ސަރުކާރުގެ ވަޒީފާތަކުގެ ތެރެއިން 'ޑަަބަލް ޕެންޝަން' ލިބޭ އިދާރާތަކުން އަލަށް ރިޓަޔާވާ މީހުންނަށް ކޮންމެ މަހަކު ދެމުން އަންނަ އެލަވަންސް ކަނޑާލަން ސަރުކާރުން ނިންމައިފިއެވެ.
ފިނޭންސް މިނިސްޓްރީން ވަނީ މިދިޔަ ހަފުތާ ތެރޭގައި އެކަން ސަރުކާރުގެ އިދާރާތަކަށް ސިޓީއަކުން އަންގައިފައެވެ.
އެ ސިޓީގައި ވަނީ، އަންނަ ޖެނުއަރީން ފެށިގެން އަމަލުކުރަން ފަށާ އެ އުސޫލުގެ ދަށުން، ރިޓަޔާ ކުރާ މީހުންނަށް ކޮންމެ މަހަކު ލިބޭ އެލަވަންސް ދެން ނުލިބޭނެ ކަމަށެވެ. ނަމަވެސް ރިޓަޔާ ކުރާ މުވައްޒަފުންނަށް ގަނޑުކޮށް ދޭ ފައިސާ ދެމުންދާނެ ކަމަށް އެ ސިޓީގައިވެއެވެ.
ފިނޭންސް މިނިސްޓްރީން ބުނެފައިވަނީ އެ ފިޔަވަޅު އަޅަނީ ސަރުކާރުން ޚަރަދު ކުޑަކުރުމަށް ކުރާ މަސައްކަތްތަކުގެ ތެރެއިން ކަމަށެވެ.
ޑަބަލް ޕެންޝަންއަކީ ސަރުކާރުގެ ރިޓަޔާމެންޓް ޕެންޝަން ސްކީމްގެ އިތުރުން، ސަރުކާރުގެ ބައެއް އިދާރާތަކުން ހިންގާ ސްކީމްތަކާ ހެދި ބައެއް މީހުންނަށް ދައުލަތުގެ ޚަރަދުގައި ދެ ޕެންޝަނެއް ލިބުމެވެ.
ދައުލަތުން ޕެންޝަނަށް ކުރާ ޚަރަދުތައް އިތުރުވަމުން އަންނައިރު، ޑަބަލް ޕެންޝަނަށް އެންމެ ގިނައިން ޚަރަދުކުރަން ޖެހޭ މުއައްސަސާތަކުގެ ތެރޭގައި ފުލުހުންނާއި އެމްއެންޑީއެފް ހިމެނެއެވެ.
ފުލުހުން: 'ޑަބަލް ޕެންޝަން'އަށް ދައުލަތުން އެންމެ ބޮޑު ޚަރަދެއްދާ މުއައްސަސާއަކީ ޕޮލިސް ސާވިސް -- ސަން ފޮޓޯ/ފަޔާޒު މޫސާ
ޕެންޝަނަށް ކުރާ ޚަރަދުތައް ބޮޑުވުމާ ގުޅޭ ގޮތުން ފިނޭންސް މިނިސްޓްރީން ޝާއިއުކޮށްފައިވާ ހުދު ކަރުދާހެއްގައިވާ ގޮތުން ސަރުކާރުގެ އެހެން އިދާރާތަކާ އަޅައިބަލައިއިރު ފުލުހުންނާއި ސިފައިންނާއި ކަސްޓަމްސްގެ މުވައްޒަފުން ރިޓަޔާ ކުރާ އުމުރު ހަގެވެ. އެގޮތުން ފުލުހުންނާއި ކަސްޓަމްސް މުވައްޒަފުން ރިޓަޔާ ކުރާ އެވަރެޖު އުމުރަކީ 50.47 ކަމަށްވާއިރު ސިފައިންގެ އެވަރެޖަކީ 46.16 އަހަރެވެ. ނަމަވެސް އެހެން އިދާރާތަކުން ރިޓަޔާ ކުރާ އެވަރެޖު އުމުރު 61.63އަށް އަރައެވެ.
އެ ދިރާސާގައިވާ ގޮތުން ރިޓަޔާ ކުރާ އުމުރު ހަގުވާ އެއް ސަބަބަކީ، އެ މުއައްސަސާތަކުގެ ރިޓަޔާމެންޓް ސްކީމުތަކުން ލިބޭ މިންވަރު އެހެން މުއައްސަސާތަކަށް ވުރެ އިތުރުވުން ކަމަށް ބެލެވެއެވެ. ނަމަވެސް އެ މުއައްސަސާތަކުގައި މަސައްކަތްކުރާ މީހުންގެ ޖިސްމާނީ ސިއްހަތާ ވެސް، ހަގު އުމުރުގައި ރިޓަޔާ ކުރުމާ ގުޅުން އޮންނާނެކަން ދިރާސާގައި ފާހަގަކޮށްފައެވެ.
ދައުލަތުން 65 އަހަރުން މަތީގެ މީހުންނަށް އެލަވަންސްއެއް ދިނުމުގެ އިތުރަށް، ދައުލަތުގެ ޚަރަދުގައި ޕެންޝަން އެލަވަންސް ދިނުން ހުއްޓާލަން ބައިނަލްއަގުވާމީ އިދާރާތަކުން އަންނަނީ ތަކުރާރުކޮށް ގޮވާލަމުންނެވެ.
މިދިޔަ ޖުލައި މަހު ވޯލްޑް ބޭންކުން ވަނީ ރާއްޖެއިން ޕެންޝަން ނިޒާމު ހިންގަނީ ދެމެހެއްޓެނިވި ގޮތެއްގައި ނޫން ކަމަށާއި، ގައުމުގެ އިގުތިސާދީ މިހާރު އޮތް ވަރަށް ވުރެ ގޯސްވިޔަ ނުދިނުމަށްޓަކައި، ޑަބަލް ޕެންޝަން އުވާލަން ޖެހޭ ކަމަށް ބުނެފައެވެ.
މި ސަރުކާރުން ޚަރަދު ކުޑަކުރުމަށް މި އަހަރު ވެސް ފިޔަވަޅުތަކެއް އަޅައި، އަންނަ އަހަރު ވެސް އިތުރު ފިޔަވަޅުތައް އެޅުމަށް ނިންމައިފައިވެއެވެ. އެ އިސްލާހީ ފިޔަވަޅުތަކުގެ ސަބަބުން އަންނަ އަހަރު ދައުލަތުގެ ބަޖެޓުން 6.6 ބިލިއަން ރުފިޔާ ސަލާމަތް ކުރެވޭނެ ކަމަށް، ސަރުކާރުން އަންނަ އަހަރަށް ލަފާކޮށް ހުށަހަޅައިފައިވާ ބަޖެޓުގައިވެއެވެ.
ސަރުކާރުން ގެންނަން ނިންމައިފައިވާ ބަދަލުތަކުގެ ތެރޭގައި 65 އަހަރުވުމުން ދޭ އިނާޔަތް މަދުން އާމްދަނީ ލިބޭ މީހުންނަށް އެކަނި ދޭ ގޮތަށް ހަމަޖެއްސުމާއި ސިފައިންނާއި ފުލުހުންގެ ހަރަދު ބޮޑު މެޑިކަލް ވެލްފެއާ ސްކީމު އިސްލާހުކުރުން ހިމެނެއެވެ.