފީގް ބުންޏެވެ.
މަރުވެފައިވާ މީހެއް މާ ގިނަ ވަގުތު ޖަނާޒާއެއް ނެތި ބާއްވަން ބޭނުން ނުވުމުން އޭނާގެ ޖަނާޒާގެ ކަންކަން ރޭ ނިންމައިލައިފައިވާ ކަމަށް ވެސް އާއިލާއިން ވަނީ ބުނެފައެވެ.