މިހާރު ޕެންޝަން ސްކީމުގެ ތެރެއިން 65 އަހަރުވުމުން ކޮންމެ މީހަކަް ވެސް ދައުލަތުން ދޭ 5،000 ރުފިޔާގެ އިނާޔަތް، މީހާގެ ފޯރުންތެރިކަމާއި ތަނަވަސްކަމަށް ބަލައި، ހަމައެކަނި މަދުން އާމްދަނީ ލިބޭ މީހުންނަށް އެކަނި ދޭ ގޮތަށް ބަދަލުކުރަން ނިންމައިފިއެވެ.
ދައުލަތުގެ ޚަރަދުތައް ކުޑަކުރުމަށް ޓަކައި އަންނަ އަހަރުގެ ބަޖެޓުގައި ގިނަ ކަންތައްތަކެއް ވަނީ ހިމަނައިފައެވެ. ޚާއްސަ ގޮތެއްގައި ސަބްސިޑީތަކާއި، ދައުލަތުގެ ވެލްފެއާ ނިޒާމު ހަރުދަނާކުރުމަށް ގިނަ ފިޔަވަޅުތަކެއް އަޅަން ވަނީ ނިންމައިފައެވެ.
އެގޮތުން އަންނަ އަހަރުގެ ބަޖެޓުގައި ވަނީ ދެމެހެއްޓެނިވި ގޮތެއްގައި ދައުލަތުން ޕެންޝަންގެ ގޮތުގައި ކުރާ ޚަރަދުތައް ހިފެހެއްޓުމަށް ޓަކައި އިސްލާހުތަކެއް ހިމަނައިފައެވެ.
އެންމެ މުހިންމު އިސްލާހެއްގެ ގޮތުގައި ގެންނަން ނިންމައިފައިވާ ބަދަލަކީ އަންނަ އަހަރުގެ އެޕްރީލުން ފެށިގެން، 65 އަހަރުން މަތީގެ ކޮންމެ މީހަކަށް ދޭ ބޭސިކް ޕެންޝަން "ޓާގެޓެޑް ޕެންޝަން" އަކަށް ބަދަލުކުރުމެވެ. އޭރުން މި ޕެންޝަން ލިބޭނީ 65 އަހަރު ވެފައިވާ މީހުންގެ ތެރެއިން ފޯރުންތެރިކަމަށް ބަލައި އެންމެ މަދުން އާމްދަނީ ލިބޭ މީހުންނަށް އެކަންޏެވެ.
ސަރުކާރުން ބުނި ގޮތުގައި، އެޕްރީލުން ފެށިގެން އުސޫލު ބަދަލުކުރިއަސް، މިހާރު ވެސް އެ އެލަވަންސް ލިބޭ އެއްވެސް މީހަކަށް، އެލަވަންސް ދިނުން ހުއްޓައިނުލައި، އެންމެނަށް ވެސް ދޭނެއެވެ.
އަލަށް އަމަލުކުރާ އުސޫލު ތަންފީޒުކުރަން ފަށާނީ އެޕްރީލުން ފެށިގެން އަލަށް ސްކީމަށް ވަންނަ މީހުންނަށެވެ.
އޭގެ ތެރޭގައި ހިމެނޭ ކަންކަމަކީ:
- އާ ޕޭ ފްރޭމްވޯކްގައި ހިމެނޭ ޕެންޝަން ފްރޭމްވޯކް ފުރިހަމައަށް ތަންފީޒުކުރުން
- މުއައްސަސާތަކުގެ މެދުގައި ދޭ އިނާޔަތްތަކުގެ ފަރަގު ނައްތައިލައި އެއް ހަމަ އުސޫލަކުން އިނާޔަތް ދިނުމަށް ބަދަލު ގެނައުން
- އަލަށް ރިޓަޔަވާ ފަރާތްތަކަށް އެއްހަމަ އުސޫލަކުން ޕެންޝަން އިނާޔަތްދިނުމަށް ގާނޫނީ ބަަދަލު ގެނައުން
ފިނޭންސް މިނިސްޓްރީން ބުނީ މި ބަދަލުގެ ސަބަބުން ދައުލަތުން ޕެންޝަނަށް ކުރާ ޚަރަދު އެއް މިންފަނޑެއްގައި ހިފެހެއްޓޭނެ ކަމަށެވެ. އަދި މިއީ ހައްގުވެރިންނަށް ލިބޭ ޕެންޝަންގެ އިނާޔަތަށް އުނިކަމެއް އަންނާނެ ކަމެއް ނޫންކަމަށް ވެސް ބުނެފައިވެއެވެ.