ގާނޫނާ ޚިލާފުވެއްޖެނަމަ 300،000 ރުފިޔާއާ ހަމައަށް ޖޫރިމަނާކުރެވޭގޮތަށް ކޮޕީރައިޓްގެ ގާނޫނަށް އިސްލާހު ގެނައުމުގެ ބިލު ރައްޔިތުންގެ މަޖިލީހުން މިއަދު ފާސްކޮށްފިއެވެ.
ކޮޕީރައިޓްގެ ގާނޫނަށް އިސްލާހު ގެނައުމުގެ ބިލަކީ ސަރުކާރުގެ ފަރާތުން ނިލަންދޫ ދާއިރާގެ މެންބަރު ފާތިމަތު ސައުދާ ހުށަހެޅުއްވި ބިލެކެވެ.
ވޯޓުގައި ބައިވެރިވި 82 މެންބަރުންގެ އިއްތިފާގުން ކޮޕީރައިޓް ގާނޫނަށް އިސްލާހު ގެނައުމުގެ ބިލު ބަލައިގެންފައި ވަނީ ޖުލައި ނުވައެއްގައެވެ.
އެއަށްފަހު އިޖުތިމާއީ ކޮމިޓީގައި އެ ބިލު ދިރާސާކޮށް ނިންމި ގޮތުގެ ރިޕޯޓު މިއަދުގެ ޖަލްސާގައި ތަޅުމަށް ހުށަހަޅައި ބަހުސްކުރުން ކުރިއަށްދިޔައެވެ. އެއަށްފަހު ވޯޓުގައި ބައިވެރިވި 57 މެންބަރުންގެ އިއްތިފާގުން ބިލު ވަނީ މިއަދު ފާސްކޮށްފައެވެ.
މި ގާނޫނުގެ ދަށުން އުފެއްދުމެއް ހިމާޔަތް ކުރެވޭނީ، އެ އުފެއްދުމެއް ހުށަހަޅައިދޭ ގޮތަށް ނުވަތަ އުފެއްދުމެއްގައި ހިމެނޭ އެއްޗެއްގެ ސަބަބުން ނުވަތަ އެ އެއްޗެއްގެ ފެންވަރަށް ނުވަތަ މަގުސަދަށް ބަލައިގެން ނޫންކަމަށް ބިލުގައިވެއެވެ.
ހަމައެއާއެކު ބިލުގައިވަނީ ކޮޕީރައިޓުގެ ވެރިފަރާތުން އެހެން ފަރާތަކަށް ހުއްދަދީފައިނުވާ ހިނދެއްގައި އެ އުފެއްދުމެއްގެ އަސްލެއް ނުވަތަ ކޮޕީއެއް އާންމުންނަށް ވިއްކުން ނުވަތަ ކުއްޔަށް ދިނުމަށް ނުވަތަ އާންމުންނަށް ދޫކޮށްގެން ނުވާނެ ކަމަށެވެ.
މި ބިލުގައި ހުށަހަޅާފައިވާ އިތުރު ކަންކަމުގެ ތެރޭގައި ލިޔުމުގެ އަސްލީ އުފެއްދުންތަކާއި، މިއުޒިކީ އަސްލީ އުފެއްދުންތައް އަދި އަސްލީ ފަންނުވެރި އުފެއްދުންތައް ކަމަށް ގާނޫނުގައިވާ މާއްދާއަށް ނަންބަރެއް އިތުރުކޮށް އޭގައި އޯޑިއޯ ވިޝުއަލް މަސައްކަތްތައް ހިމެނުމެވެ.
އަދި، އޯޑިއޯ ރެކޯޑިންއާއި، ސެޓްލައިޓް، އިންޓަނެޓް، އަދި ކޭބަލް މެދުވެރިކޮށްކުރެވޭ ބްރޯޑްކާސްޓު ހިމެނުމެވެ.
މީގެ އިތުރުން، ގާނޫނުގެ ދަށުން ހިމާޔަތްކޮށްދީފައިވާ ހައްގަކަށް އަރައިގެންފިނަމަ އަދަބުގެ ގޮތުގައި އޭގެ ކުޑަބޮޑު މިނަށް ބަލައި 50،000 ރުފިޔާއާއި 300،000 ރުފިޔާއާ ދެމެދުގެ އަދަދަކުން ޖޫރިމަނާ ކުރުމަށް ވެސް އިސްލާހުގައި ވަނީ ހިމަނައިފައެވެ.