ރާއްޖެއަށް މިހާރު ކުރަމުންދާ ވިއްސާރައިގައި އައްޑޫސިޓީގެ ފަސް ގެއެއްގެ ފުރާޅު އެއްލައިލާ 13 މީހުންނަށް ވަގުތީ ބޯހިޔާވަހިކަން ފޯރުކޮށްދީފިއެވެ.
"ސަން"އަށް މައުލޫމާތު ދެއްވަމުން އައްޑޫ ސިޓީ ކައުންސިލްގެ މަރަދޫ ދާއިރާގެ މެމްބަރު އަހުމަދު ނާދިރު ވިދާޅުވީ ރޭ ކުރި ވިއްސާރައިގައި އެ ސިޓީގެ ފަސް ގެއެއްގެ ފުރާޅު އެއްލައިލާ ގެއްލުން ވެފައި ވާކަމަށެވެ.
ނާދިރު ވިދާޅުވީ ފުރާޅު އެއްލައިލާފައި ވަނީ، މަރަދޫގެ ގެޔަކާއި މަރަދޫފޭދޫގެ ގެއަކާއި ފޭދޫގެ ދެ ގެއެއްގެ އިތުރުން ހުޅުދޫގެ ގެއަކުން ކަމަށެވެ. މުޅި ގޭގެ ފުރާޅު އެއްލާލައި މަރަދޫފޭދޫ ގެއެއްގެ މީހުން އެހެން ގެއަކަށް ބަދަލުވާން ޖެހުނުކަން ވެސް ނާދިރު ވަނީ ފާހަގަކުރައްވާފައެވެ.
ނެޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ)އިން ބުނިގޮތުގައި މި ގޭގައި 13 މީހުންގެ އިތުރުން 12 އަހަރުން ދަށުގެ ހަތަރު ކުދިން އުޅެއެވެ.
ފުރާޅު އެއްލާލީ މަރަދޫގެ ގެޔަކާ މަރަދޫފޭދޫ ގެއަކާ ފޭދޫ ދެ ގެއަކާ ހުޅުދޫ ގެއަކުން. މަރަދޫފޭދޫ ގެއިން ފުރާޅު އެއްލާލީ އެ ގޭގެ ދެ ކޮޓަރިއާ ސިޓިން ރޫމާ ބަދިގެއާ، މުޅި ގޭގެ ފުރާޅު އެއްލާލީ. އެ ގޭގެ މީހުން އެހެން ގެއަކަށް ދާންޖެހުނީ. ފުރާޅު އެއްލާލީމަ ފެމެލީ ގެއަކަށް އެމީހުން ދިޔައީ. އައްޑޫ ސިޓީގެ މަރަދޫ ދާއިރާގެ ކައުންސިލް މެމްބަރު އަހުމަދު ނާދިރު
އެމްއެންޑީއެފްއިން ވެސް ވަނީ އައްޑޫ ސިޓީގެ ފަސް ގެއެއްގެ ފުރާޅު އެއްލާލުމުން އެމްއެންޑީއެފް ސަދަން އޭރިއާ ކޮމާންޑްގެ ސިފައިންގެ އެހީތެރިކަން ފޯރުކޮށްދީފައި ވާކަމަށް ބުނެފައެވެ.
މި ގޭގައި 13 މީހުންގެ އިތުރުން 12 އަހަރުން ދަށުގެ ހަތަރު ކުދިން އުޅޭ -- ފޮޓޯ/ އެންޑީއެމްއޭ
އަދި މި ހާދިސާގައި އެއްވެސް މީހަކަށް އަނިޔާއެއް ލިބިފައި ނުވާކަންވެސް އެމްއެންޑީއެފްއިން ވަނީ ފާހަގަކޮށްފައެވެ.
ރާއްޖެއަށް މިހާރު ކުރަމުންމިދާ ވިއްސާރައިގައި ކަނޑުތައް ގަދަވާނެ ކަމަށް ލަފާކޮށް ކަނޑުދަތުރުކުރާ ފަރާތްތަކުން އެކަމަށް ސަމާލު ވުމަށް މޫސުމާ ބެހޭ ގައުމީ އިދާރާ މެޓް އޮފީހުން ވެސް ވަނީ މިއަދު ލަފާކޮށްފައެވެ.
މިއަދު އިރުއޮއްސި 06:30އާ ހަމައަށް މެޓު އޮފީހުން ވަނި މުޅި ރާއްޖެއަށް ހުދު ސަމާލު ވެސް ނެރެފައެވެ.