ސަރުކާރު ހިންގާ ކޯލިޝަންގައި އޮތް ޕީޕީއެމަށް މެންބަރުން އިތުރުކުރުމުގެ މަސައްކަތް މި ސަރުކާރު އައި ފަހުން ނުކުރާ ކަމަށާއި މިވީ މުއްދަތުގެ ތެރޭގައި 7،400 އަށްވުރެ ގިނަ މެންބަރުން ޕާޓީން ވަކިވެފައިވާ ކަމަށް އެ ޕާޓީން ބުނެފިއެވެ.
މި ސަރުކާރު އައި ފަހުން ޕީޕީއެމްގެ ބަދަލުގައި މެންބަރުން އިތުރުކުރުމުގެ މަސައްކަތްކުރަނީ ޕީއެންސީއަށެވެ.
އިލެކްޝަންސް ކޮމިޝަންގެ ރަސްމީ ވެބްސައިޓް ދައްކާ ގޮތުން ސެޕްޓެމްބަރު 19 އާ ހަމައަށް ޕީޕީއެމްގައި 34،694 މެންބަރުން ތިއްބެވެ.
އެކަމަކު، މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން 'ސަން'އިން ހޯދަން އެދުނު މައުލޫމާތުތަކެއް ހިއްސާކޮށް ޕީޕީއެމުން ބުނީ، މިދިޔަ އަހަރުގެ 17 ނޮވެމްބަރުގެ ފަހުން ޕީޕީއެމަށް މެންބަރުން އިތުރުކުރުމުގެ އެއްވެސް މަސައްކަތެއް ކޮށްފައިނުވާ ކަމަށެވެ.
އެ މުއްދަތުން ފެށިގެން މި އަހަރުގެ ނޮވެމްބަރު 21 ގެ ނިޔަލަށް 7،416 މެންބަރުން ޕީޕީއެމުން ވަކިވެފައިވާ ކަމަށް އީސީގެ ރަސްމީ ދަފުތަރުން އެނގެން އޮތް ކަމަށް އެ ޕާޓީން ބުންޏެވެ.
ނަމަވެސް، މެންބަރުންގެ އަދަދާ ގުޅޭ އިތުރު ތަފުސީލުތައް ދީފައެއް ނުވެއެވެ.
މިދިޔަ އަހަރުގެ ނޮވެމްބަރު 17 ގައި ޕީޕީއެމް/ޕީއެންސީން ވެރިކަމާ ހަވާލުވީއިރު ޕީއެންސީގައި ތިބީ 3،000 އެއްހައި މެންބަރުންނެވެ. އެކަމަކު، އެ ސަރުކާރަށް އަހަރުވީއިރު އެ ޕާޓީގެ ދަފުތަރުގައި 82،000 އަށްވުރެ ގިނަ މެންބަރުން ތިބި ކަމަށް ޕީއެންސީން ވަނީ ބުނެފައެވެ.
ޕީއެންސީގެ އަމާޒަކީ 100،000 މެންބަރުން ހަމަކުރުމެވެ. އެއީ، މީގެ ކުރިން އެއްވެސް ސިޔާސީ ޕާޓީއަކަށް ހަމަކުރެވުނު އަދަދެއް ނޫނެވެ. ކުރިން އެންމެ ގިނަ މެންބަރުން ތިބި އެމްޑީޕީގައި ސެޕްޓެމްބަރު 19 ގެ ނިޔަލަށް 50،000 އެއްހައި މެންބަރުން ތިބި ކަމަށް އިލެކްޝަންސް ކޮމިޝަންގެ ދަފުތަރުން ދައްކައެވެ.
ޕީޕީއެމަށް މެންބަރުން އިތުރުކުރުމުގެ މަސައްކަތްނުކުރި ނަމަވެސް އަދިވެސް ޕީޕީއެމްގައި ތިން ނައިބު ރައީސުން ތިއްބަވައެވެ. ފޮރިން މިނިސްޓަރު އަބްދުﷲ ޚަލީލް މި ފަހުން ޕީޕީއެމްގެ ނައިބު ރައީސްކަމަށް އިންތިޚާބުކުރިއިރު، އެ ޕާޓީގެ ނައިބު ރައީސުންގެ ގޮތުގައި އޭރު ވެސް ޑިފެންސް މިނިސްޓަރު މުހައްމަދު ޣައްސާން މައުމޫނާއި ފިޝަރީޒް މިނިސްޓަރު އަހުމަދު ޝިޔާމް ތިއްބެވިއެވެ.
ޕީޕީއެމް/ ޕީއެންސީގެ ލީޑަރުކަމުގައި ކުރީގެ ރައީސް އަބްދުﷲ ޔާމީން އަބްދުލްގައްޔޫމް ހުންނެވީއިރު އެ މަނިކުފާނު ހިންގެވީ ޕީޕީއެމެވެ. ޕީއެންސީގައި އޭރު ތިއްބެވީ 3،000 އެއްހައި މެންބަރުންނެެވެ.
މިދިޔަ ރިޔާސީ އިންތިޚާބުގައި ވެސް ޕީޕީއެމްގެ ޓިކެޓުގައި ޔާމީން ވާދަކުރައްވަން އުޅުއްވިއެވެ. އެކަމަކު، އޭރު ޖަލު ހުކުމެއްގައި ހުންނެވުމުން އެ މަނިކުފާނުގެ ކެންޑިޑެސީ ބާތިލުކުރަން ސުޕްރީމް ކޯޓުން ވަނީ ހުކުމްކޮށްފައެވެ. އެހެންވެ، ސެނެޓުގައި ބޭއްވި ޕްރައިމަރީ ކާމިޔާބުކޮށް، ޕީއެންސީގެ ޓިކެޓުގައި ރައީސް މުއިއްޒު ވާދަކުރައްވަން ނިންމެވީއެވެ.
އެކަމަކު، ރައީސް މުއިއްޒު ވެރިކަމަށް ވަޑައިގެންތާ ހަފުތާއެއް ނުވަނީސް ޔާމީން ވަނީ ޕީޕީއެމުން އިސްތިއުފާދެއްވައި އަމިއްލަފުޅު ޕާޓީއެއް އުފައްދަވައިފައެވެ.
އޭގެ ފަހުން ޕީއެންސީގެ ރައީސްކަމަށް ރައީސް މުއިއްޒު ވަނީ އިންތިޚާބުކޮށްފައެވެ. އެ ކޯލިޝަންގެ ލީޑަރަކީ ވެސް އެ މަނިކުފާނެވެ.
ޕީއެންސީ ހިންގަވާއިރު ޕީޕީއެމަށް އިހުމާލުވާ ކަމަށް ވިދާޅުވެ، ޔާމީން އަދިވެސް ސަރުކާރު ހިންގާ ކޯލިޝަނަށް ފާޑު ވިދާޅުވެއެވެ. ޕީޕީއެމްގައި ތިބި މެންބަރުން ޕީއެންސީން ވައްދާ ކަމަށް ވެސް އެ މަނިކުފާނު ވަނީ ތުހުމަތުކުރައްވައިފައެވެ.